Quotable Quotes Part II

[Visalakshi Ramani]

Share:

Facebook X (Twitter) LinkedIn WhatsApp Email Share Link

#1283 to #1286

#1283. சிவனை அடையலாம்

பார்க்கலும் ஆகும் பகை அறு சக்கரம்
காக்கலும் ஆகும், கருத்தில் தடம் எங்கும்
நோக்கலும் ஆகும், நுணுக்கமற்ற நுண் பொருள்
ஆக்கலும் ஆகும் அறிந்து கொள் வார்க்கே.

ஜனனம் மரணம் என்னும் பகைவனை அழிகின்ற வல்லமை கொண்டது இந்தச் சக்கரம். இதைப் பார்க்கவும் முடியும். தன் உள்ளத்துக்குள் இதைக் காக்கவும் முடியும். நுட்பமானவற்றுள் நுட்பமாகிய சிவனைக் நம்மால் நோக்கவும் முடியும். உள்ளபடி உணர்ந்து கொண்டவரால் இதை அடையவும் முடியும்.

#1284. பெருமை சொல்லில் அடங்காது

அறிந்திடும் சக்கர மாதி யெழுத்து
விரிந்திடும் சக்கர மேலெழுத் தம்மை
பரிந்திடும் சக்கரம் பாரங்கி நாளும்
குவிந்திடும் சக்கரம் கூறலு மாமே.

இந்தச் சக்கரத்தின் முதல் எழுத்து ‘அ’கரம் ஆகும். அதற்கும் அடுத்த எழுத்து தேவிக்கு உரிய எழுத்தாகிய ‘உ’கரம். இந்தச் சக்கரத்தில் மாயையின் செயல்களாகிய நிலம், நீர், தீ, காற்று என்னும் நான்கு பூதங்களும் அமைந்திருக்கும். இவை அனைத்தும் குவிந்துள்ள இந்தச் சக்கரத்தின் பெருமையைப் புகலவும் முடியுமோ?

#1285. ஆறு இயல்புகள் கொண்ட மந்திரம்

கூறிய சக்கரத் துள் எழுமந்திரம்
ஆறு இயல்பாக அமைந்து விரிந்திடும்;
தேறிய அஞ்சுடன் சேர்ந்தெழு மாரணம்
ஆறு இயல்பாக மதித்துக் கொள்வர்க்கே.

தெளிவான ஐந்து எழுத்துக்கள் கொண்ட மந்திரம் மாரணம். சொல்லப் பட்ட சக்கரத்துடன் எழும் அம மந்திரம் ஆறு செயல்களைச் செய்வதாக விரிந்து அமையும் அவை (1). தம்பனம், (2). மோகனம், (3). உச்சாடனம், (4). வித்வேடனம், (5). மாரணம், (6). வசியம்.

#1286. ஐம்பூதங்கள் பகையை வெல்ல உதவும்

மதித்திடும் அம்மையும் மாமாதும் ஆகும்,
மதித்திடும் அம்மையும் அங்கனல் ஒக்கும்,
மதித்து அங்கு எழுந்தவை காரணம் ஆகில்,
கொதித்து அங்கு எழுந்தவை கூடகி லாவே.

குறிப்பிட்ட சக்கரத்தின் தலைவி எல்லா சீவர்களுக்கும் அருளும் அன்னை ஆவாள். அவளைத் துதிக்கின்ற அன்பர்களுக்கு அவள் பகையை வெல்ல உதவுவாள். ஐம் பெரும் பூதங்களும் அன்னையின் ஆணைப்படித் தொழில் புரிபவை. அவள் ஆணையின்றி அவை எதுவும் செய்யா.

 

[Visalakshi Ramani]

#1287 to #1290

#1287. பகைவர் என்பவர் இரார்.

கூடிய தம்பனம் மாரணம் வசியம்
ஆடுஇயல் பாக அமைந்து செறிந்திடும்
பாடியுள் ளாகப் பகைவரும் வந்துறார்
தேடிஉள் ஆகத் தெளிந்துகொள் வார்க்கே.

தனக்குள்ளே தேடித் தெளிவு பெற்ற அடியவர்களுக்குத் தம்பனம், மாரணம், வசியம் போன்றவை தானாகவே வந்து பொருந்தி விடும். இவர்களுக்குப் பகைவர் என்று எவரும் இரார்.

#1288. அகாரத்தைத் தியானிப்பீர்

தெளிந்திடும் சக்கரம் மூலத்தின் உள்ளே
அளிந்த அகாரத்தை அந்நடு ஆக்கி,
குளிர்ந்த அரவினைக் கூட்டி உள் வைத்து,
நலிந்தவை அங்குஎழு நாடிய காலே.

மூலாதாரத்தில் உள்ள சக்கரத்தை நன்கு அறிந்து தெளிவீர். மண்டலமிட்ட, குளிர்ந்த, குண்டலினியின் வட்டத்துக்குள் கனிந்த அகாரத்தை வைப்பீர். மூலவாயுவைச் சுழுமுனை வழியே மேலே ஏற்றுவீர்.

#1289. காமம் ஆதிப் பகைவர் அறுவர்

கால் அரை முக்கால் முழுது எனும் மந்திரம்
ஆலித்து எழுந்த ஐந்து ஊறி எழுந்ததாய்ப்
பாலித்து எழுந்து பகை அற நின்றபின்,
மால்உற்ற, மந்திரம் மாறிக்கொள் வார்க்கே.

கால், அரை, முக்கால், முழுது என்று வளர்ந்து முழுமை அடையும் பிரணவம். இது மூலாதாரத்துக்கு மேலே உள்ள ஐந்து ஆதாரங்களையும் கடந்து செல்லும். காமம், குரோதம், லோபம், மோகம், மதம், மாச்சரியம் என்னும் சீவனின் ஆறு உட்பகைவர்களும் கெடும்படி இது நிலைத்தால் அப்போது பிரணவம் ஓங்கும், சீவனின் மன மலங்கள் நீங்கும்.

#1290. பிரணவ வழி சிவனை அடைவிக்கும்

கொண்ட இம் மந்திரம் கூத்தன் எழுத்ததாய்ப்
பண்டை யுள் நாவிற் பகையற விண்டபின்
மன்று நிறைந்த மணிவிளக்கு ஆயிடும்
இன்றும் இதயத்து எழுந்து “நம” எனே.

கூத்தபிரானின் எழுத்தாகிய இந்தப் பிரணவம் முன்பு வெளிப்படாமல் மறைந்து நின்றது. உட்பகைவர்களை ஒருவர் வென்ற பின்னர் அது வெளிப்பட்டுத் தலையை நோக்கிச் செல்லும். அங்கு சகசிர தளம் விரிந்து ஒளியுடன் விளங்கும். அங்கே இருப்பது மன்றுள் மணிவிளக்காகிய சிவன் என்று அறிவீர். பிரணவ வழி சிவபெருமானை அடைவிக்கும்.

 

[Visalakshi Ramani]

10. வயிரவச் சக்கரம்.

வயிரவர் சிவபெருமானின் பல வடிவங்களுள் ஒருவர் ஆவார்.
பகை போன்ற இடையூறுகளை வெல்ல இவரை வழிபடுவர்.
வயிரவர்க்கு உரிய சக்கரம் வயிரவச் சக்கரம் ஆகும்.

1291. வயிரவரை தியானிக்கும் முறை

அறிந்த பிரதமையோடு ஆறும் அறிஞ்சு
அறிந்த அச் சத்தமி மேலிவை குற்ற
அறிந்தவை ஒன்றுவிட்டு ஒன்று பத்து ஆக
அறிந்து, வலம்அது வாக நடவே.

வளர் பிறையில் பிரதமை முதல் சஷ்டி வரை உடலின் ஆறு ஆதாரங்களிலும் வயிரவரைத் தியானிக்க வேண்டும். அதன் பின் ஒன்பதாவது திதியாகிய நவமியில் நெற்றிக்கு மேல் தியானிக்க வேண்டும். பதினோராவது திதியாகிய ஏகாதசியில் வலது காதின் பக்கம் தியானிக்க வேண்டும். பதின்மூன்றாவது திதியாகிய திரயோதசியில் பிடரியில் தியானிக்க வேண்டும். பதினைந்தாம் திதியாகிய பௌர்ணமியன்று இடது காதின் பக்கம் தியானிக்க வேண்டும். இங்கனம் தியானிப்பவருக்கு வெற்றி கிட்டும்.

#1292. பகைவனைப் பந்தாடலாம்

நடந்த வயிரவன் சூல கபாலி
கடந்த பகைவனைக் கண்ணது போக்கி
தொடர்ந்த வுயிரது உண்ணும் பொழுது
படர்ந்த வுடல்கொடு பந்தாடலமே.

தன்னைக் குறித்துத் தியானம் செய்பவரின் மனதில் வயிரவர் தோன்றுவார். சூலத்தையும், கபாலத்தையும் கைகளில் ஏந்தி இருப்பார். பகைவன் மீது அருள் காட்ட மாட்டார். அவர் பகைவனை வென்ற பிறகு அந்த பகைவனுடலைப் பந்தாட முடியும்.

