Quotable Quotes Part II

[Visalakshi Ramani]

Share:

Facebook X (Twitter) LinkedIn WhatsApp Email Share Link

62d. கோளறு பதிகம்

வேயுறு தோளிபங்கன் விடமுண்ட கண்டன்
மிகநல்ல வீணை தடவி
மாசறு திங்கள்கங்கை முடிமே லணிந்தென்
உளமே புகுந்த அதனால்
ஞாயிறு திங்கள்செவ்வாய் புதன்வியாழன் வெள்ளி
சனிபாம்பி ரண்டு முடனே
ஆசறு நல்லநல்ல அவைநல்ல நல்ல
அடியா ரவர்க்கு மிகவே. (01)

என்பொடு கொம்பொடாமை யிவைமார் பிலங்க
எருதேறி யேழை யுடனே
பொன்பொதி மத்தமாலை புனல்சூடி வந்தென்
உளமே புகுந்த அதனால்
ஒன்பதொ டொன்றொடேழு பதினெட்டொ டாறும்
உடனாய நாள்க ளவைதாம்
அன்பொடு நல்லநல்ல அவைநல்ல நல்ல
அடியா ரவர்க்கு மிகவே. (02)

உருவலர் பவளமேனி ஒளிநீ றணிந்து
உமையோடும் வெள்ளை விடைமேன்
முருகலர் கொன்றைதிங்கள் முடிமே லணிந்தென்
உளமே புகுந்த அதனால்
திருமகள் கலையதூர்தி செயமாது பூமி
திசை தெய்வ மானபலவும்
அருநெதி நல்லநல்ல அவைநல்ல நல்ல
அடியா ரவர்க்கு மிகவே. (03)

மதிநுதல் மங்கையோடு வடபா லிருந்து
மறையோது மெங்கள் பரமன்
நதியொடு கொன்றைமாலை முடிமே லணிந்தென்
உளமே புகுந்த அதனால்
கொதியுறு காலனங்கி நமனோடு தூதர்
கொடுநோய்க ளான பலவும்
அதிகுண நல்லநல்ல அவைநல்ல நல்ல
அடியா ரவர்க்கு மிகவே. (04)

நஞ்சணி கண்டனெந்தை மடவாள் தனோடும்
விடையேறும் நங்கள் பரமன்
துஞ்சிருள் வன்னிகொன்றை முடிமே லணிந்தென்
உளமே புகுந்த அதனால்
வெஞ்சின அவுணரோடு முருமிடியு மின்னு
மிகையான பூத மவையும்
அஞ்சிடு நல்லநல்ல அவைநல்ல நல்ல
அடியா ரவர்க்கு மிகவே. (05)

வாள்வரி யதளதாடை வரிகோ வணத்தர்
மடவாள் தனோடு முடனாய்
நாண்மலர் வன்னிகொன்றை நதிசூடி வந்தென்
உளமே புகுந்த அதனால்
கோளரி யுழுவையோடு கொலையானை கேழல்
கொடுநாக மோடு கரடி
ஆளரி நல்லநல்ல அவைநல்ல நல்ல
அடியா ரவர்க்கு மிகவே. (06)

செப்பிள முலைநன்மங்கை ஒருபாக மாக
விடையேறு செல்வ னடைவார்
ஒப்பிள மதியுமப்பும் முடிமே லணிந்தென்
உளமே புகுந்த அதனால்
வெப்பொடு குளிரும்வாதம் மிகையான பித்தும்
வினையான வந்து நலியா
அப்படி நல்லநல்ல அவைநல்ல நல்ல
அடியா ரவர்க்கு மிகவே. (07)

வேள்பட விழிசெய்தன்று விடமே லிருந்து
மடவாள் தனோடும் உடனாய்
வாண்மதி வன்னிகொன்றை மலர்சூடி வந்தென்
உளமே புகுந்த அதனால்
ஏழ்கடல் சூழிலங்கை அரையன்ற னோடும்
இடரான வந்து நலியா
ஆழ்கடல் நல்லநல்ல அவைநல்ல நல்ல
அடியா ரவர்க்கு மிகவே. (08)

பலபல வேடமாகும் பரனாரி பாகன்
பசுவேறும் எங்கள் பரமன்
சலமக ளோடெருக்கு முடிமேல் அணிந்தென்
உளமே புகுந்த அதனால்
மலர்மிசை யோனுமாலும் மறையோடு தேவர்
வருகால மான பலவும்
அலைகடல் மேருநல்ல அவைநல்ல நல்ல
அடியா ரவர்க்கு மிகவே. (09)

கொத்தலர் குழலியோடு விசயற்கு நல்கு
குணமாய வேட விகிர்தன்
மத்தமு மதியுநாகம் முடிமே லணிந்தென்
உளமே புகுந்த அதனால்
புத்தரொ டமணைவாதில் அழிவிக்கு மண்ணல்
திருநீறு செம்மை திடமே
அத்தகு நல்லநல்ல அவைநல்ல நல்ல
அடியா ரவர்க்கு மிகவே. (10)

தேனமர் பொழில்கொளாலை விளைசெந்நெல் துன்னி
வளர்செம்பொன் எங்கும் நிகழ
நான்முகன் ஆதியாய பிரமா புரத்து
மறைஞான ஞான முனிவன்
தானுறு கோளும்நாளும் அடியாரை வந்து
நலியாத வண்ணம் உரைசெய்
ஆனசொல் மாலையோதும் அடியார்கள் வானில்
அரசாள்வர் ஆணை நமதே. (11)

 

[Visalakshi Ramani]

https://kayarevee.wordpress.com/திருவிளையாடல்கள்-மூன்ற/62d-கோளறு-பதிகம்/

 

[Visalakshi Ramani]

18. கேசரி யோகம்

18. கேசரி யோகம்
கேசரி = வானம்.
கேசரி = சிங்கம்.
கேசரி யோகம் என்பது சிங்கத்தைப் போல மேல் நோக்கிய பார்வையுடன் இருப்பது. இந்த யோகத்தைச் செய்பவர் வானத்தில் செல்லும் ஆற்றலைப் பெறுவர் என்பர் .

#799 to #801

#799. நமன் இல்லை!

கட்டக் கழன்று கீழ் நான்று விழாமல்
ஆட்டத்தைக் கட்டி அடுப்பை அணை கோலி
விட்டத்தைப் பூட்டி மேற்பையைத் தாள்கோர்த்து
நட்டம் இருக்க நமன் இல்லை தானே.

மூச்சுக் காற்று கீழே இறங்காமல் அண்ணாக்கில் அதைக் கட்டிவிட வேண்டும். அபான வாயு குதம் வழியாகவோ அல்லது குறி வழியாகவோ வெளியேறாமல் குதத்தைச் சுருக்கி நிறுத்த வேண்டும். இரு கண் பார்வைகளையும் ஒன்றாக்கிவிட வேண்டும். உள்ளத்தைச் சுழுமுனை வழியே பாயும் மூச்சில் கொண்டு நிறுத்த வேண்டும். உடலைத் தாண்டிய இந்த நிலையை ஒருவன் அடைந்து விட்டால் அவன் காலத்தைக் கடந்து விடலாம். அவனுக்கு ஒரு நமன் இல்லை.

#800. அழுக்கு அற்றுப் போகும்

வண்ணான் ஒலிக்கும் சதுரப் பலகை மேல்
கண் ஆறு மோழை படாமல் கரைகட்டி
விண் ஆறு பாய்ச்சி குளத்தை நிரப்பினால்
அண்ணாந்து பார்க்க அழுக்கு அற்றவாறே.

சீவன், முன் பக்கம் உள்ள தன் மூளையைச் சிவயோக நாதத்தினால் மோத வேண்டும். இரண்டு கண்களின் பார்வைகளையும் மாறி மாறிப் பார்ப்பதால் சிரசின் உள்ளே ஏற்படும் இரண்டு கரைகள். அவற்றின் இடையே உள்ள சஹஸ்ர தளம் என்னும் குளத்தை வானத்தில் உண்டாகும் ஒளியைக் கொண்டு நிரப்ப வேண்டும். அதற்குப் பிறகு நெற்றிக்கு மேலே நிமிர்ந்து பார்த்தால் அந்த சீவன் தன் குற்றங்கள் அனைத்தும் நீங்கித் தூய்மை அடைந்து விடுவான்.

விளக்கம்
வண்ணான் = சீவன்
உவர்மண் = மூலபந்தம்
அடித்துத் துவைத்தல் = தவம் என்ற நாதத்தில் மோதுதல்
அழுக்கு நீங்குதல் = சீவனின் மலங்கள் அனைத்தும் நீங்குதல்

# 801. இறக்காமல் இருக்கலாம்

இடக்கை வலக்கை இரண்டையு மாற்றித்
துதிக்கையால் உண்பார்க்குச் சோரவும் வேண்டாம்
உறக்கத்தை நீக்கி உணர வல்லார்கட்கு
இறக்கவும் வேண்டாம் இருக்கலும் ஆமே.

இடைகலை பிங்கலை நாடிகள் வழியே மூச்சுக் காற்று இயங்குவதை மாற்றிச் சுழுமுனை வழியே செலுத்தும் கலையை ஒருவன் அறிந்து கொண்டு விட்டால் அவருக்குத் தளர்ச்சி ஏற்படாது. மற்றவர் உறங்கும் போது பயிற்சி செய்து வந்தால் ஒருவனுக்கு இறப்பு இல்லை. நீண்ட காலம் வாழ இயலும்.

 

[Visalakshi Ramani]

# 802 to #804

#802. நிலா மண்டலம் பாலிக்கும்
ஆய்ந்து உரைசெய்யில் அமுதம் நின்றுஊறிடும்
வாய்ந்து உரைசெய்யும் வருகின்ற காலத்து
நீந்துஉரை செய்யில் நிலாமண்டலம் ஆய்
பாய்ந்து உரை செய்தது பாலிக்குமாறே.

