எண்ண அலைகள்....

[Raji Ram]

Share:

Facebook X (Twitter) LinkedIn WhatsApp Email Share Link

எவ்வளவு நேரம் ஆகும்?

நெஞ்சை நிறைக்கும், அரிய பெரிய கோவிலான,
தஞ்சைப் பெரிய கோவிலைக் காண, ஆவலுடன்,

வந்து இறங்கினார் தஞ்சையில் ஒருவர்; வழியில்
வந்த சிறுவனிடம், 'கோவிலை அடைய எத்தனை

நேரம் ஆகும்', என்று கேட்க, அவனோ சிரித்தபடி,
'நேரம் இருபது நிமிடம் ஆகும், நடந்து போனால்;

ஐந்து நிமிடமே ஆகும், நாய் ஒன்று துரத்தினால்',
என்று சொல்லி, வேகம் எடுத்து, ஓட்டமாய் ஓட,

சிறுவனிடம் கேட்டது, தனது தவறு என எண்ணி,
பெரியவர் ஒருவர், வீட்டு வாசல் திண்ணையில்,

செய்தித்தாள் வைத்து அமர்ந்திருந்த, அவரிடம்
செய்தி அறிய, அருகில் சென்றபின், மறுபடியும்

அதே கேள்வியைக் கேட்க, அவரோ ஒரு நிமிடம்
ஏதோ யோசனை செய்வதுபோலப் பார்த்து, பின்

தன்னுடைய படிப்பைத் தொடர்ந்தார், குனிந்தபடி!
தன்னுடைய நேரம் சரியில்லை எனச் சலித்தபடி,

இவர் நடந்து பத்து அடி செல்ல, அந்தப் பெரியவர்,
இவரைக் கைதட்டி அழைத்தார், அருகில் வந்திட!

'முப்பது நிமிடம் ஆகும், நீங்கள் கோவில் அடைய',
என்றது கேட்டதும், இவருக்கு மிகவும் கோபம் ஏழ,

'நான் கேட்டபோதே சொல்லாமல், பத்து அடிகள்
நான் போன பின், அழைத்துச் சொல்லுகின்றீரே?'

எனக் கேட்டதும், அவர் மெதுவாகச் சொன்னார்,
'மெனக்கெடுத்துவது என் நோக்கமல்ல; நீங்கள்

நடக்கும் வேகத்தைப் பார்க்கவே விரும்பினேன்!
நடக்கும் வேகம் பார்த்தபின், பதில் சொன்னேன்!'

:kev: . . . eace:

 

[Raji Ram]

வள்ளுவரைப் போற்றுவோம் ..... 284

பெருமையும் சிறுமையும்

பெருமையின் குணங்களை வள்ளுவர் உரைத்து,
சிறுமையின் இழி குணங்களையும் உரைக்கிறார்.

தன்னுடைய பெருமை பேசிக்கொண்டு திரிவதே,
தன் மதிப்பை உயர்த்தும் என்று சிலர் நினைப்பார்.

ஆணவம் இன்றி அடக்கமாக இருப்பதே பெருமை;
ஆணவத்தின் எல்லைக்கே செல்லுவது சிறுமை!

'பெருமை பெருமிதம் இன்மை சிறுமை
பெருமிதம் ஊர்ந்து விடல்', எனக் குறள்.

குறைகள் இல்லாத மனிதர்களே இல்லை, உலகில்;
குறைகள் காணுவதே சிலருக்கு வேலை, உலகில்!

மற்றவரின் குறைகளை மறைப்பதுதான் பெருமை;
மற்றவரின் குறைகளையே காண்பதுதான் சிறுமை.

'அற்றம் மறைக்கும் பெருமை சிறுமைதான்
குற்றமே கூறி விடும்', என்பது அரிய குறட்பா.

குற்றம் காணும் கீழான குணத்தை நாம் மறப்போம்!
குற்றம் மறந்து, சுற்றம் சூழவே வாழ்ந்து சிறப்போம்!

:grouphug:

 

[Raji Ram]

வள்ளுவரைப் போற்றுவோம் ..... 285

சான்றாண்மை

நற்குணங்கள் பல நிறைந்து விளங்கும் பெரியோர்,
அற்புதமான சான்றோராய் விளங்குவார், உலகில்.

சான்றாண்மை பற்றித் தெளிவாக எடுத்துரைக்க,
சான்றாண்மை என ஓர் அதிகாரம் வள்ளுவத்தில்.

ஆற்ற வேண்டிய கடமைகளை அறிந்து, பண்புடன்
ஆற்றுவோருக்கு, நல்லவை எல்லாம் கடமைகளே!

'கடனென்ப நல்லவை எல்லாம் கடனறிந்து
சான்றாண்மை மேற்கோள் பவர்க்கு'.