#1293. வயிரவர் வடிவம்

ஆமேவப் பூண்டருள் ஆதி வயிரவன்
ஆமே கபாலமும் சூலமும் கைக் கொண்டு அங்கு
ஆமே தமருக பாசமும் கையது
ஆமே சிரத்தொடு வாளது கையே.

சீவர்களின் பக்திக்குத் தகுந்தபடி அருள் புரியும் வயிரவர் தன் இரு கரங்களில் கபாலமும், சூலமும் ஏந்தி இருப்பார். மற்ற இரண்டு கரங்களில் உடுக்கையையும், பாசக் கயிற்றையும் வைத்து இருப்பார். ஐந்தாவது ஆறாவது கரங்களில் துண்டிக்கப்பட்ட ஒரு தலைலயும் , ஒரு வாளும் விளங்கும்.

 

[Visalakshi Ramani]

#1294. பூசனை செய்வீர்

கையவை யாரும் கருத்தது நோக்கிடும்
மெய்யது செம்மை விளங்கு வயிரவன்
துய்யருள் ளத்தில் துளங்கு மெய் யுற்றதாய்ப்
பொய்வகை விட்டுநீ பூசனை செய்யே.

வயிரவரின் ஆறு கரங்களையும் அவற்றில் அவர் ஏந்தியுள்ளவற்றையும் மனம் ஒன்றித் தியானம் செய்வீர். செந்நிறம் கொண்டது அவர் திருமேனி. தூயவர்களின் உள்ளத்தில் அவர் நன்கு துலங்குவார். பொய் வகை பூசைகளை விட்டு விட்டு மெய்யுற்றதாகப் பூசை செய்வீர்.

#1295. வயிரவரைப் பூசிக்கும் முறை

பூசனை செய்யப் பொருந்தியோ ராயிரம்
பூசனை செய்ய மதுவுட னாடுமால்
பூசனை சாந்து சவ்வாது புழுகு நெய்
பூசனை செய்து நீர் பூசலை வேண்டுமே.

வயிரவரை ஆயிரம் உரு செபித்து வழிபடுவீர். நல்ல தேனைப் படைத்தது பூசை செய்வீர். சாந்து, சவ்வாது, புனுகு, போன்ற வாசனைப் பொருட்களை அவருக்குச் சாத்திப் பகை நீங்க வேண்டும் எனப் பிரார்த்தனை செய்வீர்.

#1296. விரும்பியவற்றை அடையலாம்

வேண்டிய வாறு கலகம் ஆயிடும்
வேண்டிய ஆறினுள் மெய்யது பெற்றபின்
வேண்டிய வாறு வரும் வழி நீ நட
வேண்டிய வாறது வாகும் கருத்தே.

நீ விரும்பிய வண்ணம் பகைவர்கள் இடையே கலகம் மூளும். ஆறு கர்ம வித்தைகளையும் நீ முறையாகப் பெற வேண்டும். அதன் பின்னர் நீ விரும்பிய வழிகளில் நடக்கலாம். நீ விரும்புகின்ற அனைத்துமே உனக்குக் கிடைக்கும்.

 

[Visalakshi Ramani]

Sorry for the delay in today's posting.

It is not my fault but the elusive internet connection caused this delay!

[h=1]11 சாம்பவி மண்டலச் சக்கரம்[/h] 11 சாம்பவி மண்டலச் சக்கரம்
சாம்பவி என்பது சிவசக்தி.
சிவனும் சக்தியும் ஒன்றாக விளங்கும் சிவலிங்கத் திருமேனி அமைந்துள்ள சக்கரம் சாம்பவி மண்டலச் சக்கரம்.

 

[Visalakshi Ramani]

#1297 to #1300

#1297. நாட்டு மக்கள் தொழுது நிற்பர்

சாம்பவி மண்டலச் சக்கரம் சொல்லிடில்
ஆம்பதம் எட்டாக விட்டிடன் மேலதாம்
காண்பதம் தத்துவ நாலுள் நயனமும்
நாம்பதம் கண்டபின் நாடறிந் தோமே.

சாம்பவி மண்டலச் சக்கரத்தின் அமைப்பு:

இது எட்டு இதழ்கள் கொண்டது. மேலானதாகக் காணப்படும் நான்கு இதழ்களில் விந்து, நாதம், சிவம், சக்தி அமைவர். இவற்றுள் விந்துவை நயனமாக அறிந்து கொண்டவரை நாட்டு மக்கள் வந்து தொழுது நிற்பர்.

#1298. நாடறிந்த மண்டலம்

நாடறி மண்டலம் நல்லஇக் குண்டத்துள்
கோடற வீதி கொணர்ந்துள் இரண்டழி
பாடறி பத்துடன் ஆறு நெடுவீதி
ஈடற நாலைந் திடவகை ஆமே.

நாடறிந்த மண்டலமான இந்த நல்ல சக்கரத்தில் நேராகச் செல்லும் வீதிகளை நாற்புறமும் அமைக்க வேண்டும். நெடிய வீதிகளில் உள்ள அறைகள் பதினாறு. வீதிக்குள் அமைந்த அறைகளின் எண்ணிக்கை முப்பது ஆறு. உட்சுற்றில் உள்ள அறைகளின் எண்ணிக்கை இருபது.

#1299. இலிங்கங்கள்

நாலைந் திடவகை உள்ளதோர் மண்டலம்
நாலுநல் வீதியுள் நந்நால் இலிங்கமா
நாலுநற் கோணமும் நண்ணால் இலிங்கமா
நாலுநற் பூநடு நண்ணல்அவ் வாறே.

இருபது அறைகள் ஒவ்வொன்றும் தனித் தனி வட்டமாக நிற்கும். வீதிகள் நான்கிலும் திசைக்கு நான்காகப் பதினாறு இலிங்கங்கள் இருக்கும். நடுவில் உள்ள நான்கு அறைகளிலும் நான்கு இலிங்கங்கள் இருக்கும். நடுவில் உள்ள ஒவ்வொரு இலிங்கமும் நான்கு தாமரை மலர்களின் நடுவில் ஒரு தாமரை மலரில் இருக்கும்.

#1300. குறைகளும் இல்லையே!

ஆறிரு பத்துநால் அஞ்செழுத் தஞ்சையும்
வேறுரு வாக விளைந்து கிடந்தது
தேறிநீர் உம்மில் சிவாய நமஎன்று
கூறுமின் கூறிற் குறைகளும் இல்லையே.

சாம்பவி மண்டலச் சக்கரம் அமைப்பதை ஒரு நல்ல குருமுகமாகக் கற்கவும்.

 

[Visalakshi Ramani]

There will be no posting between 26th and 28th April.
(I and my husband are attending an important interview in Chennai)

Posting will be resumed on 29th April and go on till 2nd May
- assuming that Internet Connection will be more reliable!

There will be no posting between 3rd may and 5th May.
(My dear mother's ceremony falls in those days)

I am giving the link for those who want to read more!
https://thirumanthiram4.wordpress.com/

I guess I have to wave the dhoop stick and pray for uninterrupted high speed Internet browsing, just
as my two little grand children used to do - after exhausting the full month's quota in just 5 days!

 

[Visalakshi Ramani]

#1301. குரைகழல் கூடும்

குறைவதும் இல்லை குரைகழல் கூடும்
அறைவதும் ஆரணம் அவ்வெழுத் தாகில்
திறம்அது வாகத் தெளியவல் லாருக்
கிறவில்லை என்றென் றியம்பினர் காண.

வேதம் மூல மந்திரமாகச் சொல்லுவது திரு ஐந்தெழுத்து. இதனை அவ்வாறே அறிந்து கொண்டவர்களுக்கு உலகப் பயன்களில் எந்தக் குறையும் இராது. `இறப்பு` என்பது அவர்களுக்கு இல்லை. அவர்களுக்கு ஒலிக்கின்ற வீரக்கழலை அணிந்துள்ள சிவபெருமானின் அரிய திருவடிகள் கிடைக்கும் என்று கற்றறிந்தோர் உறுதிபடக் கூறியுள்ளார்கள்.

#1302. சாம்பவி மண்டலச்சக்கர வழிபாடு

காணும் பொருளும் கருதிய தெய்வமும்
பேணும் பதியும் பெருகிய தீர்த்தமும்
ஊணும் உணர்வும் உறக்கமும் தானாகக்
காணுங் கனகமும் காரிகை யாமே.

ஐம்புல நுகர்வுக்குத் தேவையான பல சிறந்த பொருட்களும், விரும்பும் தெய்வங்களை வழிபடுகின்ற வாய்ப்புக்களும், போற்றப்படுகின்ற திவ்ய தலங்களில் வாழும் நற்பேறும், புண்ணிய தீர்த்தங்களில் நீராடும் நல்ல சந்தர்ப்பங்களும், இவற்றால் கிடைக்கும் நற்பயன்களும், நல்லறிவும், அமைதியான உறக்கமும், தானாகக் கிடைக்கும் பொன்னும் இந்தச் சாம்பவி மண்டலச் சக்கர வழிபாட்டினால் கிடைக்கும்.