மறைகளை ஆராய்ந்து சொல்லப் போனால், சுழுமுனைத் தியானச் சாதனையில் அமுதம் ஊறிப் பெருகும் . அது அப்போது ஓர் ஒலியை எழுப்பும். ஒலிக்கும் போது சந்திர மண்டலமாக விளங்கி அது நம்மைப் பாதுகாக்கும்.

#803. நூறு கோடி ஆண்டுகள்

நாவின் நுனியை நடுவே விசிறிடில்
சீவனும் அங்கே சிவனும் உறைவிடம்
மூவரும் முப்பத்து மூவரும் தோன்றுவர்
சாவதும் இல்லை சதகோடி ஊனே.

நாக்கின் நுனியை அண்ணாக்கில் உரசினால் பிரணவத் தொனி கேட்கும். சீவனும், சிவனும் அங்கே தோன்றுவர். மும்மூர்த்திகளும் முப்பத்து முக்கோடி தேவர்களும் அங்கே தோன்றுவர். நூறு கோடி ஆண்டுகளுக்கு மரணம் என்பதே இராது.

முப்பத்து மூவர்: (12 + 11 + 8 + 2 = 33 )

துவாதச ஆதித்தர் = 12.

ஏகாதச ருத்திரர் = 11

அஷ்ட வசுக்கள் = 8

அஸ்வினி குமாரர் = 2

#804. அமுதம் உண்ணலாம்

ஊன் ஊறல் பாயும் உயர்வரை உச்சிமேல்
வான் ஊறல் பாயும் வகைஅறி வார் இல்லை;
வான் ஊறல் பாயும் வகை அறிவாளர்க்குத்
தேன் ஊறல் உண்டு தெளியலும் ஆமே.

ஊனால் ஆன உடம்பால் அறியும் அறிவு எல்லாம் ஒருவரின் சிரசில் பொருந்தி அமையும். அந்த சிரசின் உச்சியின் மேல் வான் மண்டலம் பொருந்தி அமையும். ஆயினும் இதன் இயல்பை அறிந்தவர் இல்லை. வான்மண்டலத்தைப் பொருந்தி அறிந்து கொண்டவர் அங்கு ஊறும் தேனை ஒத்த இனிய அமுதத்தை உண்டு தெளிவு பெறலாம்.

 

[Visalakshi Ramani]

#805 to # 807

#805. இளமையுடன் இருக்க வழி

மேலை அண்ணாவில் விரைந்து இருகால் இடின்
காலனும் இல்லை கதவம் திறந்திடும்
ஞாலம் அறிய நரை திரி மாறிடும்
பாலனும் ஆவான் பரா நந்தி ஆணையே.

மேல் அண்ணாக்குப் பகுதியில் பிராணன், அபானன் என்ற இரு வாயுக்களும் பொருந்தும்படி பயிற்சி செய்ய வேண்டும். அப்போது உடலுக்கு அழிவு இராது. பிரமரந்திரம் என்னும் உச்சித் துளையின் வழி திறக்கும். நரை திரை மாறி, இளமை திரும்புவதை உலகம் கண்டறியும். இது சிவ சக்தியரின் ஆணை ஆகும்.

#806. உடலறிவு நீங்குவர்

நந்தி முதலாக நாமேலே ஏறிட்டுச்
சந்தித்து இருக்கில் தரணி முழுது ஆளும்
பந்தித்து இருக்கும் பகலோன் வெளியாகச்
சிந்தித்து இருப்பவர் தீவினை யாளரே.

சிவத்தை முன்னிட்டு நாக்கின் நுனியை அண்ணாக்கில் ஏறும்படிச் செய்ய வேண்டும். அங்கே நடுநாடியின் உச்சியில் கூடி இருக்க வேண்டும். அப்போது அந்த யோகி உலகம் முழுவதையும் ஆளலாம். உடல் நினைவை ஒழித்துச் சிவனையே நினைத்துக் கொண்டிருப்பவர் உண்மையான அக்கினி காரியம் செய்தவர் ஆவார்.

#807. வினை நீங்குவர்

தீவினை ஆடத் திகைத்து அங்கு இருந்தவர்
நாவினை நாடின் நமனுக்கு இடம் இல்லை
பாவினை நாடிப் பயன் அறக் கண்டவர்
தேவினை ஆடிய தீங்கரும்பு ஆமே.

தீ வினைகள் நம்மை வருத்தும் பொழுது அறிவு மயங்கும். சீவர்கள் நாவினால் செய்யும் பயிற்சியினால் கூற்றுவனை வென்று விடலாம். பல வேறு வினைகளை ஆராய்ந்து அவற்றின் பயன் இன்மையை உணர்ந்து கொண்டவர்கள் தெய்வப் பணியில் ஈடுபடுவர். அதன் இனிமையைச் சுவைத்து இருப்பர்.

 

[Visalakshi Ramani]

bhagavathy bhaagavatam - skanda 9

9#30. தான, தர்ம பலன்கள்

“அன்னதானம் அடைவிக்கும் சிவலோகம்;
அன்னதானம் செய்யலாம் அனைவருமே!

பசு தானம் அடைவிக்கும் கோலோகம் – புது
சயன தானம் அடைவிக்கும் சந்திர லோகம்.

வெண்குடை தானம் தரும் வருண லோகம்;
வஸ்திர தானம் அடைவிக்கும் வாயு லோகம்.

சாளக்ராம தானம் அடைவிக்கும் வைகுந்தம்;
கஜ தானம் தரும் இந்திரனின் அர்த்தாசனம்!

பரி, பல்லக்கு தானம் தரும் வருண லோகம்;
நந்தவன தானம் அடைவிக்கும் வாயு லோகம்.

வெண்சாமர தானம் அடைவிக்கும் வாயுலோகம்;
தாமிரம், எள் தானம் அடைவிக்கும் சிவலோகம்.

கனிகளின் தானம் அடைவிக்கும் இந்திர லோகம்;
விளைநில தானம் அடைவிக்கும் வைகுண்டம்.

கிராம தானம் அடைவிக்கும் வைகுண்ட லோகம்;
கார்த்திகைத் துலாதானம் தரும் விஷ்ணு லோகம்.

கங்கையில் நீராடுவது தரும் விஷ்ணு லோகம்;
வைகாசியில் மாதானம் சேர்க்கும் சிவலோகம்.

சித்திரை மாத நிருத்தியம் தரும் சிவலோகம்;
கார்த்திகை ராஸமண்டல பூஜை கோலோகம்.

ஹரிநாம ஜபம் சேர்க்கும் விஷ்ணு லோகம்;
பார்த்திவ லிங்க பூஜை சேர்க்கும் சிவலோகம்;

சாளக்ராம பூஜை தரும் வைகுண்டம் – தரும்
நூறு பரி யாகம் இந்திரப்பதவி, விஷ்ணு பதம்.

பிற பூஜைகள்:

கார்த்திகை பௌர்ணமி ராஸ மண்டல பூஜை

சுக்கில ஏகாதசி, கிருஷ்ண ஏகாதசி பூஜைகள்

பாத்ரபத சுக்ல பக்ஷ துவாதசி பூஜை;

சுக்ல பக்ஷ சப்தமியில் சூரிய பூஜை;

ஜேஷ்ட மாச கிருஷ்ண சதுர்த்தி சாவித்ரி பூஜை;

மாசி மாத சுக்கில பஞ்சமியில் சரஸ்வதி பூஜை.

உலகம் உய்ய வேண்டும்! விசாலம். K. ராமன்

9#30. The fruits of some sath karmas (Good Deeds)

“Anna DAnam will give us a spot in the Siva Lokam. It is the only DAnam everyone is qualified to perform and no one is prohibited from performing!

Giving away a cow will lead the person to Golokam; Giving a new bed will lead the person to Chandra Lokam; Giving a white Umbrella will lead the person to VaruNa Lokam and Giving new clothes will lead the person to VAyu Lokam.

Giving SAlagrAmas will lead the person to Vaikuntam; Giving away an elephant will give him half the throne of Indra himself. Presenting horses and palanquins will bestow a spot in Varuna Lokam; Giving away a flowering garden will bestow a spot in the VAyu Lokam.

Presenting ChAmara will find a person a spot in VAyu Lokam; Giving away copper vessels and sesame seeds will take a person to Siva lokam; Presenting fruits will find a spot in Indra Lokam; Presenting fertile lands will find a spot in Vaikuntam.

Presenting a village bestows a place in Vaikuntam; TulA Danam done in the month of Karthik gives VishNu padam. A holy dip in Ganges will take a person to VishNu Lokam; The nrithya done in the month of Chitra will give a spot in Siva Lokam.

RAsa MaNdala Pooja performed in month of Karthik will lead the person to Golokam; The chanting of the name of Hari will take a person to VishNu Lokam. PArthiva Linga pooja bestows on a person a spot in Siva lokam;

SAlagrAma pooja will lead the person to Vaikuntam. Performing one hundred Aswamedha Yagams gives the person the throne of Indra and also Vishnu padam.

The other important poojAs yielding good merits are RAsa MaNdala Pooja on the full moon day of the month of Karthik; Sukla EkAdasi and Krishna EKAdasi pooja;

BAdrapada sukla paksha dwAdasi pooja; Jyeshta mAsa Krishna chathurthi SAvitri pooja, MAsi MAsa sukla panchami Saraswati pooja.

 

[Visalakshi Ramani]

#805 to # 807

#805. இளமையுடன் இருக்க வழி

மேலை அண்ணாவில் விரைந்து இருகால் இடின்
காலனும் இல்லை கதவம் திறந்திடும்
ஞாலம் அறிய நரை திரி மாறிடும்
பாலனும் ஆவான் பரா நந்தி ஆணையே.