அழகாக இருப்பதை எல்லோருமே விரும்பிடுவர்;
அழகின் இரகசியத்தை, வள்ளுவர் உரைக்கின்றார்.

நற்குணம் என்பது மட்டுமே சான்றோருக்கு அழகு;
மற்ற எதுவுமே அழகு என்று கொள்ள முடியாதது!

'குணநலம் சான்றோர் நலனே பிறநலம்
எந்நலத்து உள்ளதூஉம் அன்று', என்கிறார்.

நற்குணத்துடன், நம் கடமைகளை ஆற்றுவோம்;
நற்குணமே அழகின் இரகசியம் என அறிவோம்!

:angel: . . . :first:

 

[Raji Ram]

புற அழகு...

அழகு மேம்படுத்த, பெண்களே முயன்றனர் முன்பு!
அழகு மேம்படுத்த, ஆண்களும் விழைவார் இன்று!

அக அழகு தேவை என்று எத்தனை சொன்னாலும்,
அதை பலரும் ஏற்க நாட்டம் கொள்ளுவதில்லை!

வள்ளுவர், சான்றோர்கள்தானே அக அழகினைக்
கொள்ள வேண்டுமெனச் சொன்னார்? அதனால்,

சான்றோராக இருப்பதைவிட, புற அழகு கொண்டு,
சாதாரணமாக இருக்கவே ஆசையும் வருகிறதோ?

வள்ளுவம் வாழ்க!! :hail: ... :hail:

 

[Raji Ram]

வள்ளுவரைப் போற்றுவோம் ..... 286

சான்றாண்மையும், அதன் சிறப்பும்.

எதிலும் பட்டியல் இட்டு வழிகாட்டும் வள்ளுவர்,
இதிலும் பட்டியல் ஒன்றை அழகாகத் தருகிறார்.

அன்பு காட்டுதல்; பழி புரிய நாணம் கொள்ளுதல்;
பண்புடன் ஒழுக்கம் காத்தல்; இரக்க மனமுள்ள

நல்ல கண்ணோட்டம்; வாய்மை கூறி இருத்தல்;
நல்ல சான்றாண்மைக்கு இவை ஐந்து தூண்கள்!

'அன்புநாண் ஒப்புரவு கண்ணோட்டம் வாய்மையோடு
ஐந்துசால்பு ஊன்றிய தூண்', என நீண்ட குறள்!

நோன்பு என்பது, பிற உயிரைக் கொல்லாதிருந்து,
அன்புடன் அற வழியிலே நடப்பதைக் குறிக்கும்;

சால்பு என்பது, பிறர் புரியும் தீமைகளை எல்லாம்
பண்பு கருதிக் கூறாமலே இருப்பதைக் குறிக்கும்.

'கொல்லா நலத்தது நோன்பு பிறர்தீமை
சொல்லா நலத்தது சால்பு', என்பது குறள்.

ஆற்றல் மிகுந்தவரின் ஆற்றலே பணிவு; அந்த
ஆற்றலே, பகைமை மாற்றும் படையும் ஆகும்!

'ஆற்றுவார் ஆற்றல் பணிதல் அதுசான்றோர்
மாற்றாரை மாற்றும் படை', என்கிறார் அவர்.

பிறரின் தீமைகளைச் சொல்லாது இருப்போம்;
பணிவின் நலமறிந்து, பரிவுடன் வாழ்வோம்!

:fish: . . :nono: . . :grouphug:

 

[Raji Ram]

சான்றோர் வேஷம்!

'கொல்லா நலத்தது நோன்பு பிறர்தீமை

சொல்லா நலத்தது சால்பு', என்பது குறள்.


இந்தக் குறளைத்தான் தவறாகவே புரிந்துகொண்டு,

எந்தத் தவறு எவர் செய்தாலும், காணாமல் விட்டு,

சான்றோர் நாங்கள் எனச் சொல்லுவதையே, இன்று

சான்றோர் வேஷமிட்டுச் சிலர், செய்கின்றார் நன்று!

:angel: . . . :drama:

 

[Raji Ram]

வள்ளுவரைப் போற்றுவோம் ..... 287

சால்பும் அதன் தன்மையும்...

தோல்வியை ஒப்புக்கொள்ளும் பக்குவம், எல்லாத்
தோல்வி பெற்றவரும் பெற்றது இல்லை எனலாம்.

தனக்கு நிகர் இல்லாதவரிடமே தோற்றாலும்கூட,
மனப்பக்குவத்தால் அதை ஏற்றுக்கொள்வதுதான்

நல்ல மேன்மையான சால்பின் உரைகல் என்பதை,
தெள்ளத் தெளிவாக உரைக்கிறார், திருவள்ளுவர்.