#1303. பகைவரும் இரார்

ஆமே எழுத்தஞ்சும் ஆம்வழி யேஆகப்
போமே அதுதானும்? போம்வழி யேபோனால்
நாமே நினைத்தன செய்யலும் ஆகும்
பார்மேல் ஒருவர் பகையில்லை தானே.

திருவைந்தெழுத்து எப்போதும் நன்மை தரும். அது நல்ல வழி உண்டாகச் செய்யும். அதனால் அதில் தெளிந்து வல்லமை அடைதல் யாருக்குக்கும் கைக்கூடும்! அங்ஙனம் கைக்கூடுமாயின் அவர் நினைத்தவற்றை நினைத்தவாறு முடிக்க முடியும். உலகில் அவருக்குப் பகைவரும் இரார்.

#1304. நன்மையே விளையும்.

பகையில்லை என்றும் பணிந்தவர் தம்பால்
நகையில்லை நாணாளும் நன்மைகள் ஆகும்
வினையில்லை என்றும் விருத்தமும் இல்லை
தகையில்லை தானும் சலமது வாமே.

திருவைந்தெழுத்தை ஓதுபவருக்குப் பகைவர்கள் இல்லை.
அவர்களைப் பெரியோர் இகழும் இகழ்ச்சி என்பதும் இல்லை.
இருவினைகள் இல்லை; பொருந்தாச் செயல்கள் இல்லை.
இடையூறு என்பவை இல்லை. நாளும் நன்மையே விளையும்.
அம்மந்திரம் மலத்தைக் கழுவித் தூய்மையைத் தரும் ஜலமாகும்.

#1305. இன்பமும் மிகும்

ஆரும் உரைசெய்ய லாம்அஞ் செழுத்தாலே
ஆரும் அறியாத ஆனந்த ரூபம்ஆம்
பாரும் விசும்பும் பகலும் மதியதில்
ஊரும் உயிரும் உணர்வது மாமே.

மண்ணும், விண்ணும் ஆகிய எல்லா இடங்களிலும்; பகலும், இரவுமாகிய எல்லாக் காலங்களிலும்; வாழுகின்ற எல்லா உயிர்களும்; அந்த உயிர்களின் உணர்வுமாக இருப்பது திருவைந்தெழுத்து. அதனால் எதை விரும்புகின்றரும் அந்த மந்திரத்தை ஓதலாம். அதை ஓதுவதால் உலகில் பிறர் அறியாத இன்பமும், இறை இன்பமும் மிகும்.

 

[Visalakshi Ramani]

12. புவனாபதிச் சக்கரம்

12. புவனாபதிச் சக்கரம் = புவனத்தின் அதிபதிக்கு உரிய சக்கரம்


#1306 to #1310

#1306. சூதனும், சூதியும்

உணர்ந்தெழு மந்திரம் ஓமெனும் உள்ளே
அணைந்தெழும் ஆங்கதன் ஆதியது ஆகும்
குணர்ந்தெழு சூதனும் சூதியும் கூடி
கணந்தெழும் காணும் அக்காமுகை யாலே

ஓம் என்னும் பிரணவம் சீவனின் உள்ளே உணர்ந்து எழும். சிவசக்தியருடன் சீவனை இணைப்பது அந்த மந்திரம்தான். உயிர்களைச் செலுத்துகின்ற சிவனும் சக்தியும் ஒன்றாகக் கூடி இணைந்து எழுந்து அருள் புரிவார்கள்.

#1307. போகமும், மோட்சமும் தரும்

ககாராதி ஓர்ஐந்தும் காணிய பொன்மை
அகாராதி ஓர் ஆ றரத்தமே போலும்
சகாராதி ஓர்நான்கும் தாம்சுத்த வெண்மை
ககாராதி மூவித்தை காமிய முத்தியே.

‘க’காரத்தை முதலில் உடைய ஐந்தெழுத்துக்களும் பொன்னிறம் உடையன;
‘அ’ காரத்தை முதலில் உடைய ஆறெழுத்துக்களும் செந்நிறம் உடையன;
‘ச’காரத்தை முதலில் உடைய நான்கெழுத்துக்களும் தூய வெண்ணிறம் உடையன.
இந்த மூன்று வித்தைகளும் `போகம், மோட்சம்` என்ற இரு பயன்களையும் தரும்.

#1308. சிவன் வடிவாகும்

ஓரில் இதுவே உறையும் இத் தெய்வத்தைத்
தேரில் பிறிதில்லை யானொன்று செப்பக்கேள்
வாரித் திரிகோணம் மாவின்ப முத்தியும்
தேரில் அறியும் சிவகாயந் தானே.

மாணவனே! நான் உனக்கு ஒன்று சொல்லுகின்றேன். நன்கு கேள். உண்மையையில் இந்தப் பதினைந்து எழுத்து மந்திரமே மந்திரங்கள் அனைத்திலும் தலையாயது. இந்த மந்திரத்திற்கு உரிய தேவியின் பெருமையை ஆராய்ந்திடில் இவளை அன்றி வேறு தெய்வம் இல்லை. இந்த மந்திரத்தைக் கொண்ட ஸ்ரீசக்கரம் என்னும் முக்கோணச் சக்கரமே பேரின்ப வீடு. இதுவே தெளிந்தவர்கள் அறிந்து கொள்ளும் சிவன் வடிவாகிய சிதாகாசம்.

#1309. சக்திக்கு எட்டு வடிவங்கள்

ஏக பராசத்தி ஈசற்காம் அங்கமே
ஆகம் பராவித்தை ஆம் முத்தி சித்தியே
ஏகம் பராசத்தி யாகச் சிவன்உரு
யோகம் பராசத்தி உண்மைஎட் டாமே.
பராசத்தி ஒன்றே. அவளே பரசிவத்தின் வடிவம். அந்தச் சத்திக்கு வடிவம், `பராவித்தை` எனப்படும் ஸ்ரீ வித்தை. அந்த ஸ்ரீ வித்தையால் முத்தி, சித்தி இரண்டும் சித்திக்கும். பராசத்தி ஒன்று என்றாலும் சிவன் அங்கியாய் நிற்கச் சத்தி அவனுக்கு அங்கமாய் நிற்பதால் சக்தி எட்டாகத் தோன்றுகின்றாள்.

#1310. பராவித்தை பராசக்தியின் வழிபாடு

எட்டாகிய சத்தி எட்டாகும் யோகத்துக்
கட்டாகும் நாதாந்தத் தெட்டும் கலப்பித்த (து)
ஒட்டாத விந்துவும் தான்அற் றொழிந்தது
கிட்டா தொழிந்தது கீழான மூடர்க்கே.

பராசத்தி வழிபாடு பராவித்தை. இது சத்தியின் பேதங்களாகிய எட்டினையும் அட்டாங்க யோகத்தின் வழியே அடையச் செய்து, முடிவில் நாதாந்தத்தில் கொண்டு சேர்க்கும். அதன் பின்னர் பரசிவத்தை அடைவதற்குத் தடையாக இருந்த விந்து நாதங்களும் அகலும். அப்போது சீவன் பரசிவத்தைக் கூடிப் பராமானந்தம் எய்தலாம். பராவித்தை வழிபாடு அறிவிலும், ஆற்றலிலும் தாழ்ந்த நிலையில் உள்ளவர்கள் செய்ய இயலாதது.

 

[Visalakshi Ramani]

#1311 to #1314

#1311. அறுகோண யந்திரம்

ஏதும் பலமாம் இயந்திரரா சன்னடி
ஓதிக் குருவின் உபதேசம் உட்கொண்டு
நீதங்கும் அங்க நியாசந் தனைப்பண்ணிச்
சாதங் கெடச் செம்பில் சட்கோணந் தான்இடே.

புவனாபதி சக்கரம் வழிபடுவோர் விரும்பும் பயனைத் தரும். இயந்திர ராசன் எனப்படும் இந்த புவனாபதி சக்கரத்தை எந்தத் துதியினாலும் துதிப்பாய். அதனை வழிபடும் முறையைக் குருவின் உபதேசத்தால் அறிவாய் . கர நியாச, அங்க நியாசங்களை இந்த வழிபாட்டிற்கு ஏற்ற முறையில் செய்வாய். பிறவிப் பிணியின் நீக்கத்தை விரும்புவாய். செப்புத் தகடு ஒன்றில் முதலில் அறுகோணச் சக்கரத்தை வரைவாய்.

#1312. அறு கோணச் சக்கரம்

சட் கோணந் தன்னில் சிரீம்இரீம் தானிட்டு
அக்கோணம் ஆறின் தலையில்இரீங் காரம்இட்
டெக்கோண முஞ்சூழ் எழில்வட்டம் இட்டுப்பின்
மிக்கீரெட் டக்கரம் அம்முதல் மேல்இடே.