மேல் அண்ணாக்குப் பகுதியில் பிராணன், அபானன் என்ற இரு வாயுக்களும் பொருந்தும்படி பயிற்சி செய்ய வேண்டும். அப்போது உடலுக்கு அழிவு இராது. பிரமரந்திரம் என்னும் உச்சித் துளையின் வழி திறக்கும். நரை திரை மாறி, இளமை திரும்புவதை உலகம் கண்டறியும். இது சிவ சக்தியரின் ஆணை ஆகும்.

#806. உடலறிவு நீங்குவர்

நந்தி முதலாக நாமேலே ஏறிட்டுச்
சந்தித்து இருக்கில் தரணி முழுது ஆளும்
பந்தித்து இருக்கும் பகலோன் வெளியாகச்
சிந்தித்து இருப்பவர் தீவினை யாளரே.

சிவத்தை முன்னிட்டு நாக்கின் நுனியை அண்ணாக்கில் ஏறும்படிச் செய்ய வேண்டும். அங்கே நடுநாடியின் உச்சியில் கூடி இருக்க வேண்டும். அப்போது அந்த யோகி உலகம் முழுவதையும் ஆளலாம். உடல் நினைவை ஒழித்துச் சிவனையே நினைத்துக் கொண்டிருப்பவர் உண்மையான அக்கினி காரியம் செய்தவர் ஆவார்.

#807. வினை நீங்குவர்

தீவினை ஆடத் திகைத்து அங்கு இருந்தவர்
நாவினை நாடின் நமனுக்கு இடம் இல்லை
பாவினை நாடிப் பயன் அறக் கண்டவர்
தேவினை ஆடிய தீங்கரும்பு ஆமே.

தீ வினைகள் நம்மை வருத்தும் பொழுது அறிவு மயங்கும். சீவர்கள் நாவினால் செய்யும் பயிற்சியினால் கூற்றுவனை வென்று விடலாம். பல வேறு வினைகளை ஆராய்ந்து அவற்றின் பயன் இன்மையை உணர்ந்து கொண்டவர்கள் தெய்வப் பணியில் ஈடுபடுவர். அதன் இனிமையைச் சுவைத்து இருப்பர்.

 

[Visalakshi Ramani]

#808 to #810

#808. ஊன் உடலில் அமுதம்

தீங்கரும்பு ஆகவே செய்தொழில் உள்ளவர்
ஆங்கரும்பு ஆக அடைய நா ஏறிட்டுக்
கோங்கு அரும்பு ஆகிய கோணை நிமிர்த்திட
ஊன்கரும்பு ஆகிய ஊன் நீர் வருமே.

இனிய கரும்பு போன்ற வினைகளைச் செய்பவர்கள் சுழுமுனை நாடியில் உள்ள கரும்பைச் சுவைகக் விரும்பினால். நாக்கை மேலே ஏற்றி நாடு நாடியின் கோணலை நேராக்க வேண்டும். அவ்வாறு செய்தால் ஊன் உடலிலேயே அமுதத்தைக் காண இயலும்.

809. திருவைந்தெழுத்து

ஊன்நீர் வழியாக உள்நாவை ஏறிட்டு,
தேன்நீர் பருகி, சிவாய நாம என்று
கான்நீர் வரும் வழி கங்கை தருவிக்கும்
வான்நீர் வரும் வழி வாய்ந்தறிவீரே.

அண்ணாக்குப் பகுதி வழியே ஒருவன் தன் உண்ணாக்கை மேலே ஏற்ற வேண்டும். அங்கே ஊறும் அமுதத்தைப் பருக வேண்டும். ‘சிவாயநம’ என்ற ஐந்து எழுத்துக்களை சிந்தனை செய்ய வேண்டும். அப்போது ஓர் ஒளி வெள்ளம் நீர் வெள்ளம் போல முகத்தின் முன்பு பெருகும். அந்த வான கங்கையை அறிந்து கொள்ள வேண்டும்.

#810. உடலே ஓர் ஆலயம் ஆகும் !

வாய்ந்தறிந்து உள்ளே வழிபாடு செய்தவர்
காய்ந்த அறிவு ஆகக் கருணை பொழிந்திடும்;
பாய்ந்து, அறிந்து உள்ளே படிக்கதவு ஒன்று இட்டுக்
கோய்ந்து அறிந்து உள்உறை கோயிலும் ஆமே.

சிவனை மனதில் இருத்தி வழிபாடு செய்யும் போது மலங்களைச் சுட்டெரிக்கும் சக்தி தேவி ஒலி வடிவாகவும், ஒளி வடிவாகவும் வெளிப்படுவாள். அந்த ஒளி, ஒலிகளில் மனத்தைப் பதிக்க வேண்டும். சலந்தர பந்தனமும், கேசரி முத்திரையும் அமைத்து அவை கீழே இறங்காமல் பார்த்துக் கொள்ள வேண்டும். அங்கேயே குவிந்து தியானம் செய்தால் அந்த யோகின் உடலே ஓர் ஆலயமாக மாறிவிடும்.

 

[Visalakshi Ramani]

# 811 to # 814

#811. தீயினும் தீயவர்!

கோயிலின் உள்ளே குடிசெய்து வாழ்பவர்
தாயினும் நல்லார் தாரணி முழுதுக்கும்;
காயினும் நல்லவர் காய்ந்தவர் தம்முளும்
தீயினும் தீயரத் தீவினை யாளர்க்கே.

அகக் கோவிலையே தன் இருப்பிடமாகக் கொண்டு வாழ்பவர்கள் உலகம் மொத்தத்துக்கும் தாயினும் மேலாகத் தன் அருளைப் பொழிவர். பிறர் இவரைச் சினந்தாலும் இவர் நன்மையே செய்வார். ஆனால் சினம் கொண்டவர்கள் தீவினை செய்தவர்களுக்குத் தீயைவிட அதிகமாகத் தீமை செய்து விடுவார்கள்.

#812. சிவபெருமான் இயல்பு

தீவினை யாளர்தம் சென்னியில் உள்ளவன்
பூவினை யாளர்தம் பொற்பதி ஆனவன்
பாவினை யாளர்தம் பாவகத் துள்ளவன்
மாவினை யாளர்தம் மதியில் உள்ளானே.

சிவபெருமானின் இருப்பிடங்கள் இவை:
மூலாக்கினியை எழுப்பி யோகம் செய்பவரின் சென்னியில் இருப்பான்.
சஹஸ்ரதளத்தில் உணர்பவருக்குப் பொன்னொளியில் விளங்குவான்.
தொடர்ந்து பாவனை செய்பவர்களுக்கு பாவகப் பொருளாக இருப்பான்.
சிவயோகம் செய்பவரின் அறிவில் சிவா பெருமான் செறிந்து விளங்குவான்.

#813. ஒளிக் கதிர்கள் பரப்புவான்

மதியினின் எழும் கதிர் போலப் பதினாறாய்,
பதிமனை நூறு நூற் றிருபத்து நாலாய்
கதிமனை உள்ளே கணைகள் பரப்பி
எதிர்மலை யாமல் இருந்தன தானே.

சந்திரனின் கலைகள் பதினாறு. அது போன்றே விசுத்திச் சக்கரத்தில் உள்ள தாமரையின் இதழ்கள் பதறினாறு. உடலில் உள்ள சக்கரங்கள் ஒளி பரப்பும் கதிர்கள் 224. உலகங்களில் உள்ள ஒளிக் கதிர்களை உடலிலும் பரப்பி அதன் மூலம் தத்துவங்கள் ஒன்றுடன் ஒன்று மாறுபடாமல் சிவன் விளங்குவான்.

#814. இன்பம் அளிப்பாள்

இருந்தனள் சததியும் அக்கலை சூழ
இருந்தனள் கண்ணியம் அந்நடு ஆக
இருந்தனள் மான் நேர்முகம் நில ஆர
இருந்தனள் தானும் அமுதம் பொழிந்தே.

பராசக்தி விசுத்திச்சக்கரத்தின் நடுவே விளங்குகின்றாள். அக்கிரணங்களின் இடையில் பராசக்தி விளங்குகின்றாள். ஆன்ம தத்துவத்தில் சந்திரனாக விளங்குபவளும் சக்தி தேவியே. போகத்தின் போது உடலில் பொருந்தி இன்பம் அளிப்பவளும் சக்தி தேவியே.

 

[Visalakshi Ramani]

#815 to #818

#815. விசுத்திச் சக்கரம்

பொழிந்தவிரு வெள்ளி பொன் மண் அடையில்
வழிந்துஉள் இருந்தது வான் முதல்; அங்குக்
கழிந்து அது போகாமல் காக்க வல்லார்க்கு
கொழுந்து அது ஆகும் குணம் அது தானே.

அனைத்துமாக உள்ள பராசக்தி வெண்மையான சுக்கிலத்திலும், பொன் மாயமான சுரோணிதத்திலும் பொருந்தி உள்ளாள். அவை செயல்படும் இடமாகிய ஸ்வாதிஷ்டானச் சக்கரத்தில் பொருந்தி உள்ளாள். ஆற்றல் கழிந்து செல்லாமல் காத்துக் கொள்ள அறிந்து கொண்டு விட்டால் அதுவே உடலைக் காக்கும் சிறந்த பச்சிலை ஆகி விடும். விசுத்தி மந்திரங்களில் அளிக்கும் பயன் இதுவே.

#816. மெய்ஞானம் உண்டாகும்

குணம்அது ஆகிய கோமளவல்லி
மணம் அது ஆக மகிழ்ந்து அங்கு இருக்கில்,
தனம்அது ஆகிய தத்துவ ஞானம்
இனம்அது ஆக இருந்தனன் தானே.