'சால்பிற்குக் கட்டளை யாதெனின் தோல்வி
துலையல்லார் கண்ணும் கொளல்', இது குறள்.

நமக்கு நன்மை செய்வோரும், தீமை செய்வோரும்
நம் சுற்றத்தில் இருப்பார்கள்; தீமை செய்வோருக்கு,

நன்மையே திரும்பச் செய்யாவிட்டால், சால்பெனும்
தன்மை உள்ளதால் என்ன பயன், என வினவுகிறார்!

'இன்னாசெய் தார்க்கும் இனியவே செய்யாக்கால்
என்ன பயத்ததோ சால்பு', என்பது அவரின் வினா.

தீமை செய்தோருக்கு, நன்மை செய்யாவிட்டாலும்,
தீமை அவருக்குச் செய்திடாத தன்மை பெறுவோம்!

:angel:

 

[Raji Ram]

வள்ளுவரைப் போற்றுவோம் ..... 288

சான்றாண்மையின் உறுதி...

வறுமை என்பது செல்வம் இல்லாத கொடுமைதான்;
வறுமையும் இழிவு இல்லை, சான்றாண்மை என்னும்

செல்வத்தை உறுதியாகப் பெற்றவருக்கு, என்பதைச்
சொல்லுகிறார் திருவள்ளுவர், அழகிய குறட்பாவில்.

'இன்மையும் ஒருவர்க்கு இளிவன்று சால்பென்னும்
திண்மையுண் டாகப் பெறின்', என்பது குறள் ஆகும்.

எல்லாக் கடல்களும் பொங்கி எழும் ஊழி ஆயினும்,
எல்லாக் கடமைகளும் தவறாது செய்வோரே, தமது

நிலை மாறாத சால்பின் கடல் என்று கூறப்படுவார்.
இதை நாம் தெரிந்துகொள்ள, குறளைப் பார்ப்போம்.

'ஊழி பெயரினும் தாம்பெயரார் சான்றாண்மைக்கு
ஆழி எனப்படு வார்', எனக் கூறுகின்றார் வள்ளுவர்.

சான்றோரிடம் இருந்து சால்பு என்னும் நற்பண்புகள்
சென்று குறைந்துவிட்டால், நாம் வாழ்கின்ற பூமியே

தன் பாரத்தைத் தாங்காது வலுவிழக்கும், என்பதைத்
தன் குறட்பாவில் நமக்கு உரைக்கின்றார் வள்ளுவர்.

'சான்றவர் சான்றாண்மை குன்றின் இருநிலத்தான்
தாங்காது மன்னோ பொறை', என்பது அந்தக் குறள்.

நம் கடமைகளைத் தவறாது செய்யும் குணம் பெற்று,
நம் சான்றாண்மைக்கு அடித்தளம் அமைத்திடுவோம்!

:first:

 

[Raji Ram]

வள்ளுவரைப் போற்றுவோம் ..... 289

நற்பண்பு...

நற்பண்பு என ஓர் அதிகாரம் அமைத்து, அழகிய
சொற்களால் நமக்கு வழிகாட்டுகிறார், வள்ளுவர்.

எளிய உபாயம் ஒன்றை உரைத்து, அதன் மூலம்,
அரிய நற்பண்பை நாம் பெற்றிடலாம், என்கிறார்!

நம்மிடம் யார் வந்தாலும், அவரிடம் எளிமையாக
நாம் பழகுவதே பண்புடைமை என்பார் உலகினர்.

'எண்பதத்தால் எய்தல் எளிதென்ப யார்மாட்டும்
பண்புடைமை என்னும் வழக்கு', என்பது குறட்பா.

அன்புடன் பழகுதல், உயர் குடியின் இலக்கணமான
பண்பு பெறுதல், இவையே பண்புடைமை எனப்படும்.

'அன்புடைமை ஆன்ற குடிப்பிறத்தல் இவ்விரண்டும்
பண்புடைமை என்னும் வழக்கு', என்பது குறளமுதம்.

மனிதர்களுக்கு எல்லாம் அங்கங்கள் ஒருபோலவே;
மனிதர்களின் பண்புகளில்தான் வேறுபாடு இருக்கும்.

உறுப்புக்கள் மனிதர்போல் இருப்பவர் மனிதர் அல்ல;
இருக்கும் நற்பண்புகளால் அவர்கள் மனிதர் ஆவார்.

'உறுப்பொத்தல் மக்களொப்பு அன்றால் வெறுத்தக்க
பண்பொத்தல் ஒப்பதாம் ஒப்பு', என்பது அவர் வாக்கு.

நற்பண்புகள் நமக்குத் தேவையென அறிந்திடுவோம்;
நற்பண்புகளைப் பெற்று மனிதராக வாழ்ந்திடுவோம்!