வரையப்பட்ட அறுகோணச் சக்கரத்தின் அறைகளில் `ஸ்ரீம், ஹ்ரீம்` என்னும் பீசங்களைப் பொறிக்க வேண்டும். அந்தச் சக்கரத்தின் ஆறு மூலைகளின் `ஹ்ரீம்` என்னும் பீசத்தை மட்டும் எழுதவேண்டும். எல்லா மூலைகளும் உள்ளே அடங்கும்படி அவற்றைச் சுற்றி ஒரு பெரிய வட்டம் வரைய வேண்டும். அந்த வட்டத்திற்கு வெளியில் திசைக்கு ஒன்றாக எட்டுத் தாமரை இதழ்களை அமைக்க வேண்டும். அந்த இதழ்களின் கீழே, வட்டத்தில் வடக்கில் அகாரத்திலிருந்து இதழ் ஒன்றுக்கு இரண்டு, இரண்டாக உயிரெழுத்துப் பதினாறையும் முறையாக எழுத வேண்டும்.

#1313. அறுகோணச் சக்கர அமைப்பு

இட்ட இதழ்கள் இடைஅந் தரத்திலே
அட்டஹவ் விட்டிட் டதன்மேலே உவ்விட்டுக்
கிட்ட இதழ்களின் மேலே கிரோம்சிரோம்
இட்டுவா மத் (து) ஆம் கிரோம்என் மேவிடே.

சக்கரத்தைச் சூழ்ந்த வட்டத்திற்கு வெளியில் உள்ள இதழ்களின் இடைநிலம் எட்டிலும் எட்டு ஹகார மெய்யை உகார உயிர் புணர்த்து எழுதி, அவ் இதழ்கள் எட்டிலும் பொருந்தி நிற்க, `க்ரோம், ஹ்ரோம்` என்பவற்றைப் பொறித்து, இதழ்களின் இடப்பக்கங்களில் `ஆம், க்ரோம், என்னும் பீசங்களை எழுதுக.

#1314. புவனாதிபதியை பூசிப்பாய்

மேவிய சக்கர மீது வலத்திலே
கோவை யுடைய குரோம்சிரோம் என்றிட்டுத்
தாவில் இரீங்காரத் தால்சக் கரஞ்சூழ்ந்து
பூவை புவனா பதியைப்பின் பூசியே.

பொருந்திய சக்கரத்தின் வெளியே உள்ள இதழ்களின் வலப்பக்கங்களில் எங்கும் வரிசையாக, `க்ரோம், ஹ்ரோம்` என்பவற்றை எழுதி, எல்லாவற்றையும் கேடில்லாத ரீங்காரத்தால் வளைத்து முடித்தபின், புவனாபதியாகிய அம்மையை வழிபடு.

 

[Visalakshi Ramani]

#1315 to #1318

#1315. வழிபடும் முறை

பூசிக்கும் போது புவனா பதிதன்னை
ஆசற் றகத்தினில் ஆவா கனம்பண்ணிப்
பேசிப் பிராணப்பிர திட்டை யதுசெய்து
தேசுற் றிடவே தியான மதுசெய்யே.

புவனாபதி அம்மையை வழிபடும் விதம்:

முதலில் மனத்தில் உள்ள காமம் ஆதி குற்றங்களை நீக்கித் தூய்மையுடையதாகப் பண்ணவேண்டும். அகத்தில் அம்மையின் உருவத்தை நினைவு கூர வேண்டும். வெளியில் கும்பம், பிம்பம், சக்கரம் இவற்றில் அவற்றுக்கு உரிய மந்திரங்களால் ஆவாகனம், தாபனம், சந்நிதானம், சந்நிரோதனம் என்பவற்றைச் செய்ய வேண்டும். எல்லா உபசாரங்களையும் செய்து முடித்த பின் ஒளிமிக்க அம்மையின் வடிவம் மனத்திலே நன்கு பொருந்தும்படி அவளை நன்கு தியானிக்க வேண்டும்.

#1316. அம்மையின் வடிவம்

செய்ய திருமேனி செம்பட் டுடைதானும்
கையில் படைஅங் குசபாசத் தோடபயம்
மெய்யில் அணிகலன் ரத்தின மாம்மேனி
துய்ய முடியும் அவயவத் தோற்றமே.

புவனாபதி அம்மையின் வடிவம்:

அவள் நிறம் செம்மை; அணியும் உடை செம்பட்டு; இரு கரங்களில் ஏந்துபவை அங்குசம், பாசம்; இரு கரங்கள் அளிப்பது அபய வரதம்; மற்றும் அங்கங்களுக்கு ஏற்ற அழகிய அணிகலன்கள், தலையில் இரத்தின கிரீடம்.

#1317. பால் அடிசில் நிவேதனம்

தோற்போர்வை நீக்கித் துதித்தடைவில் பூசித்துப்
பாற்போ னகம்மந் திரத்தால் பயின்றேத்தி
நாற்பால “நாரதாயா சுவாகா` என்று
சீர்ப்பாகச் சேடத்தை மாற்றியபின் சேவியே.

புவனாபதிக்கு வழிபாடு செய்யும் பொழுது, மேலாடையை எடுத்து அரையில் கச்சு போலக் கட்டிக் கொள்ள வேண்டும். நிவேதனம் பால் அடிசில். நிவேதிக்கும் மந்திரம் “ஓம் நாரதாயா சுவாஹா:” இந்த மந்திரத்தால் நான்கு திசைகளிலும் நிவேதனம் செய்தல் வேண்டும். வழிபாடு முடிந்த பின்பு பாரங்முக அர்க்கியத்தால் அம்மையை முகம் மாற்றிய பின்பே நிர்மாலிய நிவேதனத்தைக் கைக்கொள்ளல் வேண்டும்.

#1318. விரும்பியது கிடைக்கும்
சேவிப் பதன்முன்னே தேவியைஉத் வாபனத்தால்
பாவித் திதய கமலம் பதிவித்தங்
கியாவர்க்கு மெட்டா இயந்திர ராசனை
நீவைத்துச் சேமி நினைந்த தருமே.

நிவேதனப் பொருளைக் கைக் கொள்வதற்கு முன்னர், கும்ப விம்ப சக்கரங்களில் நிறுவப்பட்ட தேவியை உரிய மந்திரம், கிரியை, பாவனைகளால் தன் இருதயத்தில் ஒடுக்க வேண்டும். யாவர்க்கும் அணுகுதற்கு அரிய மேலான சக்கரத்தை நீ உள்ளத்திலே மறவாது வைத்தால் பின்பு இது நீ விரும்புகின்ற எல்லாம் உனக்குக் கொடுக்கும்.

 

[Visalakshi Ramani]

Oh boy! Am I happy I just completed the Aaraam Thanthiram of Thirumanthiram

- in an effort to make up for the time wasted in unavoidable travels!!

https://araamthanthiram.wordpress.com/

Regular posts will be made a little later!

 

[Visalakshi Ramani]

13. நவாக்கரி சக்கரம்

#1319. ஒன்பது X ஒன்பது எழுத்துக்கள்

நவாக்கரி சக்கரம் நான்உரை செய்யின்
நவாக்கரி ஒன்று நவாக் கரியாக
நவாக்கரி எண்பத் தொருவகை யாக
நவாக்கரி அக்கிலீம் சௌம்முதல் ஈறே.

நவாக்கரி சக்கரத்தின் இயல்பை நான் உனக்குச் சொல்லுவேன்.
ஒன்பது எழுத்துத் தொகுதியில் ஒவ்வொன்றும் ஒன்பது எழுத்தாகின்ற முறையால், ஒன்பது ஒன்பது எழுத்துக்கள், எண்பத்தோரெழுத்து என்னும்படி நிற்கும். அந்தத் தொகுதி `ஸௌம்` என்று தொடங்கி, `க்லீம்` என்று முடியும்.

#1320. நவாக்கரியின் உரு

சௌம்முதல் அவ்வொடும் ஔவுடன் ஆம்கிரீம்
கௌவுமும் ஐமும் கலந்திரீம் சிரீம்என்
றொவ்வில் எழும்கிலீம் மந்திர பாதமாச்
செவ்வுள் எழுந்து சிவாயநம என்னவே.

The Nine Mantras: 1) Srim 2) Hrim 3) Aim 4) Gaum 5) Krim 6) Haum 7) Aum 8) Saum 9) Klim
ஒவ்வொரு முறையும் முடிவில் `சிவாய நம` என்று சொன்னால் நவாக்கரி சக்கர வழிபாடு கைவரும்.

#1321. நலம் தருவாள்

நவாக் கரியாவதும் நானறி வித்தை
நவாக் கரியுள்எழும் நன்மைகள் எல்லாம்
நவாக் கரிமந்திரம் நாவுளே ஓத
நவாக் கரிசத்தி நலந்தருந் தானே.