காம வெற்றிக்குக் காரணம் ஆகும் குண்டலினி சக்தி. கொடி போன்று மிக மெல்லிய இந்த சக்தி வான மண்டலத்தை அடைந்து, சிவனுடன் சேர்ந்து மகிழும். அவ்வாறு நடந்தால் எட்டு பெருஞ் சித்திகளும் கைக் கூடும். மெய் ஞானம் உண்டாகும். குண்டலினி சக்தியுடன் அறிவு மயமான சிவனும் நம் அறிவில் செறிந்து விளங்குவான்.

#817. நீண்ட காலம் வாழ முடியும்

இருந்த பிராணனும் உள்ளே எழுமாம்
பரிந்தஇத் தண்டுடன் அண்டம் பரிய
விரிந்தஅப் பூவுடன் மேல் எழ வைக்கின்
மலர்ந்தது மண்டலம் வாழலும் ஆமே.

விசுத்திச் சக்கரத்தின் கீழே ஓடும் மூச்சுக் காற்று, கண்டத்திலிருந்து உள்முகமாக மேல் நோக்கிச் செல்லும். அது உடலில் உள்ள வானத்தை அடைந்து கவிழ்ந்திருக்கும் சஹஸ்ரதளத்தில் விளங்க வேண்டும். அப்போது சந்திர மண்டலம் நன்கு வளரும். பூமண்டலத்தில் நெடுங்காலம் உயிர் வாழ முடியும்.

#818. நாதாந்தம் தரும் ஆனந்தம்

மண்டலத் துள்ளே மன ஒட்டி யாணத்தைக்
கண்டுஅகத்து அங்கே கருதியே கீழ்க்கட்டி,
பண்டுஅகத் துள்ளே பகலே ஒளிஆகக்
குண்டலக் காதனும் கூத்து ஒழிந் தானே.

சந்திர மண்டலத்துக்குள்ளே, சஹஸ்ரதளம் என்னும் ஒட்டியாணத்தால், மனத்தைக் கீழே செல்லாதவாறு கட்டி நிறுத்தி விட வேண்டும். உள்ளம் தளர்ச்சி அடையாமல் சிரசிலேயே நிற்கும் போது இயல்பான சாலந்திர பந்தனம் ஏற்பட்டு மூச்சுத் தடைப்படும். ஆனந்தமய கோசத்தில் கதிரவன் ஒளி வீசுவான். குண்டலத்தை அணிந்த சிவபெருமானும் தன் ஐந்தொழில்களை ஒழித்து விட்டு அசைவின்றி அங்கே விளங்குவான்.

ஆனந்தமய கோசம் ஒளி மயமானது. அது ஒளி அணுக்களால் ஆனது

ஈசனின் ஐந்தொழில்கள் : படைத்தல், காத்தல், அழித்தல், மறைத்தல், அருளுதல்.

 

[Visalakshi Ramani]

#819 to # 821

#819. மனம் உடல் பற்றை ஒழிக்க வேண்டும்

ஒழிகின்ற வாயுவும் உள்ளே அமரும்
கழிகின்ற வாயுவும் காக்கலும் ஆகும்
வழிகின்ற காலத்து வட்டக் கழலைப்
பழிக்கின்ற காலத்துப் பைஅகற் றீரே.

மேலே சொன்ன சாதனையால் விசுத்திச் சக்கரத்துக்குக் கீழே சென்று கழிந்து போகின்ற வாயு அண்ணாக்கின் வழியே சென்று மேலே போய்த் தங்கும். ஒளி நிலை பெற்று வழியும். அந்த சமயங்களில், சஹஸ்ரதளத்தில் ஈசன் திருவடிகளைத் தொழும் போது, உடல் நினைவைத் துறந்து விடுங்கள். உடலைப் பற்றி மறந்து விடுங்கள்.

#820. மணி விளக்கு ஆகும்!

பையின் உள்ளே படிக்கதவு ஒன்று இடின்
மெய்யினின் உள்ளே விளங்கும் ஒளியதுஆம்
கையினுள் வாயுக் கதித்தி அங்கே எழுந்திடின்
மை அணி கோயில் மணிவிளக்கு ஆமே.

உடலில் உள்ள மூலாதாரக் கதவு குதம் ஆகும். அதைச் சுருக்கிப் பிடித்தால் மூல பந்தம் நிகழும். அதனால் அபானன் அமுக்கப்படும். தன திசையை மாற்றிக் கொண்டு மேல் நோக்கிப் போகும். உயிர்ப்பை மாற்றி மேலே செலுத்தும் போது உடல் ஒளியுடன் விளங்கும். அபானன் நாடியினுள் மேலே எழும் போது மலங்கள் நிறைந்த சீவன் ஒளி உடையதாக விளங்கும்.

#821. அக்கினிக் கலை வளரும்

விளங்கிடும் வாயுவை மேல் எழ உன்னி
நலங்கிடும் கண்டத்து நாடியின் உள்ளே
வணங்கிடும் மண்டலம் வாய்ந்திடக் கும்பிச்
சுணங்கிட, நின்றவை சொல்லலும் ஆமே.

மூல பந்தத்தால் அபானனை திசை மாற்றி மேலே செல்ல வைக்க வேண்டும். மூல பந்தத்துடன் செய்யும். சாலந்தர பந்தனம் பிராண வாயுவையும் அபான வாயுவையும் ஒன்றாகச் சேர்க்கும். அதனால் அக்கினிக் கலை நன்கு வளர்ந்து, மிளிர்ந்து, ஒளிரும்.

 

[Visalakshi Ramani]

#822 to #824

#822. தொலை நோக்கு கிடைக்கும்

சொல்லலும் ஆயிடும் மாகத்து வாயுவும்
சொல்லலும் ஆகும் அனல் நீர் கடினமும்
சொல்லலும் ஆகும் இவை அஞ்சும் கூடிடின்
சொல்லும் ஆம் தூர தரிசனம் தானே.

வான் பூதத்தில் மற்ற ஐந்து பூதங்களும் ஒடுங்கி மறைந்து இருப்பதை அறிவோம். வானம் முதலிய ஐந்து பூதங்களும் ஒளி மயமாகப் பொருந்தி இருக்கும். இதைக் கண்டு அறிந்தவர் தொலை நோக்குப் பெறுவார்.

#823. சிவஞானம் தரும் பயன்.

தூர தரிசனம் சொல்லுவான் காணல் ஆம்
கார் ஆரும் கண்ணி கடை ஞானம் உட்பெய்து
தேர் ஆரும் தீபத்து எழில் சிந்தை வைத்திடின்
பார்ஆர் உலகம் பகல் முன்னது ஆமே.

தொலைப் பார்வையைப் பற்றிச் சொந்த அனுபவத்தால் அறிந்து கொள்ளலாம். மேகத்தைப் போல அருள் பொழியும் சக்தியைப் பற்றிய ஞானத்தை உள்ளே நிறுத்த வேண்டும். அழகிய ஒளி மிகுந்த தீபத்தைப் போன்ற சிவஞானத்தின் மீது மனத்தை நிலை நிறுத்த வேண்டும். அப்போது பூமி முதலான உலகங்கள் பகலில் பார்ப்பதைப் போலத் தெளிவாகக் காட்சி அளிக்கும்.

#824. ஆன்மாவில் சிவன் விளங்குவான்

முன்எழு நாபிக்கு முந்நால் விரற்கீழே
பன்எழு வேதம் பகல் ஒளி உண்டு என்னும்
தன்எழு நாதத்து நல்தீபம் வைத்திடத்
தன்எழு கோவில் தலைவனும் ஆம்.

முன்னால் எழுவது கொப்பூழ்த் தாமரை. அதற்குப் பன்னிரண்டு விரற்கடை கீழே உள்ளது மூலாதாரம். அங்கு கதிரவன் விளங்குவதாக வேதங்கள் கூறும். கீழே செல்லாதவாறு பந்தித்துக் குண்டலினியை மேலே செலுத்தும் பொழுது ஒரு நாதம் எழும். அதில் அறிவு பொருந்தி இருந்தால் அப்போது ஆன்மாவாகிய கோவிலில் சிவன் விளங்குவான்.

 

[Visalakshi Ramani]

19. பரியங்க யோகம்

19. பரியங்க யோகம்
பரியங்கம் என்பது கட்டில்
யோகம் என்பது சேர்க்கை
கட்டிலில் ஆடவனும் பெண்னும் கூடி செய்யும் போகத்தையே
ஒரு யோகமாக மாற்றுவது பரியங்க யோகம்.


#825 to #828

#825. போகத்தை யோகமாக்க வேண்டும்

பூசுவன எல்லாம் பூசிப் புலர்த்திய
வாச நறுங்குழல் மாலையும் சாத்திக்
காயக் குழலி கலவியொடும் கலந்து,
ஊசித் துளையுற, தூங்காது போகமே.

பூசத் தகுந்த வாசனைப் பொருட்களை எல்லாம் பூசிக் கொண்ட ஓர் ஆடவன், மணம் வீசும் மலர் மாலையை அணிந்த ஒரு பெண்ணுடன் புணர்ச்சியில் ஈடுபடும் பொழுது அவன் உள்ளம், தலை உச்சியில் உள்ள பிரமரந்திரத்தின் மீது நிலைத்திருந்தால் அந்தப் புணர்ச்சி தளர்ச்சி அடையாது.

#826. நாத விந்துக்களாக மாறிவிடும்!

போதத்தை உன்னவே போகாது வாயுவும்
மேகத்தை வெள்ளியும் மீளும் வியாழத்தில்
சூதொத்த மென் முலையாளும் நல் சூதனும்
தாதில் குழைந்து தலை கண்டவாறே.