:first:

 

[Raji Ram]

உயர் குடிப் பண்புகள்...

உயர் குடியை, குலம் என்று வைத்துக்கொண்டால்,
உயர் குடியில் பிறப்பது எல்லோராலும் முடியாது!

உயர் குடியினர் பெறவேண்டிய நல்ல பண்புகளை,
பிறர் போற்ற, நாமும் மேற்கொள்ளுதல் முடியும்!

உருவத்தில் மட்டும் மனிதனின் சாயலில் இருந்து,
உருவாகும் குணங்களை இழிவாக்கிக் கொள்ளாது,

நற்பண்புகளை ஏற்றுக்கொள்ள நாம் விழைவோம்;
அற்புதமான இந்தப் பிறவியை மேம்படுத்துவோம்!

eace:

 

[Raji Ram]

Thank you very much Prof. Sir!

அறிவு மிக்க பெரியோரிடம் பாராட்டு வாங்குவது, எளிதல்ல!

Regards,
Raji Ram :thumb:

 

[Raji Ram]

ஆண்டவன் அருள்!

ஆண்டவனை நோக்கி அரும் தவம் செய்தான்,
வேண்டிய பெருஞ்செல்வம் பெற்றிட, ஒருவன்!

குறைவாகக் கேட்டால், மனம் மகிழ்ந்து, அந்த
இறைவன் தான் கேட்டதைத் தருவான் என்று,

வினோதமான ஒரு திட்டம் தீட்டினான்; அந்த
வினோதமான தரிசனத்தை எதிர்பார்த்தான்!

தவத்தில் மனம் மகிழ்ந்த இறை, அங்கு வந்து,
'மனத்தில் நினைத்ததைக் கூறு!' எனக் கேட்க,

இறைவனிடம் கேட்டான், முதல் கேள்வியை,
'இறைவா! கோடி ஆண்டுகள் என்றால் என்ன?'

'உன் கோடி ஆண்டுகள், எனக்கு ஒரு நொடியே!'
என்று சொன்னதும், அடுத்த தன் கேள்வியாக,

'ஒரு கோடி ரூபாய் என்றால்?' என்று வினவிட,
'ஒரு கோடி உனக்கு, என் ஒரு பைசா!' என்றான்.

தன் திட்டம் பலிக்கும் என்று நம்பிக் கேட்டான்,
'என் தேவை நூறு கோடிகள்தான்! உங்களுக்கு

அது ஒரு ரூபாய்தானே?' சிரித்தபடி இறைவன்,
'அது சரிதான்! நீ ஒரு நொடி காத்திரு!' என்றான்!

:bump2: . . . :dizzy:

 

[Raji Ram]

வள்ளுவரைப் போற்றுவோம் ..... 290

நல்ல பண்புகள்...

அறநெறிகளை அறிந்து, நீதி தவறாமல், நன்மைகள்
பிறரை அடைந்து, பயன் தருமாறு பணி புரிவோரின்

நல்ல பண்பை, உலகம் பாராட்டும் என்ற கருத்தினை,
நல்ல குறட்பாவாக அமைக்கின்றார், திருவள்ளுவர்.

'நயனொடு நன்றி புரிந்த பயனுடையார்
பண்புள ராட்டும் உலகு'; இது அவர் வாக்கு.

விளையாட்டாகக்கூட எவரையும் இகழ வேண்டாம்;
வினையாக மாறி, அது பல இன்னல்களையே தரும்.

அறிவு சார்ந்த பெரியோர், தம் பகைவரிடம்கூட, தம்
செறிவான பண்பு கெடாமல் நடந்து கொள்ளுவார்.

'நகையுள்ளும் இன்னாது இகழ்ச்சி பகையுள்ளும்
பண்புள பாடறிவார் மாட்டு', என்பது குறளமுதம்.

பண்பாளர்களைச் சார்ந்து இவ்வுலக நடைமுறைகள்,
மாண்பு தவறாது இருத்தல் வேண்டும்; இல்லையேல்

பண்புகள் எல்லாம் அழிந்து, அதனால் இந்த உலகமே
மண்ணுள் புகுந்து, அழிந்து விடும் என எச்சரிக்கிறார்!

'பண்புடையார் பட்டுண்டு உலகம் அதுவின்றேல்
மண்புக்கு மாய்வது மன்', என்பதே எச்சரிக்கை!

பண்புகளில் சிறப்பானவை பெற்று, நாம் உயர்வோம்;
மாண்புடன் வாழ்ந்து, பரந்த இவ்வுலகில் உய்வோம்!

eace:

 

[Raji Ram]

தந்தைக்கு நற்பெயர் !