நவாக்கரி சக்கர வழிபாடு நான் அறிந்த சிறந்த வழிபாடாம். அதனால் நலங்கள் விளையும். நவாக்கரி மந்திரத்தை நாம் உருச் செய்தால் அந்த மந்திரத்திற்குரிய சத்திதேவி நமக்கு எல்லா நன்மைகளையும் தருவாள்.

#1322. தீவினைகள் ஓடி விடும்

நலந்தரு ஞானமும் கல்வியும் எல்லாம்
உரந்தரு வல்வினை உம்மைவிட் டோடிச்
சிரந்தரு தீவினை செய்வ தகற்றி
வரந்தரு சோதியும் வாய்த்திடுங் காணே.

நவாக்கரி சக்கர வழிபாடு பெரும் நன்மை புரியும் அனுபவ ஞானம் தரும். அதற்கு ஏதுவாகிய கலா ஞானம் வலியுறும். உம் வல்வினைகள் உம்மை விட்டு ஓடிவிடும். இந்த வழிபாட்டினால், வேண்டுபவர் வேண்டுவதைத் தருகின்ற சிவனது திருவருள் கைக்கூடும். அது உமக்குத் துன்பத்தைத் தரவிருந்த தீய வினைகளை ஓட்டி விடும்.

 

[Visalakshi Ramani]

#1323. நினைத்த மாத்திரத்தில் பயன்கள்

கண்டிடும் சக்கரம் வெள்ளிபொன் செம்பிடை
கொண்டிடும் உள்ளே குறித்த வினைகளை
வென்றிடும் மண்டலம் வெற்றி தருவிக்கும்
நின்றிடும் சக்கரம் நினைக்கு மளவே.

நவாக்கரி சக்கரத்தை வெள்ளி அல்லது பொன் அல்லது செம்புத் தகட்டிலே அமையுங்கள். பின்பு மனத்தில் அதை ஊன்றி நினையுங்கள். உள்ளத்தில் நிலை பெறுகின்ற அந்தச் சக்கரம் உம்மை நோக்கி வருகின்ற வினைகளை நீங்கள் வெல்ல உதவும். உம்மால் உலகத்தை வெற்றி கொள்ள இயலும். அது நினைத்த அளவிலே நினைத்த பயன்களைத் தரும்.

#1324. தேவிக்கு உகந்த அர்ச்சனை

நினைத்திடும் அச்சிரீம் அக்கிலீம் ஈறா
நினைத்திடும் சக்கரம் ஆதியும் அந்தமும்
நினைத்திடும் நெல்லொடு புல்லினை உள்ளே
நினைத்தி (டு) அருச்சனை நேர்தரு வாளே.

நினைக்கத் தகுந்த ‘க்லீம்’ என்பதை ஈறாக உடைய நவாக்கரங்களை, நினைக்கின்ற சக்கரத்தின் முதலெழுத்து முதல் ஈற்றெழுத்து முடிய, இந்தச் சக்கரத்தின் சக்தி விரும்புகின்ற செந்நெல், அறுகம்புல் என்பவற்றைக் கொண்டு அருச்சனை செய்தால் அந்த அருச்சனையை அந்த சக்தி ஏற்றுக்கொள்வாள்.

#1325. எண்ணிய எண்ணியாங்கு எய்தலாம்

நேர்தரு மந்திர நாயகி யானவள்
யாதொரு வண்ணம்? அறிந்திடு பொற்பூவை
கார்தரு வண்ணம் கருதின கைவரும்
நார்தரு வண்ணம் நடந்திடு நீயே.

வழிபடுபவருக்கு நேரே வந்து அருள் புரிகின்ற அந்தச் சக்கரத்தின் சக்தி என்ன நிறத்தை உடையவள்? அழகிய தேவியாகிய அவள் மேகம் போன்ற நிறத்தை உடையவள். இதனை அறிந்து கொண்டு அவளிடம் மாறாத அன்பு செலுத்து. அப்பொழுது நீ எண்ணியவற்றை எண்ணியவாறு எய்தலாம்.

 

[Visalakshi Ramani]

Will it be easier to enter heaven than to enter the Forum? :decision:

It has taken me all day since noon - just to get in and post this!

 

[Visalakshi Ramani]

#1326 to #1330

#1326. பராசக்தி பொருந்திட நடந்து கொள்!

நடந்திடும் பாரினில் நன்மைகள் எல்லாம்
கடந்திடும் காலனும் எண்ணிய நாளும்
படர்ந்திடும் நாமமும் பாய்கதிர் போல
அடைந்திடும் வண்ணம் அடைந்திடு நீயே.

உலகில் எல்லா நன்மைகளும் கிடைக்கும். காலன் விதித்த வாழ்நாட்கள் கடந்திடும். பரவிச் செல்லும். கதிரவன் கதிர்கள் போல உன் புகழ் புகழ் நாற்றிசையும் பரவிச் செல்லும். இவை அனைத்தும் நிகழப் பராசக்தி உன்னிடம் வந்து பொருந்தும் வண்ணம் நீ நடந்து கொள்ள வேண்டும்.

#1326. பராசக்தி பொருந்திட நடந்து கொள்!

அடைந்திடு பொன் வெள்ளி கல்லுடன் எல்லாம்
அடைந்திடும் ஆதி அருளும் திருவும்
அடைந்திடும் அண்டத்து அமரர்கள் வாழ்வும்
அடைந்திடும் வண்ணம் அறிந்திடு நீயே.

பொன்னும், வெள்ளியும், மணியும் உன்னிடம் தாமே வந்து சேரும். பராசக்தியின் அருளும், ஞானமும் தாமே கைவரும். அமரர்களின் வாழ்வினை நீ அடையலாம். இதற்கு அந்தப் பராசக்தியை அடையும் வழியை முதலில் நீ அறிந்து கொள்ள வேண்டும்.

#1328. சிவனை அடைய முயற்சி செய்

அறிந்திவார்கள் அமரர்களாகத்
தெரிந்திடு வானோர் தேவர்கள் தேவன்
பரிந்திடும் வானவன் பாய் புனல் சூடி
முறிந்திடு வானை முயன்றிடு நீரே

அமர வாழ்வு பெறுவதற்காக மக்கள் நவாக்கரியை அறிந்து கொள்கின்றார்கள். தன்னைத் தெரிந்து கொண்ட தன் அன்பர்களுக்குத் தேவர்களின் தேவன் சிவபெருமான் பரிந்து வந்து அருள்வான். பாய்ந்து வந்த கங்கையின் பொங்கும் நீரைத் தன் புரிசடையால் முறித்த அந்தச் சிவபெருமானை அடைவதற்கு நீ முயற்சி செய்வாய்.

#1329. மேக மண்டலத்தில் காணலாம்

நீர்பணி சக்கரம் நேர்தரு வண்ணங்கள்
பாரணி யும்’ஹ்ரீம்’ முன் ‘ஸ்ரீம்’ ஈறாகத்
தார்அணி யும்புகழ்த் தையல்நல் லாள்தன்னைக்
கார்அணி யும்பொழில் கண்டு கொள்ளீரே.

நீங்கள் வணங்கும் இந்த நவாக்கரிச் சக்கரத்தில் பொருந்தியுள்ளன பாரோர் பணியும் ‘ஹ்ரீம்’ முதல் ‘ஸ்ரீம்’ ஈறாக ஒன்பது எழுத்துக்கள். இதனை நீங்கள் நன்கு வழி பட்டால், தார் அணிந்த, புகழ் மிகுந்த, தையல் நல்லாளைக் கார்மேகம் போன்ற மண்டலத்தில் உங்களால் காண முடியும்.

சரியான உச்சரிப்பு இதோ!

(1). Hrim, (2). Aim, (3). Gaum, (4). Krim, (5). Haum, (6). Aum, (7). Saum, (8). Klim, (9). Srim.

#1330. முகம் வசீகரம் அடையும்

கண்டு கொள்ளுந் தனிநாயகி தன்னையும்
மொண்டு கொளும் முக வசியம தாயிடும்
பண்டு கொளும் பரமாய பரஞ்சுடர்
நின்று கொளுந் நிலை பேறுடையாளையே.

தனக்கு ஒப்பாரும், மிக்காரும் இல்லாத அந்தத் தனிநாயகி சக்தி தேவியைக் கண்டு
கொண்டால், அள்ளி அருந்தும் வண்ணம் அழகிய முகப் பொலிவு உண்டாகும். மேன்மை பொருந்திய பரமசிவன் மஞ்சமாக இருந்து தாங்குகின்ற பேறு பெற்ற சக்தி தேவியை நிலையாக உங்கள் உள்ளத்தே கொள்ளுங்கள்.

 

[Visalakshi Ramani]

#1331 to #1335

#1331. மன்னன் வசமாகிப் பகை அழியும்

பேறுஉடை யாள் தன் பெருமையை எண்ணிடல்
நாடுஉடை யார்களும் நம்வசம் ஆகுவர்,
மாறுஉடை யார்களும் வாழ்வது தான் இலை;
கூறுஉடை யாளையும் கூறுமின் நீரே.