உச்சித் தொளையாகிய பிரமரந்திரத்தில் விளங்குகின்ற பேரறிவு பொருந்திய சிவனை எண்ணியபடி ஓர் ஆடவன் புணர்ச்ச்சியில் ஈடுபட்டால், அவனது காம வாயு விரைவாகத் தொழில் புரியாது. நீரின் தன்மை கொண்ட அவன் சுக்கிலம் பெண்ணின் சுரோணிதத்தில் கலக்காமலேய திரும்பிவிடும். சூதாடும் கருவியைப் போன்ற ஸ்தனங்கள் உடைய பெண்ணும், உடல் என்னும் தேரைச் செலுத்தும் ஆடவனும், செய்த இந்தக் கூட்டுறவால் வெளிப்பட்ட சுக்கிலமும் சுரோணிதமும் நாத விந்துக்களாக மாறித் தலையில் சென்று பொருந்தும்.

இந்த யோகத்தில் ஈடுபடுபவன், தன் தலையில் நாதமாகிய சிவனும் விந்துவாகிய சக்தியும் விளங்குவதைக் காண்பான். பிரமரந்திரத்தை நினைவில் கொள்வதால் காம வாயு சுக்கிலத்தை நீக்கம் செய்யாது. அது நேராக மூலாதாரத்திலிருந்து தலையைச் சென்று அடைந்துவிடும்.

#827. உடல் தளராது

கண்டனும் கண்டியும் காதல்செய் யோகத்து,
மண்டலம் கொண்டுஇரு பாலும் வெளிநிற்கும்
வண்டியை மேல்கொண்டு வான் நீர் உருட்டிடத்
தண்டு ஒருகாலும் தளராது அங்கமே.

ஒரு தலைவனும் தலைவியும் விருப்பத்துடன் கூடிப் புணரும் போது; அக்கினி மண்டலம், கதிரவன் மண்டலம் என்ற இரண்டையும் கடந்து மேலே சென்று; சந்திர மண்டலத்தில் தலையின் மேலே உள்ள வெளியை உணருவர். அங்கு சந்திர மண்டலத்தில் வான் கங்கை ஒளியைப் பெருக்கும். அதனால் அவர்கள் உடல் ஒரு போதும் தளர்ச்சி அடையாது.

#828. விந்துவை வெற்றி பெறலாம்

அங்குஅப் புணர்ச்சியும் ஆகின்ற தத்துவம்
அங்கத்தில் விந்து வருகின்ற போகத்துப்
பங்கப் படாமல் பரிகரித்துத் தம்மைத்
தங்கிக் கொடுக்க தலைவனும் ஆமே.

புணர்ச்சியின் போது காமத் தீ உடலிலிருந்து விந்துவை நீக்கம் செய்யும். அவ்வாறு நிகழாமல் விந்துவைப் பாதுகாத்து யோகத்தால் விந்து நீக்கத்தை வெற்றி கொண்டவன் ஒரு தலைவன் ஆவான்

 

[Visalakshi Ramani]

#829 to #832

#829. உடல் வசப்படும்

தலைவனும் ஆயிடும் தன் வழி ஞானம்
தலைவனும் ஆயிடும் தன் வழி போகம்
தலைவனும் ஆயிடும் தன் வழி உள்ளே
தலைவனும் ஆயிடும் தன் வழி அஞ்சே.

இவ்வாறு வெற்றி பெற்ற தலைவன் தன் ஆன்மாவை அறிந்தவன் ஆவான். அவனைச் சிவயோகம் தானே வந்தடையும். தன்னைத் தானே வசப்படுத்தி ஆளும் திறமை அவனுக்கு வரும். அவன் சொற்படி ஐந்து பூதங்களும் நடக்கும்.

#830. ஐந்து நாழிகை போதும்!

அஞ்சிக் கடிகைமேல், ஆறாம் கடிகையில்
துஞ்சுவது ஒன்றத் துணைவி துணைவன் பால்
‘நெஞ்சு நிறைந்தது வாய்கொளது’ என்றது
பஞ்சக் கடிகை பரியங்க யோகமே.

பரியங்க யோகம் ஐந்து நாழிகைப் பொழுது மட்டுமே செய்ய வேண்டும். ஆறாம் நாழிகையில் துணைவி தன் துணைவனுடன் பொருந்தி உறங்குவாள். ஐந்து நாழிகைப் பரியங்க யோகமே அவளுக்கு மன நிறைவை அளித்துப் போதும் இனி வேண்டாம் என எண்ணச் செய்யும். இதற்கு மேலே பரியங்க யோகம் நீடித்தால் விந்து வெளிப்படும்.

#831. குண்டலினியைக் கடக்க இயலும்

பரியங்க யோகத்துப் பஞ்சக் கடிகை
அரியஇவ் யோகம் அடைந்தவர்க்கு அல்லது
சரிவளை முன்கைச்சி சந்தனக் கொங்கை
உருவித் தழுவ ஒருவர்க்கு ஒண்ணாதே.

நழுகின்ற வளையல்கள் அணிந்த கைகளை உடைய, மணம் பொருந்திய கொங்கைகளை உடைய குண்டலினி சக்தியைக் கடந்து மேலே செல்வது மிகவும் அரிது. பரியங்க யோகத்தில் அரிதாக ஐந்து நாழிகை இருக்க முடிந்தவனுக்கே இந்த திறமை வாய்க்கும்.

#832. பரியங்க யோகம் மேன்மை தரும்

ஒண்ணாத யோகத்தை உற்றவர் ஆர் என்னில்,
விண் ஆர்ந்த கங்கை விரிசடை வைத்தவன்
பண்ஆர் அமுதினைப் பஞ்சக் கடிகையில்
‘எண்ணாம்’ என் எண்ணி இருந்தான் இருந்ததே.

யாவருக்குமே அடைவதற்கு அரிதாகிய இந்த யோகத்தைச் செய்து அதை அறிவித்தவர் யார் தெரியுமா? வான் கங்கையை ஜடையில் தரித்த ருத்திரன் ஆவான். அவன் உருவத்தை எண்ணாமல், நாதத்துடன் கூடிய ஒளியை ஐந்து நாழிகைப் பொழுது எண்ணமல் எண்ணி அனுபவித்திருந்தான்.

 

[Visalakshi Ramani]

#833 to #836

#833. யோகத்துக்கு உரிய வயது

ஏய்ந்த பிராயம் இருபதும் முப்பதும்
வாய்ந்த குழலிக்கும் மன்னர்க்கும் ஆனந்தம்
ஆய்ந்த குழலியோடு ஐந்தும் மலர்ந்திடச்
சோர்ந்தன சித்தமும் சோர்வு இல்லை வெள்ளிக்கே.

இந்தப் பரியங்க யோகம் செய்வதற்கு ஏற்ற வயது பெண்ணுக்கு இருபதும், ஆணுக்கு முப்பதும் ஆகும். அப்போது இந்த யோகத்தில் பொருந்திய இருவருக்கும் ஆனந்தம் உண்டாகும். பெண்ணின் ஐம் பொறிகளும் இன்பத்தில் மலர்ந்திடும். ஆனால் ஆணுக்கு விந்து நீக்கம் ஏற்படாது.

#834. கள்ளத் தட்டானார்

வெள்ளி உருகிப் பொன்வழி ஓடாமே
கள்ளத் தட்டானார் கரியிட்டு மூடினார்
கொள்ளி பரியக் குழல் வழியே சென்று
வள்ளி உள்நாவில் அடக்கி வைத்தாரே.

வெண்மையான சுக்கிலம் உருகிப் பொன்னிற சுரோணிதத்தில் கலக்காமல் தடுத்தார் மறைந்து இருந்த சிவன் என்னும் தட்டானார். அவர் கரியாகிய அருளினால் பக்குவம் செய்வார். தீ என்ற அக்கினிக் கலை உண்டாகும் வண்ணம், ஊதுகுழல் ஆகிய சுழுமுனை வழியே சென்று; உள்நாவில் ஒளிமயமான சந்திர மண்டலத்தை விளங்க வைப்பார்.

#835. சிவசூரியன் விளங்குவான்

வைத்த இருவரும் தம்மில் மகிழ்ந்து உடன்
சித்தம் கலங்காது செய்கின்ற ஆனந்தம்
பத்து வகைக்கும் பதினெண் கணத்துக்கும்
வித்தகனாய் நிற்கும் வெங்கதிரோனே.

காம வயப்படாமல் தெய்வ காரியமாக எண்ணிப் பரியங்க யோகத்தைச் செய்ய வேண்டும். விந்து நீக்கம் இல்லாமல் ஆணும் பெண்ணும் புணரும் போது இருவரும் இன்பம் அடைவர். அவர்களுக்குப் பத்து திசைகளுக்கும் தலைவனான பதினெட்டு வகைத் தேவர்களுக்கும் தலைவனான சிவசூரியன் விளங்குவான்.

#836. நாதத்தில் திளைப்பர்

வெங்கதி ருக்கும் சனிக்கும் இடைநின்ற
நங்கையைப் புல்லிய நம்பிக்கு ஓர் ஆனந்தம்
தங்களில் பொன் இடை வெள்ளிதாழா முனம்
திங்களில் செவ்வாய் புதைந்திருந்தாரே.

விருப்பத்தைத் தருபவன் கதிரவன். பிறப்பைத் தருவது கருவாய். பரியங்க யோகம் செய்யும் ஆடவன் இவை இரண்டுக்கும் இடையில் ஆனந்தம் அடைவான். அவ்வகைப் புணர்ச்சியில் சுக்கிலம் சுரோணிதம் வழியே பாயாது. எனவே இருவரும் சந்திர மண்டலத்தில் உள்ள செந்நிறம் உடைய சக்தியாகிய நாதத்தில் திளைத்து இருப்பர்.

 

[Visalakshi Ramani]

#837. ஊர்த்துவரேதசு

திருத்திப் புதனைத் திருத்தல் செய்வார்க்குக்
கருத்தழகாலே கலந்து அங்கு இருக்கில்
வருத்தமும் இல்லையாம் மங்கை பங்கற்கும்
துருத்தியில் வெள்ளியும் சோராது எழுமே.