கொடுங்கோல் ஆட்சி செய்தான் ஒரு அரசன்;
கொடும் நோய் அவனை முதுமையில் தாக்க,

தான் செய்த பாவங்களின் விளைவு அது என,
தன் மந்திரிகளிடம், பிராயச்சித்தம் கேட்டான்!

அரச குமாரன், தந்தைக்கு நற்பெயர் வருமாறு
அரசாட்சி புரிந்தால், முக்தி கிட்டும் என்றனர்!

மகனை அழைத்தான்; தனக்கு நற்பெயர் வந்திட
அவனை ஆட்சி புரியுமாறு வேண்டி, இறந்தான்!

'அப்பாவுக்குப் பிள்ளை தப்பாது பிறப்பான்', என
அக்காலத்திலேயே வழக்கு உண்டு அல்லவா?

கொடுமையின் உருவேதான் அரச குமாரனும்;
வறுமையில் வாடிய மக்களை, காக்கவில்லை!

தந்தைக்கு நற்பெயர் கிடைத்திட, ஒரு வழியை
விந்தையாக நாடினான்; புதிய வரி விதித்தான்!

ஒரு மூட்டை நெல்லுக்கு, ஒரு மூட்டை அரிசி,
இதுவரை தந்தை ஆட்சியில், மக்கள் தந்த வரி!

ஒரு மூட்டை உமிக்கு, ஒரு மூட்டை அரிசியை,
வரியாக இனிமேல் மக்கள் தந்திட வேண்டும்!

மக்கள் அல்லாடினர்; மேலும் துயரம் எய்தினர்;
இக்கட்டில் மாட்டி, நொந்து போய் உரைத்தனர்,

'இந்த அரசனின் தந்தையே மேலானவர்! நாமும்
இந்தத் துன்பம் போல அனுபவிக்கவில்லையே!'

'என் தந்தையின் ஆசைப்படி, அவரைப் போற்ற,
என் அறிவாற்றல் உதவியது' என மகிழ்ந்தான்!

:ballchain: . . . :dance:

 

[Raji Ram]

ரோஜாச் செடி!

பேரரசர் அக்பரின் மனம் கவரும் பட்டத்து ராணி,
பேரரசரின் வாரிசைச் சுமந்திருந்த வேளையில்,

பணிப்பெண்கள் பலர் கூடியிருந்து, கொண்டாடி,
கனிவுடன் கவனித்து, அவளைப் பாதுகாத்தனர்!

ஒரு நாள், அரசர் வேட்டைக்குச் செல்ல, காட்டில்
ஒரு கர்ப்பிணி, ஒரு தோழியுடன் வந்த சமயத்தில்,

கடுமையான வலியால் துடிக்க, சிறிது நேரத்தில்,
அருமையான ஆண் மகவைப் பெற்றெடுத்தாள்!

எந்த சிறப்பு உதவியும் இல்லாது, தனது மகனை
அந்தப் பெண் பெற்றாளே, என வியந்த அரசரும்,

அரண்மனைக்குத் திரும்பி, பணிப்பெண்ளிடம்
அரசிக்குச் செய்யும் சேவைகளை நிறுத்துமாறு

ஆணையிட்டார்! அரசியோ மனம் கலங்கினாள்!
ஆணையை மாற்றும் வழி கேட்க, அழைத்தாள்

அறிவு நிறைந்த அமைச்சர் பீர்பலை, வருமாறு!
அறியாது அரசர் இட்ட ஆணையை அறிந்தவர்,

மறு நாளே, தோட்டக்காரர்களை அழைத்தார்;
ஒருபோதும் ரோஜாச் செடிகளுக்கு தண்ணீரே

பாய்ச்ச வேண்டாம் என்று கேட்டுக்கொண்டார்!
காய்ந்த மண்ணில், செடிகள் வாடின; அரசரும்

கடும் கோபத்துடன் பணியாட்களை அழைத்து,
'விடும் தண்ணீரை ஏன் நிறுத்தினீர்கள்?' எனக்

கேட்டு, அமைச்சரின் உத்தரவு என்று அறிந்து,
கெட்ட கோபத்துடன் பீர்பலை அதட்டியவுடன்,

'காட்டில் வாழும் செடி கொடிகளுக்கு, மழையே
காட்டும் தண்ணீரை! வேறு யார் விடுவார்கள்?'

என்று கூறிச் சிரித்ததும், கோபம் தலைக்கேற,
'நன்று சொன்னீரே! காட்டுச் செடியும், அருமை

ரோஜாச் செடியும், ஒன்று என்று நினைத்தீரா?',
ரோஜா விரும்பியான மன்னன் கேட்டவுடனே,

'நாட்டின் ராணியும், வேட்டைக்குப் போனபோது,
காட்டில் பார்த்த பெண்ணும் ஒருபோலவேதான்

என்றால், ரோஜாச் செடியும் , காட்டுச் செடியும்
ஒன்றுதானே பேரரசரே?' என்று வினவியவுடன்,

இழைத்த தவறை அரசர் உணர்ந்தார்; அப்போதே
அழைத்தார் பணிப்பெண்களை, அரசியைக் காக்க!