நீங்கள் அடையும் பேற்றினால் நாட்டை ஆளும் மன்னன் உங்கள் வசமாவான். உங்கள் பகைவர் அழிவர். ஆகையால் தன் உடலின் ஒரு பாதியில் இறைவனைக் கொண்டுள்ள அந்தச் சக்தி தேவியைத் இடையறாது துதியுங்கள்.

#1332. பிறவிப் பிணி அறுப்பீர்

கூறுமின் எட்டு சைதலைவியை,
ஆறுமின் அண்டத்து அமரர்கள் வாழ்வுஎன,
மாறுமின் வையம் வரும்வழி தன்னையும்,
தேறுமின் நாயகி சேவடி சேர்ந்தே.

எட்டு திசைகளுக்கும் தலைவியாகிய சக்திதேவியை வழிபடுங்கள். அமரர்களின்
வாழ்வை பெறக் கொண்ட அவாவினை மாற்றி விடுங்கள். மீண்டும் மீண்டும் பிறந்து இந்த பூமிக்குத் திரும்பும் வழியினை அகற்றி விடுங்கள். நாயகியின் சேவடிகளைச் சேர்ந்து பிறவியில் முன்னேற்றமடையுங்கள்.

#1333. திருவடிகளைக் காணுவர்.

சேவடி சேரச் செறிய இருந்தவர்
நாவடி யுள்ளே நவின்று நின்றேத்துவர்
பூவடியிட்டுப் பொலிய இருந்தவர்
மாவடி காணும் வகையறி வாரே.

சக்திதேவியின் திருவடிகளை இடையறாது நினைவில் கொள்ளுபவர்கள் அவள் திருநாமத்தை நாவசையாமல் மௌனமாக மனதில் செபம் செய்வர். அங்ஙனம் தங்கள் பார்வையும் அகத்துள்ளே செலுத்தி இருப்பவர்கள் அவள் பெருமை வாய்ந்த திருவடிகளைக் காணும் பேறு பெறுவார்.

#1334. நவாக்கரியின் பீச மந்திரம்

ஐம் முதலாக வளர்ந்து எழு சக்கரம்
‘ஐம்’ முதலாக அமர்ந்து, ‘இரீம்’ ஈறாகும்;
ஐ முதலாகிய யவர்க்கு உடையாள் தனை
‘ஐம்’ முதலாக வழுத்திடு நீயே.

‘ஐம்’ முதலாக வளர்ந்து தோன்றும் இந்தச் சக்கரம். ஐம் முதலாகப் பிற பீசங்களுடன் இறுதியில் ‘ஹ்ரீம்’ என்ற பீசம் வரும். அகர எழுத்தின் பொருளாகிய சிவனுக்கு உரிய சக்தி தேவியை மாயைக்கு முதல்வியாகப் போற்றுவாய் நீ!

#1335. வாகீஸ்வரி தோன்றுவாள்
வழுத்திடும் நாவுக்கரசு இவள் தன்னைப்
பகுத்திடும் வேதம் மெய் ஆகமம் எல்லாம்
தொகுத்து ஒரு நாவிடை சொல்ல வல்லாளை
முகத்துளும் முன் எழக் கண்டு கொளீரே.

வாகீஸ்வரியாகிய சக்தி தேவியை, வேதங்களும் ஆகமங்களும் போற்றிப் புகழ்ந்திடும். அந்த வேதங்களையும், ஆகமங்களையும் நாம் பயின்றிட வாகீஸ்வரியின் அருள் மிகவும் அவசியம். அவளைத் துதித்து அவளை நாம் முகத்தின் உள்ள அண்ணாக்குக்கு முன்னே எழச் செய்ய இயலும்.

 

[Visalakshi Ramani]

#1336 to #1340

#1336. எல்லாம் அறியும் அறிவு தரும்

கண்ட இச்சக்கரம் நாவில் எழுதிடில்
கொண்ட இம் மந்திரம் கூத்தன் குறியதாம்;
மன்றினுள் வித்தையும் மானுடர் கையதாய்
வென்றிடும் வையகம் மெல்லியல் மேவியே.

இந்தச் சக்கரத்தை ஒருவர் நாவில் எழுதினால் அது கூத்த பிரானின் வடிவமாகிவிடும். பொன்மன்றில் விளங்கும் உயரிய சபாவித்தையும் கைகூடும். மெல்லியல் நங்கையாகிய நவாக்கரியின் அருள் இருந்தால் ஒருவர் உலகையே வெல்ல இயலும்.

#1337. நல்லியல்பாகிய நாட்களை நல்கும்

மெல்லியல் ஆகிய மெய்ப்பொருளாள் தன்னைச்
சொல்இயலாலே தொடர்ந்து அங்கு இருந்திடும்
பல்லியல் ஆகப் பரந்துஎழு நாள் பல
நல்லியல் பாலே நடந்திடும் தானே.

மெல்லியல் ஆகிய அந்த மெய்ப்பொருள் சக்தி தேவியைக் குருவின் உபதேசத்தின்படி நீங்கள் இடையறாது தியானம் செய்யுங்கள். இன்பமும், துன்பமும் கலந்த மனித வாழ்வு அப்போது துன்பம் அற்ற, இன்பம் உற்ற வாழ்வாக மாறிவிடும்.

#1338. சொல்லும் வண்ணம் செயல்கள் நிகழும்

நடந்திடும் நாவினுள் நன்மைகள் எல்லாம்
தொடர்ந்திடும் சொல்லொடு சொற்பொருள் தானும்
கடந்திடும் கல்விக்கு அரசு இவனாகப்
படர்ந்திடும் பாரில் பகை இல்லை தானே.

நல்ல செயல்கள் பல இவன் நாவால் கூறிய வண்ணம் நிகழும். இவன் செப்பியவாறே செயல்களின் பயன்களும் விளையும். கல்வியின் அரசி இவன் நாவில் குடி இருப்பாள். எனவே இவனும் நாவரசனாகத் திகழ்ந்திடுவான். பரந்து விரிந்த இந்த உலகில் இவனுக்கு பகைவர் என்று எவரும் இரார்.

#1339. வந்து வணங்கி நிற்கும்

பகை இல்லை ‘கௌ’ முதல் ‘ஐ’ ஈறா
நகை இல்லை சக்கர நன்று அறிவார்க்கு
மிகை இல்லை சொல்லிய பல் உரு எல்லாம்
வகை இல்லை ஆக வணங்கிடும் தானே.

பகையைக் கெடுக்கும் ‘கௌம்’ முதல் ‘ஐம்’ இறுதியாய் உள்ள இந்தச் சக்கரத்தை நன்கு அறிந்த ஒருவனை, எவரும் இகழ்ந்து பேச மாட்டார். பல வேறுபட்ட வடிவங்களாக இருப்பவை எல்லாம் இவருக்கு மாறுபட்டவை அல்ல. அவை வேறு வழியின்றி வந்து இவரை வணங்கி நிற்கும்.

#1340. எண்ணிய எண்ணிய வண்ணம் எய்துவர்

வணங்கிடுந் தத்துவ நாயகி தன்னை
நலங்கிடு நல்லுயிரானவை யெல்லாம்
கலங்கிடும் காம வெகுளி மயக்கம்
துலங்கிடும் சொல்லிய சூழ்வினை தானே.

இந்தத் தத்துவ நாயகியை எல்லோரும் வணங்கி நிற்பர். நல்ல சீவன்கள் எல்லாம் அவளுடன் நன்கு பொருந்தி நிற்கும். அவர்களைக் கலங்கச் செய்யும் காமம், வெகுளி, மயக்கம் என்னும் மூன்று குற்றங்களும் அகன்று விடும். அவர்கள் எண்ணியவற்றை எண்ணிய வண்ணம் எய்துவர்.

 

[Lalit]

Oh boy! Am I happy I just completed the Aaraam Thanthiram of Thirumanthiram

- in an effort to make up for the time wasted in unavoidable travels!!

https://araamthanthiram.wordpress.com/

Regular posts will be made a little later!

Congrats Madam! You are doing extra-ordinarily commendable work for all Tamil loving/knowing people! Even small doses of reading your works acts as energy booster. Thanks a zillion for all the good works you are engaged in, which may be benefiting many of us.

May the Divine shower His choicest blessings ever more on you and yours!

Lalitha

 

[Visalakshi Ramani]

Congrats Madam! You are doing extra-ordinarily commendable work for all Tamil loving/knowing people! Even small doses of reading your works acts as energy booster. Thanks a zillion for all the good works you are engaged in, which may be benefiting many of us.

May the Divine shower His choicest blessings ever more on you and yours!

Lalitha

Oh boy! Am I glad to see a friend in my thread and hear her comment!
Thank dear Lalitha for you kind words and best wishes. ray2:

Today I finished all my chores very early and planned to spend extra time

in typing the Ezhaam Thanthiram of Thirumanthiram.

But I could settle down with my P.C only now.

It is true that man proposes and God disposes.