அறிவைத் திருத்தி அமைத்து, மனத்தைத் தூய்மைப் படுத்தி, கருத்தழகுடன் பரியங்க யோகம் செய்யும் போது. எந்தத் துன்பமும் இராது. உடலில் விந்து நீக்கமும் இராது. அதன் விளைவு என்ன? விந்துவைச் செலுத்தும் காம வாயு மேல் நோக்கிச் செயல்படும் ஊர்த்துவரேதசு வந்து அமையும்.

#838. உடல் உருகும்

எழுகின்ற தீயை முன்னே கொண்டு சென்றிட்டால்
மெழுகு உருகும் பரிசு எய்திடும் மெய்யே
உழுகின்றது இல்லை ஒளியை அறிந்தபின்
விழுகின்றது இல்லை வெளி அறிவார்க்கே.

சுவாதிஷ்டானத்தில் உள்ள காமத்தீயை மேலே ஏற்றிப் புருவ மத்திக்குக் கொண்டு செல்ல வேண்டும். அப்போது தீயின் முன் வைத்த மெழுகைப் போல யோகியின் உடல் உருகிவிடும். புருவ மத்தியைத் தாண்டிச சென்று துவாசாந்தப் பெருவெளியையும் அங்குள்ள ஒளியையும் அறிந்தவரின் உடல் ஒருநாளும் கீழே விழாது. மெழுகு போல உருகிவிடும்.

#839. ஒளி தெரிந்தால் உலகம் தெரியாது

வெளியை அறிந்து வெளியின் நடுவே
ஒளியை அறியின் உளிமுறி ஆமே
தெளிவை அறிந்து, செழு நந்தியாலே
வெளியை அறிந்தனன் மேல் அறியேனே.

வானத் தானத்தை அறிந்து கொண்டு, அங்கே விளங்கும் பொன்னிற ஒளியைக் காண அறிந்து கொண்டால் என்ன ஆகும்? உள்ளம் வேறுபடாமல் தெளிந்த ஞானம் கிடைக்கும். சிவன் அருளால் வானமும் அதன் நடுவில் ஒளியும் தெரியும். வேறு எதுவும் தெரியாது. ஒளி தெரிந்தால் உலகம் தெரியாது.

#840. உடலில் உறையும் தெய்வங்கள்

மேல்ஆம் தலத்தில் விரிந்தவர் ஆர்எனின்,
மால்ஆம் திசைமுகன் மாநந்தி யாயவர்
நால்ஆம் நிலத்தின் நடுஆன அப்பொருள்
மேலாய் உரைத்தனர் மின் இடையாளுக்கே.

ஒருவருக்கு மேலாக ஒருவர் என்று நம் உடலில் விளங்கும் தெய்வங்கள் யார் யார்? திருமால், நான்முகன், உருத்திரன், பராசக்தி, பரமசிவம் என்னும் தெய்வங்கள் நம் உடலில் உறைகின்றனர். துரிய பூமியில் பராசக்தியை விட மேலே இருப்பான் சிவன்.

 

[Visalakshi Ramani]

#841 to #844

#841. நெடுங்காலம் வாழ இயலும்

மின்இடை யாளு மின்னாளனும் கூட்டத்துப்
பொன்இடை வட்டத்தின் உள்ளே புகப்பெய்து
தன்னோடு தன்னைத் தலைப்பெய்ய வல்லிரேன்
மண் இடைப் பல்ஊழி வாழ்தலும் ஆமே.

மின்னல் போன்ற இடையை உடைய சக்தி தேவியையும், அவளை ஆளும் சிவனையும், அவர்கள் கூட்டத்தையும் பொன் ஒளி கொண்ட வானத்தில் நிலை பெறச் செய்ய வேண்டும். அந்தக் கூட்டத்தில் தன் ஆன்மாவையும் காண அறிந்தவர் இந்த உலகில் நெடுங்காலம் வாழ இயலும்.

#842. ஆன்மாவே யாகப் பொருள்

வாங்கல் இருதலை வாங்கிலில் வாங்கிய
வீங்க வலிக்கும் விரகு அறிவார் இல்லை
வீங்க வலிக்கும் விரகு அறிவாளரும்
ஓங்கிய தன்னை உதம் பண்ணினாரே.

காம வாயுவை உள்ளே இழுத்துச் சுக்கிலம் கெடுமாறு செய்தலையும், அவ்வாறு உள்ளே இழுத்த காம வாயுவை மேலே செலுத்தும் வழியினை அறிபவர் இல்லை. அத்தகைய மாற்றங்களைச் செய்ய அறிந்து கொண்டவர் தன்னையே சிவனிடம் ஹோமப் பொருளாக அர்ப்பணிப்பவர் ஆவார்.

#843. முடி கறுக்கும்!

உதம் அறிந்து அங்கே ஒருசுழிப் பட்டால்
கதம் அறிந்து அங்கே கபாலம் கறுக்கும்
இதம் அறிந்து எ ன்றும் இருப்பாள் ஒருத்தி
பதம் அறிந்தும் உளே பார் கடிந்தாளே.

ஆன்மாவை இறைவனுக்கு ஓமப் பொருளாக்கி அதைச் ஸஹஸ்ர தலத்தில் பொருத்தினால், அப்போது தலை மயிர் கறுத்து விடும்.சக்தியும் அவனது இதம் அறிந்து செயல் புரிவாள். அவன் பக்குவத்தை அறிந்து கொண்டு, பிருத்விச் சக்கரத்தின் செயலை மாற்றி அருளுவாள் . மேலே சென்று விட்ட காம வாயு மீண்டும் கீழே சென்று விடாமல் தடுப்பாள்.

#844. அடியும் இல்லை நுனியும் இல்லை!

பார் இல்லை, நீர் இல்லை, பங்கயம் ஒன்று உண்டு;
தார் இல்லை, வேர் இல்லை, தாமரை பூத்தது ;
ஊர் இல்லை, காணும் ஒளி அது ஒன்று உண்டு
கீழ் இல்லை, மேல்இல்லை, கேள்வியிற் பூவே.

ஆயிரம் இதழ்த் தாமரை ஒன்று உண்டு. ஸஹஸ்ரதளம் என்று அதன் பெயர். அது சிதாகாசத்தில் இருப்பதால் அங்கு நிலமோ நீரோ இல்லை! இந்தத் தாமரை மலர்ந்தே உள்ளது. அதனால் அதற்கு அதற்கு மொட்டும் இல்லை, வேரும் இல்லை. அதில் ஒளியால் நிரம்பி உள்ளது. ஒளி எங்கும் பரவி இருப்பதால் அதற்குக் குறிப்பிட்ட இடம் என்று எதுவும் இல்லை. நாதத்துக்குக் காரணம் இந்த தாமரையே என்றாலும் அதற்கு அடியும் இல்லை நுனியும் இல்லை!

 

[Visalakshi Ramani]

20. அமுரி தாரணை

20. அமுரி தாரணை
அமுரி = வீர்யம்
வீர்யம் உடலில் தங்குவதற்குச் செய்ய வேண்டியவை

#845 to #847

#845. வருந்தாமல் இருக்கும் வழி

உடலில் கிடந்த உறுதிக் குடிநீர்
கடலில் சிறு கிணறு ஏற்றம் இட்டால் ஒக்கும் ;
உடலில் ஒருவழி ஒன்றுக்கு இறைக்கில்
நடளிப் படாது உயிர் நாடலும் ஆமே

உடலுள் நீங்காது இருந்து உறுதியை அளிப்பது உணர்வு நீர் ஆகும். கடலின் அருகே ஒரு சிறு கிணறு தோண்டிவிட்டு அதன் நீரை ஏற்றம் இட்டு இறைக்கலாம். அதைப் போன்றே உடலில் கீழே செல்லும் உணர்வு நீரை வேறு வழியாக மேலே போகச் செய்யலாம். அப்படிச் செய்வதன் மூலம் உயிர் வருத்தம் அடையாமல் காப்பாற்றலாம்.

#845. விளக்கம்

உடலில் உள்ள அமுதமயமான வீரியத்தை வீணாக்கக் கூடாது. அதை ஓர் ஆக்கப் பொருளாக மாற்ற வேண்டும். உடலில் ஒளியை அமைத்து உடலுக்கு உறுதி தருவது அமுரி நீர். இல்லற வாழ்வில் உள்ளவர்கள் காம வாயு செயல் படும் போது சிவத் தியானம் செய்து போகத்தையே யோகமாக மாற்றி விடுவர். யோகியர் மூல பந்தனம் செய்து, குதத்தை நெருக்கிப் பிடித்து, சிவத்தியானம் செய்து, மூல வாயுவுடன் காம வாயுவைக் கலந்து, உடலுள் மேலே ஏற்றுவர்.

#846. பொன் போல் உடல் ஒளிரும்

தெளிதரும் இந்தச் சிவநீர் பருகில்
ஒளிதரும் ஓராண்டில் ஊனமொன்றில்லை
வளியுறு மெட்டின் மனமும் ஒடுங்கும்
களிதரும் காயம் கனகம தாமே.

தெளிந்த இந்த அமுரியை ஓராண்டு காலம் பருகி வந்தால் உடலில் ஒளியினைக் காண இயலும். கேடற்ற இந்த நீர் காற்றுடன் கலந்து உடலில் மேலே ஏறுவது. எட்டு ஆண்டுகள் பயிற்சி செய்தால் மனம் கீழே நோக்குவதைத் துறந்து விடும். எப்போதும் மேலேயே நிற்கும். உடல் பொன் போல் ஒளிரும். மனம் எப்போதும் மகிழ்வுடன் இருக்கும்.

#847. தலை மயிர் கறுக்கும்

நூறு மிளகு நுகருஞ் சிவத்தினீர்
மாறு மிதற்கு மருந்தில்லை மாந்தர்கள்
தேறில் இதனைத் தெளியுச்சி கப்பிடின்
மாறு மிதற்கு மறுமயிராமே.