:grouphug:

 

[Raji Ram]

நம்ப முடியவில்லை!

முந்தைய கால அறிஞர்களைப் பற்றிப் பல
விந்தையான கதைகளைக் கேட்டுள்ளேன்!

விண்வெளி ஆராய்ச்சியிலே சிறந்த ஒருவர்;
விண்மீன்கள், கிரகங்கள் பற்றி விஷயங்கள்,

தன் சீடர்களுக்குச் சொல்லுவது வழக்கமாம்.
தன் கணித ஆற்றலால், அவைகளெல்லாம்

எத்தனை தூரத்தில் இருக்கின்றன என்பதை,
அத்தனை துல்லியமாகச் சொல்லிடுவாராம்!

வெட்ட வெளியில், ஒரு கயிற்றுக் கட்டிலைப்
போட்டு உறங்குவதே, அவருடைய வழக்கம்.

தரை மிகச் சில்லிடுகிறது என்பதால், சீடர்கள்
தரை மீது செங்கல்களை இட்டு, அதன்மேலே

கட்டிலை வைத்துவிட்டனராம், ஓர் இரவில்;
கட்டில் மூன்று அங்குலம் உயர்ந்துவிட்டது!

அப்போது படுத்தவர் கேட்டார், 'விண்மீன்கள்
எப்போது மூன்று அங்குலம் அருகில் வந்தன?'

eace:

 

[Raji Ram]

ஆயிரம் காக்கைகள்!

ஒருவன் நண்பனிடம் வேகமாக ஓடி வந்து,
'ஒரு அதிசயம் தெரியுமா?', எனக் கேட்டான்!

தப்பாது உற்சாகம் அவனைத் தொற்றிவிட,
'இப்போதே விஷயத்தைக் கூறு', என்றான்!

'அடுத்து உள்ள ஊரில், ஆயிரம் காக்கைகளை
எடுத்தானாம் ஒருவன், வாய் வழியாக!' எனச்

சொல்ல, மிகவும் அதிர்ந்தவன் வினவினான்,
சொன்னது யார் என்று; யாரெனத் தெரிந்ததும்,

அவனிடம் சென்று விசாரிக்க, அவனோ, 'நான்
அவனிடம் சொன்னது நூறு காக்கைகளே!' என,

அந்த விஷயம் கூறியவனைத் தேடிச் செல்ல,
'இந்த விஷயம் நான் சொல்லவில்லை; நான்

ஒரு காக்கை என்றுதானே கூறினேன்', என்றிட,
ஒரு காக்கை என்றவனை, அவன் தேடிச் செல்ல,

'இது என்ன அநியாயம்! நான் சொன்னதே வேறு!
பொதுவாகக் கருப்பு நிறத்தில் வாயிலே வந்தது,

என்றுதானே சொன்னேன்', என்று தெளிவாக்க,
'ஒன்று மட்டும் கூறு; யார் இதைச் செய்தவன்?'

தொடுத்த வினாவுக்கு பதில் வந்ததும், விடாது
அடுத்ததாகக் காணச் சென்றான், வாயிலெடுத்த

பிருஹஸ்பதியை! நடந்ததைக் கேட்டு, சிரித்து,
'பிரமாதமாக ஒன்றும் நடக்கவே இல்லையே!

வயிறு கலக்கிச் சங்கடம் செய்தது, நேற்றைய
தயிரில் ஏதோ பூச்சியைக் கண்டதால்! நானும்

நண்பனிடம், வாயில் எடுப்பேனோ, என்னவோ,
என்றுதானே சொன்னேன்!' என்று விளக்கினான்!

:juggle: . . . :gossip: . . . :faint:

 

[Raji Ram]

சோடாவிலுமா?

தெய்வ பக்தி வளர்த்திக்கொள்ளும் ஆவல்,
மெய்யாக ஒருவனுக்கு வந்துவிட, அவன்

அறிஞர் ஆற்றுகின்ற சொற்பொழிவுகளை,
அறிவு மேம்பட, கேட்க மிக விழைந்தான்!

இறைவனைப் பற்றிய சொற்பொழிவிலே,
'இறைவன் சர்வத்திலும் உள்ளான்' என்று

சொன்னது, இவனுக்குக் கேட்டது வேறாக;
சொன்ன 'சர்வத்'தை, 'சர்பத்' என எண்ணி,

கூட்டம் கலையும் சமையத்தில், வேகமாய்,
கூட்டத்தில் பேசியவரை அணுகிவிட்டான்!