I am in the middle of a minor crisis which has thrown pout of gear all our travel plans to USA.

So the silver lining is that I will get three months' time before the travel plan might get Okay.

So I decided to complete the remaining 1350 poems @ the rate of 15 per day.

It is easier said than done. One day was wasted since we did not have Internet.

On the second day I could really complete 15 poems as my plan.

On the third day I got burnt out by the time I complete ten poems.

Typing a poem and its explanation takes ~ 15 to 18 minutes!

So 10 poems dealt with continuously may take anything up to 3 hours!

Today I am not sure what will be my score!

But without a plan and a deadline we can't get anything done at all!

I guess I must pray not only to Lord Ganesa and Devi Saraswati but also to Thirumoolar

to help me enter into his mind through his writings and understand well his philosophy!

 

[Visalakshi Ramani]

BUT there is one thing which I can never figure out!

NOT one out of the 300+ people reading this thread daily,

think of visit this blog in WordPress.com even once!

 

[Visalakshi Ramani]

#1341. நினைத்ததைப் பேசுவான்

தானே கழறித் தணியவும் வல்லனாய்,
தானே நினைத்தவை சொல்லவும் வல்லனாய்த்
தானே தனி நடம் கண்டவள் தன்னையும்
தானே வணங்கித் தலைவனும் ஆமே.

மேற்குறிய மனிதன் தானே தனக்கு மேலே எவரும் இல்லாத வண்ணம் பேசுவான். தானே எண்ணியவற்றை எல்லாம் ஒளிக்காமல் பேசுவான். தானே ஊழிக் காலத்தில் சிவபெருமானின் சங்காரத் தாண்டவம் காண்பான். தானே வணங்கித் தலைவனும் ஆவான்.

#1342. தீ வினைகள் போகும் புண்ணியம் வரும்

ஆமே யனைத்துயி ராகிய அம்மையும்
தாமே சகலம் ஈன்றவத் தையலும்
ஆமே யவளடி போற்றி வணங்கினால்
போம் வினைகளும் புண்ணிய னாகுமே.

சக்தியே அனைத்து உயிர்களாகவும் தோன்றி உள்ளாள். அனைத்து உயிர்களின் அன்னையும் அவளே ஆவாள். அவள் திருவடிகளைப் போற்றிப் பணிந்தால் நம் தீ வினைகள் அகன்று செல்லும். புண்ணியம் வந்து சேரும்.

#1343. அவனியில் இனியவன் ஆவான்

புண்ணியன் ஆகிப் பொருந்தி உலகெங்கும்
கண்ணியன் ஆகிக் கலந்து அங்கு இருந்திடும்
தண்ணியன் ஆகித், தரணி முழுதுக்கும்
அண்ணியன் ஆகி அமர்ந்திருந் தானே.

புண்ணியன் ஆனவன் உலகம் முழுவதும் பொருந்தும் ஒரு கண்ணியன் ஆவான். அனைவருடன் கலந்து சிறந்து விளங்குவான். அவன் அனைத்துயிர்களின் மீதும் தண்ணருள் கொண்டிருப்பான் . அவனியில் அனைவருக்கும் அவன் மிகவும் இனியவனாக இருப்பான்.

#1344. வையம் கிளர் ஒளியாவாள்

தான் அது கிரீம் ‘கௌ’ – அது ஈறாம்
நான் அது சக்கரம், நன்று அறிவார்க்கு எல்லாம்
கான் அது கன்னி கலந்த பராசத்தி
கேள் அது வையம் கிளர் ஒளியானதே.

நவாக்கரிச் சக்கரத்தின் பீசம் ‘கிரீம்’ முதல் ‘கௌம்’ வரை ஆகும். “அது நானாக உள்ள சக்கரம்” என்ற உண்மையை நன்கு அறிந்தவர்களுக்கு; அஞ்ஞானம் என்கின்ற வனத்தில் இருள் மயமாக இருந்து வந்த த சக்தி தேவி அழியாத உறவாக ஆகிவிடுவாள். அவள் அறிவு நிலையில் ஒளியாகி எல்லா உயிர்களிடமும் பொலிவாள்.

#1345. அறிந்து கொண்டவர் அருள் பெறுவர்

ஒளிக்கும் பராசக்தி உள்ளே அமரில்
களிக்கும் இச்சிந்தையில் காரணம் காட்டித்
தெளிக்கும் மழையுடன் செல்வம் உண்டாக்கும்
அளிக்கும் இவளை அறிந்து கொள்வார்க்கே.

ஒளிரும் பராசக்தி உள்ளத்தில் ஒருவரின் எழுந்தருளினால், அவர் மனம் களிக்கும் வண்ணம் உண்மைப் பொருள் அவருக்கு நன்கு விளங்கும். நல்ல தெளிவு பிறக்கும். அருள் மழை பொருட் செல்வதை உண்டாக்கும். இவளை நன்கு அறிந்து கொண்டவருக்கு இவை அனைத்தும் நிகழும்.

 

[Visalakshi Ramani]

#1346 to #1350

#1346. வழிபாடு தரும் நன்மைகள்

அறிந்திடும் சக்கரம் அர்ச்சனையோடே
எறிந்திடும் வையத்து இடர் அவை காணின்;
மறிந்திடும் மன்னனும் வந்தனை செய்யும்
பொறிந்திடும் சிந்தை புகையில்லை தானே.

நவாக்கரிச் சக்கரத்தைப் பூசித்து இவற்றை நீ அறிந்து கொள்ளலாம். அதனால் உன்னுடைய உலகத் துன்பம் விலகும். அது உன் பகைவர்களைத் தடுத்து நிறுத்தும். மன்னனும் தேடி வந்து உன்னை வணங்குமாறு செய்யும். சிந்தையைக் கலக்கும் துன்பங்கள் உனக்கு நேரா.

#1347. பகை, புகை, சினம் வாரா

புகையில்லை சொல்லிய பொன்னொளி யுண்டாம்
குகையில்லை கொல்வ திலாமையி னாலே
வகையில்லை வாழ்கின்ற மன்னுயிர்க் கெல்லாம்
சிகையில்லை சக்கரம் சேர்ந்தவர் தாமே.

நவாக்கரிச் சக்கர வழிபாடு செய்பவர்களுக்கு மனவருத்தம் ஏற்படாது. அவர்களின் உடல் பொன் போன்ற ஒளி பெறும். அவர்கள் பிற உயிர்களை கொல்லாதவர்கள். ஆதலால் மீண்டும் கர்ப்ப வாசம் என்னும் குகை அவர்களுக்கு இல்லை. வாழ விரும்பும் உயிர்களுக்கு இதைவிடச் சிறந்த வகை வேறு ஒன்றும் இல்லை. அவர்களுக்கு முடிவும் என்பதும் இல்லை.

#1348. ஞான ஒளி படரும்

சேர்ந்தவர் என்றும் திசை ஒளி ஆனவர்
காய்ந்தெழும் மேல்வினை காண்கிலாதவர்
பாய்ந்தெழும் உள்ளொளி பாரினில் பரந்தது
மாய்ந்தது காரிருள் மாறு ஒளி தானே.

நவாக்கரிச் சக்கரத்தைத் தியானித்தவர் சிறந்த ஒளியுடல் பெறுவார். காய்ந்து எழுகின்ற தீ வினைப் பயன்களை இவர் அனுபவிக்க மாட்டார். இவர் உடலில் எழும் உள்ளொளி அவர் இருக்கும் இடத்தில் படர்ந்து செல்லும். அங்கு நிலவிய அஞ்ஞானம் மறைந்து விடும். ஞானமயமாக ஆகிவிடுவார் அங்கு உள்ள மனிதர்கள் எல்லோருமே.

#1349. தெளிவடையும் ஞானமும் சிந்தையும்!

ஒளியது ஹௌமுன் கிரிமது ஈறாம்
களியது சக்கரம் கண்டறி வார்க்குத்
தெளிவது ஞானமும் சிந்தையும் தேறப்
பணியது பஞ்சாக் கரமது வாமே.

‘ஹௌம்’ என்ற பீசம் முதல் ‘கிரீம்’ என்னும் பீசம் இறுதியாக உள்ள, மகிழ்ச்சி தரவல்ல, நவாக்கரிச் சக்கரத்தை நன்கு கண்டு அறிந்து கொண்டவர்களுக்குத் தெளிந்த சிந்தையும் ஞானமும் உண்டாகும். சிவபெருமானின் பஞ்சாக்கரத்துடன் கூடிய நவாக்கரியை அவர்கள் வணங்கி வழிபடுகின்றார்கள் அல்லவா?

#1350. அறிவும் ஆற்றலும் அடைவர்

ஆமே சதாசிவ நாயகி ஆனவள்;
ஆமே அதோமுகத்து உள்அறிவு ஆனவள்;
ஆமே சுவை ஒளி ஊறு ஓசை கண்டவள்;
ஆமே அனைத்துயிர் தன்னுளும் ஆமே.