சிவ நீர் ஆகிய அமுரி கீழே உள்ள குறியை நெருக்கிப் பிழியும். அதனால் அது உடலில் நீடித்து நிற்கும். இதை விட நல்ல மருந்து வேறு ஒன்றும் இல்லை. மக்கள் இதன் நுட்பத்தை கண்டு கொண்டு அமுரியைத் தலையில் பாயச் செய்தால் வெளுத்த மயிர் மீண்டும் கறுக்கும் விந்தையினைக் காணலாம்

 

[Visalakshi Ramani]

#848 to #850

#848. பருவத்தே பருக வேண்டும்

கரையரு கே நின்ற கானல் உவரி
வரைவரை என்பர் மதியிலா மாந்தர்
நுரைதிரை நீங்கி நுகர வல்லார்க்கு
நரைதிரை மாறு நமனுமங் கில்லையே.

மதி இல்லாத மாந்தர்கள் சிறு நீர் குழாய்க்கு அருகில் உள்ள சுக்கிலத்தையும் கழித்து விட வேண்டும் என்பர். தகுந்த பருவத்தில் அமுரி நீரை அருந்த அறிந்து கொண்டவர்களுக்கு வெளுத்த மயிர் மீண்டும் கருக்கும். சுருங்கிய தோல் மாற்றம் அடையும். இங்ஙனம் அமுரி நீரை அமைத்துக் கொள்பவர்களுக்குக் கூற்றுவனால் அச்சம் இல்லை.

#849. உடல் மென்மையாகும்

அளக நன்னுத லாயோர் அதிசயம்
களவு காயங் கலந்தவிந் நீரில்
மிளகு நெல்லியும் மஞ்சளும் வேம்பிடில்
இளகும் மேனி இருளும் கபாலமே.

அழகிய கூந்தலை உடையவளே! ஒரு விந்தை உள்ளது. மறைவாக இந்த அமுரி நீர் உடலில் மேலே சென்று சிரத்தை அடையும் போது மிளகு, நெல்லி, மஞ்சள், வேப்பம் பருப்பு இவற்றைக் கலந்து நன்றாக அரைத்துத் தலையில் தேய்த்துக் குளித்தால் உடல் மேன்மை அடையும். தலை மயிர் கறுப்பாக ஆகும்.

#850. அமுரியின் பெருமை

வீர மருந்துஎன்றும் விண்ணோர் மருந்து என்றும்
நாரி மருந்து என்றும் அந்தி அருள் செய்தான்,
ஆதி மருந்து என்று அறிவார் அகலிடம்
சோதி மருந்து இது, சொல்ல ஒண்ணாதே.

வீரியத்தால் உண்டாகும் மருந்து இது. எனவே வீர மருந்து என்பர். இது வான் வெளியில் ஒளி மயமாக ஆவதால் விண்ணவர் மருந்து என்பர். பெண் சம்பத்தால் அடையப்படுவதால் இது நாரீ மருந்து எனப்படும். இதுவே முதன்மையான மேலான மருந்து என்று யோகியர் அறிவர். பேரொளி மயமான இதைச் சாமானியமான மனிதர்களுக்குச் சொல்லக் கூடாது.

 

[Visalakshi Ramani]

21. சந்திர யோகம்

21. சந்திர யோகம்
சந்திரனை உடலில் விளங்கச் செய்யும் யோகம் இது

#851 to #853

#851. உடலில் உள்ள சந்திரனின் நிலை

எய்தும் மதிக்கலை சூக்கத்தில் ஏறியே
எய்துவ தூலம் இருவகைப் பக்கத்துள்
எய்தும் கலைபோல ஏறி இறங்குமாம்
துய்யது சூக்கத்துத் தூலத்து காயமே.

சந்திர கலை பருவுடலில் இருந்து நுண்ணுடலுக்கு ஏறும். பிறகு நுண்ணுடலிலிருந்து பருவுடலுக்கு இறங்கும். இரண்டு பக்ஷங்களில் வளர்பிறையில் வளர்ந்தும், தேய் பிறையில் தேய்ந்தும் வரும் நிலவைப் போலவே இதுவும் அமையும். சந்திர கலையால் நுண்ணுடல் எத்தனை தூய்மை அடைகின்றதோ அதற்கேற்ப பருவுடலும் தூய்மை அடையும்.

#852. யோகியர் நன்கு அறிவர்.

ஆகின்ற சந்திரன் சூரியன் அங்கியுள்
ஆகின்ற ஈர் எட்டொடு ஆறு இரண்டு ஈர்ஐந்துள்
ஏகின்ற அக்கலை எல்லாம் இடைவழி
ஆகின்ற யோகி அறிந்த அறிவே.

உடலுள் விளங்கும் சந்திரனுக்கும் பதினாறு கலைகள் உண்டு. உடலுள் விளங்கும் சூரியனுக்குப் பன்னிரண்டு கலைகளும், அக்கினிக்குப் பத்துக் கலைகளும் உள்ளன. இவை அனைத்தும் நடுநாடியாகிய சுழுமுனை வழியே இயங்குபவை என்பதை யோகியர் நன்கு அறிவர்.

#853. கதிரவனும், தீயும், நிறைமதியும்!

ஆறுஆறு அது ஆம்கலை ஆதித்தன், சந்திரன்
நாறா நலங்கினார், ஞாலம் கவர்கொளப்
பேறுஆம்; கலை முற்றும் பெறுங்கால் ஈரெட்டும்
மாறாக் கதிர்கொள்ளும், மற்றங்கி கூடவே.

பன்னிரண்டு கலைகளை உடைய சூரியனைச் சந்திரனுடன் சேர்க்க அறிந்து கொண்டவர் உலகம் விரும்பும் பேறுகளை அடைவர். பதினாறு கலைகள் கொண்ட சந்திரனில் சூரியன் மட்டுமின்றி அக்கினியும் ஒடுங்கும்

 

[Visalakshi Ramani]

#854 to #856

#854. பிரணவம் அறுபத்து நான்கு கலைகளாகப் பரிமளிக்கும்.

பத்தும் இரண்டும் பகலோன் உயர்கலை
பத்தினொடு ஆறும் உயர்கலை பால் மதி,
ஒத்தநல் அங்கியது எட்டு எட்டு உயர்கலை
அத்திறன் நின்றமை ஆய்ந்து கொள்வீரே.

கதிரவனின் கலைகள் பன்னிரண்டு. பால் போன்ற நிலவின் கலைகள் பதினாறு. இவற்றுடன் அக்கினியின் கலைகள் இணையும் போது அறுபத்து நான்கு கலைகளாகப் பரிமளிக்கும். இதை நன்கு ஆராய்ந்து உணர்ந்து கொள்ள வேண்டும்.
தலைக்கு மேல் கலைகள் அறுபத்து நான்காக விளங்கும். அவையே பிரணவத்தின் கலைகள் ஆகும்.

#855. தொண்ணூற்றாறு கலைகள்

எட்டெட்டு அனலின் கலையாகும் ஈராறுள்
சுட்டப் படுங்கதி ரோனுக்கும் சூழ்கலை
கட்டப்படும் ஈர் எட்டா மதிக்கலை
ஓட்ட படாஇவை யொன்றொடொன்றாகவே.

அக்கினிக் கலைகள் அறுபது நான்கு. சூரியனின் கலைகள் பன்னிரண்டு. சந்திரனின் கலைகள் பதினாறு. இவை கட்டப் படும் மூலாதாரத்தின் நாள்மீனுக்கு நான்கு கலைகள். மொத்தம் தொண்ணூற்றாறு கலைகள் கூடித் தொழில் புரியும்.

#856. மூலாதாரத்தில் தொண்ணூற்றாறு கலைகள் உள்ளன

எட்டெட்டும், ஈராறும், ஈரெட்டும், தீக்கதிர்
சுட்டிட்ட சோமனில் தோன்றும் கலை என்ப
கட்டப்படும் தாரகைக் கதிர் நால்உள;
கட்டிட்ட தொண்ணூற்றோடு ஆறும் கலாதியே.

அக்கினி, கதிரவன், சந்திரனின் இவற்றின் கலைகள் முறையே அறுபத்து நான்கு, பன்னிரண்டு, பதினாறு என்பர். இவை சேர்ந்துள்ள மூலாதாரத்தில் உள்ள நட்சத்திரத்துக்கு உள்ளன நான்கு கலைகள். இவ்வாறு மூலாதாரத்துடன் இணைக்கப்பட்டுள்ள கலைகள் மொத்தம் தொண்ணூற்றாறு ஆகும்.

 

[Visalakshi Ramani]

#857 to #859

#857. யோகியரின் சிவத்தியானம்

எல்லாக் கலையும் இடை, பிங்கலை, நடுச்
சொல்லா நடுநாடி ஊடே, தொடர் மூலம்
செல்லா எழுப்பிச் சிரத்துடன் சேர்தலால்
நல்லோர் திருவடி நண்ணி நிற்பாரே.

சந்திரன், சூரியன், அக்கினி இவற்றின் எல்லாக் கலைகளும் இடைகலை, பிங்கலை நடுநாடி இவற்றின் வழியே தொடர்பு உடையவை. இயல்பாகக் கீழே நோக்கும் இவற்றைத் தடுத்து, அவற்றை பார்வையை மாற்றிச் சிரசின் மேல் உள்ள சஹஸ்ரதளத்தில் பொருந்தி இருக்கும்படிச் செய்வர் சிவ யோகியர். அதனால் அவர்கள் எப்போதும் சிவத் தியானத்திலேயே பொருந்தி இருப்பர்.