அவன் கையில் ஒரு சோடா பாட்டில் இருக்க,
அவன் எதற்கு வந்தான் என்று அவர் வினவ,

'நான் சோடாவைக் குடிக்கலாமா, ஸ்வாமி?
என் சந்தேகத்தைத் தீருங்கள்', என்று கேட்க,

ஒன்றும் புரியாது அவர் விழிக்க, அவனோ
'இன்று கூறினீரே, சர்பத்திலும் ஆண்டவன்

இருக்கிறான் என்று! சோடாவிலும் அவன்
இருந்தால் குடிக்கக் கூடாதே! வாங்கிவிட்ட

சோடாவை குடிக்காமலே வைத்துள்ளேன்!
சோடாவிலும் உள்ளானா?' எனக் கேட்டான்!

:bump2: . . . :twitch:

 

[Raji Ram]

ஆபத்பாந்தவன்!

பெரும் மழை காரணமாக, ஆற்றில் நீர் பெருக,
அரும் காட்சி காண, மக்கள் கூட்டமும் நிறைய,

நீச்சல் சற்று அறிந்த கத்துக்குட்டி மிகவும் துள்ள,
நீச்சல் அறியாத சிறுவனின் கால் வழுக்கிவிட,

ஒரு நொடியில் தடுமாறி, ஆற்றில் விழுந்தான்;
மறு நொடி தத்தளித்து, உதவிக்கு அழைத்தான்!

கலவரம் அனைவர் முகத்திலுமே பரவி இருக்க,
நிலவரம் மோசமாக, யாருமே அசையாதிருக்க,

நீரில் திடீரெனப் பாய்ந்த அந்தக் கத்துக்குட்டியை,
நீரில் மூழ்கப் போன சிறுவனும் பற்றிக்கொள்ள,

தட்டுத் தடுமாறி இருவருமே கரை சேர்ந்துவிட,
தட்ட ஆரம்பித்தனர் அனைவரும், தம் கைகளை!

'கொஞ்சம்தான் நீச்சல் அறிந்தும், இவனே வீரன்!
கொஞ்சமும் பயமின்றி, சிறுவனைக் காத்தானே!',

என்று பல்வேறு பாராட்டுக்களும் தொடர்ந்து வர,
நின்று எல்லோரையும் ஒரு பார்வை பார்த்தபடி,

அந்தக் கத்துக்குட்டி மிகக் கோபமாகக் கேட்டான்,
'இந்த ஆற்றுக்குள் என்னை யார் தள்ளிவிட்டது?'

:bump2: . . . :madgrin:

 

[Raji Ram]

திருப்தி!

தன் வேலையாட்களிடம் கடின உழைப்பைத்-
தான் எதிர்பார்ப்பாள், ஒரு பணக்கார மூதாட்டி!

தினமும் விருந்துக்குப் பலரை அழைத்து, தன்
இனத்தில் சிறந்தவளாக இருக்க விழைவாள்!

எல்லாப் பீங்கான் தட்டுக்களையும் சூடாக்கியே,
எல்லோருக்கும் உணவைப் பரிமாற வைப்பாள்!

தட்டுக்கள் சூடாக இருக்கிறதா என அறிய, தன்
தட்டுக்களை தினம் சோதனையும் செய்வாள்!

பணியாள் ஒருவனுக்கு, இப்பணியால் சிரமம்;
இனிமேல் பொறுக்க முடியாது என்று சொல்லி,

தன் வீட்டில் மனைவியிடம் புலம்பி வந்தான்;
தன் வேலை எளிதாக வழியையும் கேட்டான்!

பின் என்ன? அவளின் யோசனையால், அவன்
தன் பணியை மிக மகிழ்ச்சியுடனே செய்தான்!

அவனது தோழன் மாற்றம் எப்படி எனக் கேட்க,
அவனிடம் சொன்னான், 'என் மனைவியுடைய

அபிமான யோசனைப்படி, இப்பொழுதெல்லாம்,
எசமானி தட்டை மட்டுமே சூடாக்குகின்றேன்!'

:decision: . . . eace:

 

[Raji Ram]

பூச்சாண்டி வருவான்!

இந்த வார்த்தையைச் சொல்லித்தான், நாம்
எந்தக் குழந்தையையும் அடக்கிவிடுவோம்!

பூச்சாண்டி என்ற சொல் எப்படி வந்தது என்று
புதுவித விளக்கத்தைச் சொல்லக் கேட்டேன்!