இவளே சதாசிவ மூர்த்தியின் அருள்சக்தி ஆனவள். இவளே கீழ் நோக்கில் இருந்து கொண்டு அனைத்து உயிர்களையும் செயல் புரியும்படிச் செலுத்துபவள். சுவை, ஒளி, ஊறு, ஓசை இவற்றை உணர உதவிடும் அறிவு வடிவானவள் இவளே. அருவ நிலையில் உள்ளபோது அனைத்து படைப்பினையும் தனக்குள் அடக்கிக் கொள்பவள் இவளே.

 

[Visalakshi Ramani]

#1351 to #1355

#1351. எங்கும் எதிலும் நிறைந்தவள்

தன்னுளும் ஆகித் தரணி முழுதும் கொண்டு
என்னுளும் ஆகி இடம் பெற நின்றவள்
மண்ணுளும், நீர், அனல், காலுளும் வானுளும்
கண்ணுளும் மெய்யுளும் காணலும் ஆமே.

எல்லா உலகங்களையும் தன்னுள் கொண்ட ஈசன் வடிவில் அவள் என்னுள் இடம் பெற்று நின்றாள். அந்த தேவியை நாம் மண்ணிலும், நீரிலும், ஒளியிலும், காற்றிலும், விண்ணிலும், கண்ணின் கருமணியிலும், உடலிலும் காண இயலும்.

#1352. கருத்துற நிற்கவேண்டும்

காணலு மாகும் கலந்துயிர் செய்வன
காணலு மாகும் கருத்துள் இருந்திடின்
காணலு மாகும் கலந்து வழிசெயக்
காணலு மாகும் கருத்துற நில்லே.

உயிருடன் கலந்து நிற்கும் சக்தி அந்த உயிர்களுக்குச் செய்யும் நன்மைகளைக் காண இயலும். அவளைக் காண வேண்டும் என்பதில் ஒரே குறியாக இருப்பவர்கள் சீவ பேதம் அழிந்து அவளைக் காணவும் இயலும். உயிருடன் கலந்து நிற்கும் அவளை முன்னிட்டுக் கொண்டு சீவன்கள் செயல் படுவதையும் காண முடியும். இவை அனைத்தும் நிகழ்ந்திட நீ அவளுடன் பிரியாத வண்ணம் உன் கருத்தைப் பொருத்தி இருப்பாய்.

#1353. மெய்ப் பொருள் ஆகிவிடுவர்

நின்றிடும் ஏழு புவனமும் ஒன்றாகக்
கண்டிடும் உள்ளம் கலந்து எங்கும் தானாகக்
கொண்டிடும் வையம் குணம் பல தன்னையும்
விண்டிடும் வல்வினை மெய்ப்பொருள் ஆகுமே.

இந்தப் பயிற்சியாளருக்கு ஏழு உலகங்களும் ஒன்றாகத் தோன்றும். எல்லாப் பொருட்களிலும் அவர் தன்னையே காண்பார். உலகில் நிலவும் எல்லா இயல்புகளையும் உள்ளவற்றை உள்ளவாறு அவர் அறிவார். செய்த வல்வினைப் பயன்கள் வந்து எய்தாத வண்ணம் விலக்கும் மெய்ப் பொருளாகி விடுவார்.

#1354. நற்பொருளாகி நடுவில் இருப்பாள்

மெய்ப்பொருள் ‘ஔ’ முதல் ‘ஹௌ ‘ அது ஈறாகக்
கைப்பொருளாகக் கலந்து எழு சக்கரம்
தற்பொருளாகச் சமைந்து அமுதேசுவரி
நற்பொருளாக நடு இருந்தாளே.

மெய்ப் பொருளான ‘ஔம் ‘ முதல் ‘ஹௌம் ‘ ஈறாக உள்ள எழுத்துக்கள் விளங்கும் இந்த நவாக்கரிச் சக்கரத்தில் சிவன் விளங்குவான். அவனுடன் நன்மைகள் புரியும் அமுதேசுவரியும் நடுவில் விளங்குவாள்.

#1355. காயம் அது அழியாது

தாள்அதின் உள்ளே சமைந்த அமுதேசுவரி
கால்அது கொண்டு கருத்து உற வீசிடில்
நாள்அது நாளும் புதுமைகள் கண்டபின்
கேள்அது காயமும் கேடுஇல்லை காணுமே.

உடலில் மூலாதாரம் முதல் பிரரந்திரம் வரை பேரொளியாக விளங்கும் அமுத சுவரியுடன், மூலாதாரத்தில் இருக்கும் மூல வாயுவை மேலே கொண்டு வந்து பொருந்தச் செய்ய வேண்டும். அப்போது நாள் தோறும் புதுமைகளைக் காணலாம். அத்துடன் அந்தப் பயிற்சியாளனின் உடலுக்குக் கேடு எதுவும் விளையாது. காயம் அழியாது.

 

[Visalakshi Ramani]

#1356 to #1360

#1356. அருள் வரும் வழி காண்பீர்

கேடு இல்லை காணும் கிளர்ஒளி கண்டபின்,
நாடு இல்லை காணும் அந்நாள் முதல் அற்றபின்,
மாடு இல்லை காணும் வரும் வழி கண்டபின்,
காடு இல்லை காணும் கருத்துற்றி டத்துக்கே.

மூலாதாரத்தில் இருந்து கிளர்ந்து மேலே எழும் பேரொளியைக் கண்ட பின்னர் ஒருவருக்கு எந்தக் கேடும் வராது. பேரொளியைக் கண்டவருக்கு நாடு முதலிய பேதங்கள் இரா. கால வேறுபாடு மறைந்த பின்னர் மேலே, கீழே, முன்னே, பின்னே என்ற வேறுபாடுகள் எதுவும் இரா. அமுதேசுவரியின் அருள் வரும் வழியைக் கண்டறிந்து கொண்டவருக்கு துன்பம் என்னும் காடு இராது.

#1357. சலிப்பு அற நின்றிடு!

உற்றிடம் எல்லாம் உலப்பு இலி பாழ் ஆக்கி
சுற்றிடம் எல்லாம் சுடுவெளி யானது
மற்றிடம் இல்லை, வழி இல்லை, தான் இல்லைச்
சற்று இடம் இல்லை, சலிப்பு அற நின்றிடே.

தான் வந்து அடைந்த உலகம் தோன்றாதபடிப் பாழ் செய்தால், அங்கு இருந்த எல்லாப் பொருட்களும் மறைந்து உலகம் வெட்ட வெளி ஆகிவிடும். தானே எங்கும் நிறைந்து நிற்பதால் வேறு இடம் என்று எதுவும் இராது. உலவுவதற்கும் வழியும் இராது. தான் என்பது இராது. சலித்துக் கொள்ளாமல் நீ இந்த அனுபவத்தில் நிலை பெற்று நிற்பாய்.

#1358. சிரசின் மேல் ஒளி அமையும்

நின்றிடும் ஏழ்கடல் ஏழ் புவி எல்லாம்
நின்றிடும் உள்ளம் நினைத்தவை தானே
நின்றிடும் சத்தி நிலை பெறக் கண்டிட,
நின்றிடும் மேலை விளக்கொளி தானே.

சாதனையாளருக்கு முன்னால் ஏழு கடலும், ஏழு உலகங்களும் வந்து நிற்கும். அவர் எண்ணியதெல்லாம் கண்ணெதிரே வந்து தோன்றும். சக்தி தேவி தன்னிடம் நிலை பெற்றதைக் கண்பவரின் சிரசின் மேல் ஓர் ஒளி அமையும்.

#1359. மின்னாற் கொடியாள்

விளக்கொளி சௌமுதல் ஔவது ஈறா
விளக்கொளிச் சக்கரம் மெய்ப் பொரு ளாகும்
விளக்கொளி யாகிய மின்கொடியாளை
விளக்கொளியாக விளங்கிடு நீயே.

ஒளிரும் ‘சௌம்’ முதல் ‘ஔம்’ வரை உள்ள ஒன்பது பீசங்களைக் கொண்ட நவாக்கரி சக்கரம் இதுவே மெய்ப் பொருளாகும். அதில் விளங்குகின்ற மின்னற் கொடியாளை உன் ஞானத்தால் நீ அறிந்து கொள்வாய்!

#1360. இந்த அறிவே மெய் ஞானம்

விளங்கிடும் மேல்வரு மெய்ப்பொருள் சொல்லின்
விளங்கிடும் மெல்லிய லானது ஆகும்
விளங்கிடும் மெய்நின்ற ஞானப் பொருளை
விளங்கிடு வார்கள் விளங்கினர் தானே.

இவற்றால் விளங்கும் உண்மை இதுவே. எங்கும் விளங்குபவள் சக்தி தேவியே ஆவாள். இவ்வாறு பார்க்கும் இடமெல்லாம் நீக்கமற நிறைந்து விளங்குபவள் சக்தி தேவி என்னும் மெய்ப்பொருளை அறிந்து கொண்டவரே உண்மையில் மெய்ஞானம் பெற்றவர் ஆவார்.