#858. சந்திர மண்டலம் காணும்

அங்கியில் சின்ன கதிர் இரண்டு ஆட்டத்துத்
தங்கிய தாரகை ஆகும் சசி பானு
வாங்கிய தாரகை ஆகும் பரை ஒளி
தங்கு நவச் சக்ரம் ஆகும் தரணிக்கே.

மூலாதாரத்தில் உள்ள அக்கினி, இடைகலை, பிங்கலைகளின் அசைவினால் ஒளிரும். சந்திரக் கலைகள், சூரியக் கலைகள் நாதத்தை எழுப்பிக் கொண்டு உடலில் மேலே செல்லும். அப்போது அவை நாள்மீன்களைப் போலத் ஒளியுடன் தோன்றுவதால் அங்கே சந்திர மண்டலம் போலக் காட்சி அளிக்கும்.

#859. பிரணவம் என்னும் பெருநெறி

தரணி சலம் கனல் கால் தக்க வானம்
அரணிய பானு, அருந்திங்கள் அங்கி
முரணிய தாரகை முன்னிய ஒன்பான்
பிரணவம் ஆகும் பெருநெறிதானே.

நிலம், நீர், ஒளி, வளி, வெளி, சூரியன், சந்திரன், அக்கினி, சீவ ஒளி என்னும் ஒன்பதும் பிரணவம் என்னும் பெருநெறியாகும்.

 

[Visalakshi Ramani]

#860 to #862

#860. வளர்பிறை, தேய்பிறை வேறுபாடு.

தாரகை மின்னும் சசிதேயும் பக்கத்துத்
தாரகை மின்னா சசிவளர் பக்கத்துத்
தாரகைப் பூவில் சகலத்து யோனிகள்
தாரகை தாரகை தான் ஆம் சொரூபமே.

தேய் பிறையில் சந்திரன் கீழ் முகமாகப் போகும். அப்போது மூலாதாரத்தில் ஒளி பிரகாசமாகும். வளர் பிறையில் சந்திரன் மேல் முகமாகப் போகும் போது மூலாதாரம் பிரகாசிக்காது. மூலாதாரத்தில் உள்ள ஒளியில் எல்லா யோனிகளும் இருக்கின்றனன. சீவனின் வடிவம் மூலாதாரச் சக்கரத்துக்குக் காரணமான ஒளியைப் பொறுத்து அமையும்.

தேய்பிறையில் மூலாதாரத்தின் சக்தி அதிகரிக்கும்
வளர்பிறையில் மூலாதாரத்தின் சக்தி குறையும்.
அப்போது சீவனின் மனம் மேல் நிலையை நாடும்.

#861. வளர்பிறை அறிந்தால் திருவடி சேரலாம்

முற்பதி னைஞ்சின் முளைத்துப் பெருத்திடும்
பிற்பதி னைன்சிற் பெருத்துச் சிறித்திடும்
அப்பதி னைஞ்சு மறிய வல்லார்க்குச்
செப்பரி யான்கழல் சேர்தலு மாமே.

சந்திரனின் கலைகள் முதல் பதினைந்து நாட்கள் சிறிது சிறிதாக வளர்ந்து முழுமை அடையும். அடுத்த பதினைந்து நாட்கள் சிறிது சிறிதாகத் தேய்ந்து குறைந்து விடும். ‘அ ‘ என்ற எழுத்தால் குறிக்கப்படும் நிலவின் வளர்பிறையை நன்கு அறிந்தவர் செப்பரிய பெருமை வாய்ந்த சிவன் அடிகளைச் சேரவும்.

#862. பிரணவம் ஒளிரும்

அங்கி எழுப்பி அருங்கதிர் ஊட்டத்துத்
தங்கும் சசியால்; தாமம் ஐந்தும் ஐந்து ஆகிப்
பொங்கிய தாரகையாம் புலன் போக்கு அற,
திங்கள், கதிர், அங்கி சேர்கின்ற யோகமே.

மூலாதாரத்தில் உள்ள தீயை எழுப்ப வேண்டும். அது கதிரவன் மண்டலத்தைத் தாண்டி சந்திர மண்டலத்தை அடையும் போது ‘அ ‘ , ‘உ’ , ‘ம’ நாதம், விந்து என்ற ஐந்தும் கலந்த பிரணவம் விளங்கும். ஐம் புலன்கள் வழியே செல்லாமல் சந்திர, சூரிய, அக்கினி மண்டலங்கள் இணைகின்ற நல்ல யோகம் வாய்க்கும்.

 

[Visalakshi Ramani]

#863 to #865

#863. பிறப்பு இறப்பு என்னும் சக்கரம்

ஒன்றிய ஈரெண் கலையும் உடல்உற,
நின்றது கண்டும் நினைக்கிலர் நீதர்கள்
கன்றிய காலன் கருத்துழி வைத்தபின்
சென்று அதில் வீழ்வார் திகைப்பு ஒழியாரே.

உடலில் சந்திரனின் பதினாறு கலைகளும் பொருந்தியுள்ளதை அறிகிலார் தாழ்ந்த அறிவு கொண்டவர். இந்த உண்மையை அறியாமல் அவர்கள் வாழ்வதால் கூற்றுவன் சினம் கொண்டு அவர்களுடைய ஆவியைப் பறிக்கின்றான். அவர்களும் அவன் விருப்பபடியே பிறப்பு இறப்பு என்னும் சுழலில் வீழ்கின்றனர். மயக்கத்திலிருந்து நீங்க மாட்டார்.

#864. பிரணவம் விளங்கும்

அங்கி மதிகூட ஆகுங் கதிரொளி
அங்கி கதிர்கூட வாகும் மதியொளி
அங்கி சசிகதிர் கூடவத் தாரகை
தங்கி யதுவே சகலமு மாமே.

சந்திரன் ஆண் குறியில் பொருந்தி உள்ளான். கதிரவன் மணி பூரகத்தில் பொருந்தி உள்ளான். மூலாக்கினியுடன் சந்திரன் பிரமரந்திரத்தை நோக்கி மேலே செல்லும் போது கதிரவனின் ஒளியும் கிடைக்கும். இந்த மூன்று ஒளிகளும் பிரமரந்திரத்தில் ஒன்றானால் அப்போது பிரணவம் விளங்கும். அந்த நிலையே எல்லாமும் ஆகும்.

#865. நிலைத்த இன்பம் கிட்டும்

ஈராறு பெண்கலை யெண்ணிரெண் டாண்கலை
போராமற் புக்குப் பிடித்துக் கொடுவந்து
நேராகத் தொன்றும் நெருப்புற வேபெய்யில்
ஆராத ஆனந்த மானந்த மானதே.

பன்னிரண்டு கலைகள் கொண்ட கதிரவன் ஒரு பெண். பதினாறு கலைகள் கொண்ட சந்திரன் ஒரு ஆண். இவர்கள் இருவரையும் வெளியில் செல்லாதவாறு பிடித்து நிறுத்தி முகத்துக்கு முன்னே தோன்றும் ஒளியில் கலக்கும்படிச் செய்தால் நிலைத்த திருவடி இன்பம் கிடைக்கும்

 

[Visalakshi Ramani]

#866 to #868

#866. ஆயிரம் ஆண்டுகள் வாழலாம்

காணும் பரிதியின் காலை இடத்திட்டு
மாணும் மதியதன் காலை வளத்திட்ட்டுப்
பேணியே இவ்வாறு பிழையாமல் செய்வீரேல்
ஆணி கலங்காதவ் வாயிரத் தாண்டே.

சிறந்த சந்திரனின் நோக்கு இடக் கண் நோக்கு. கதிரவனின் நோக்கு வலக் கண் நோக்கு. குரு அருளிய வழியில் இடக் கண் நோக்கினை வலக்கண் நோக்குடன் பொருத்தி அது முறை தவறாமல் பாதுகாத்து வந்தால் ஆயிரம் ஆண்டுகளுக்கு உடல் கெடாது வாழலாம்.

#867. ஞானம் தோன்றும் முன் நாதம் கேட்கும்!

பாலிக்கும் நெஞ்சம் பறையோசை ஒன்பதில்
ஆலிக்கும் அங்கே அமரர் பராபரன்
மேலைக்கு முன்னே விளக்கொளியாய் நிற்கும்
காலைக்குச் சங்கு கதிரவன் தானே.

சீவக் கலை உடலில் மேலே மேலே செல்லும் போது கதிரவனும் சந்திரனும் இரு பக்கங்களிலும் தீபஒளி போலத் தோன்றுவார்கள். சீவக் கலை ஸஹஸ்ரதளத்தை அடையும் போது தலையில் ஒரு நாதம் ஒலிக்கும். அந்த நாதத்தில் சிவ பெருமான் திகழ்வான். கதிரவனின் உதயத்துக்கு முன்பு சங்கொலி மக்களைத் தட்டி எழுப்புவது போன்றே ஞான சூரியன் உதிக்கும் முன்பு தலையில் இந்த நாதம் ஒலிக்கும்.

#868. ஈசன் வெளிப்படுவான்!

கதிரவன் சந்திரன் காலம் அளக்கும்
பொதிர் அவன் உள்ளே பொழி மழை நிற்கும்
அதிரவன் அண்டப்புறம் சென்று அடர்ப்ப,
எதிரவன் ஈசன் இடம் அது தானே.

காலத்தைக் கணிப்பதற்குச் சூரிய சந்திரர்களின் இயக்கம் பயன்படும். உடலில் இவர்கள் இருவரும் ஒன்றாகப் பொருந்தியுள்ள பிரணவ நிலையில் சிவ சக்தியர் விளங்குவர். அவர்கள் இருவரும் ஒன்று சேரும் போது அங்கே அமுதம் விளையும். நாதத்துடன் கூடி உடலில் உள்ள அண்டத்தின் எல்லையான துவாதசாந்தத்துக்குச் செல்லும் போது ஈசன் அங்கே வெளிப்பட்டு நமக்கு எதிர்ப்படுவான்.