சேர சோழ பாண்டியர்கள் நம் நாட்டை ஆண்ட
நேரத்திற்குப் பல காலம் முன்பு, சைவத்தை

எதிர்க்கும் ஒரு கூட்டம் அராஜகம் செய்தது;
எதிரில் எவரேனும் விபூதியை நெற்றியிலே

இட்டு வந்தால், யாரேன்றுகூடக் கேளாமல்,
வெட்டி விட்டனர், அவர்களின் தலைகளை!

அது மட்டுமல்லாது, விபூதி இட்டவர்களிடம்
பொது இடத்தில் பேசுபவரும் பெற்றிடுவார்,

அதே போன்ற மிகக் கொடிய தண்டனையை!
இதே நீண்ட காலம் தொடர, ஆண்டிகள் சிலர்

கூடிப் பேசி, இதைத் தடுக்க ஒரு வழியினை
நாடி, தைரியமாக ஒரு முடிவும் எடுத்தனர்!

சொந்த வீடு, வாசல், மனைவி, மக்கள் என
எந்த பந்தமும் இல்லாது அவர்கள் உள்ளார்.

இறந்தால் நன்மையே அவர்களுக்கு; சிறந்த
இறைவன் திருவடி சேரலாம், விரைவிலே!

பயமே இன்றி உடல் முழுவதும் திருநீறு பூச,
பயம் வந்தது மக்களுக்கு, அவர்களிடம் பேச!

திருநீறு பூசிய ஆண்டிகள் உலவிடும் சமயம்,
திரும்பிப் பார்க்காமல், கதவை அடைத்தனர்!

'பூச்சாண்டி வருவான்', என்று சிறுவர்களிடம்,
பூச்சாண்டி பயத்தையும் ஏற்படுத்திவிட்டனர்!

பயத்தின் காரணத்தால் வந்த இந்தப் பெயரே,
பயத்தை வரவைக்கும் 'பூச்சாண்டி' ஆயிற்று!

(சொற்பொழிவில் ஒரு பெரியவர் சொல்லிக் கேட்டது!)

 

[Raji Ram]

வளைந்த கழுத்து!

சிறந்த அறிவைப் பெற்றவர் பீர்பால் என்பது,
அறிந்த ஒரு செய்தியே ஆகும்; ஒரு முறை

அவர், சிரிக்கவும் சிந்திக்கவும் வைக்குமாறு
அரசரிடம் ஒரு விஷயத்தைச் சொன்னவுடன்,

பேரன்புடன் அவரிடம் ஒரு உறுதி அளித்தார்
பேரரசர் அக்பர், நிறையப் பரிசுகள் தருவதாக.

தினங்கள் பல சென்றும், ஏதும் நேரவில்லை;
தினமும் நல்ல சந்தர்ப்பம் பீர்பால் தேடினார்!

மாலை வேளை ஒன்றில், அரசரும் அவரும்,
சாலை வழியாகப் போகும் நேரத்திலே, ஒரு

நெட்டையான, வளைந்த கழுத்து இருக்கும்,
ஒட்டகம் எதிரிலே வருவதைப் பார்த்தனர்.

கேள்வி கேட்பதில் வல்லவராயிற்றே அரசர்!
கேள்வி வந்தது, ஒட்டகத்தின் நீண்ட கழுத்து,

ஏன் வளைந்து இருக்கிறது, என்று; அதுவே,
தான் எதிர்பார்த்த நல்ல தருணம் என்பதை

அறிந்து கொண்டு, பீர்பால் உடனே கூறினார்,
'தெரிந்த விஷயம் சொல்லுகிறேன் அரசே!

நாம் சொன்னதை நிறைவேற்றாவிட்டால்,
நம் கழுத்து வளைந்துவிடும் என்று கூறுவர்!

இந்த ஒட்டகம் எதையேனும் மறந்திருக்கும்;
அந்த மறதியால் கழுத்து வளைந்துவிட்டது!'

உடனே புரிந்தது நன்றாக இதன் பொருளும்;
உடனே தந்தார், நிறைந்த பரிசுப் பொருளும்!

:cheer2: . . . :target:

 

[ramakrishnan1971]

Sella kaasaagi illai --- adhu sellaa kaasaagi ---12 sentence

ramki

 

[Raji Ram]

Sella kaasaagi illai --- adhu sellaa kaasaagi ---12 sentence

ramki

Hi Ramki!

If you mention the post number given at the right corner of the post, it will be easier to refer!

I am sure you mean the 'kavithai' கேட்டதும் கிடைத்ததும்!

I noticed the error a little late and could not correct it!

Once the posts move to the next page, editing this post becomes impossible!

Hence I corrected in my blog.

Thanks for your comment.

Raji Ram

 

[ramakrishnan1971]

hi, i understand. its ok. but is sentence 12 of ur thread and not what u mentioned. why dont u drop ur comments in my website

ramki