என் கவிதை முயற்சிகள்

[saidevo]

Share:

Facebook X (Twitter) LinkedIn WhatsApp Email Share Link

மெழுகில் உருவாகும் மாயை
(நேரிசை/இன்னிசை வெண்பா)

இறவா உடலே மெழுகுரு என்பர்
பிறவா உடலும் இதுவே - உறவாம்
உயிரின்றி உய்யும் உயிர்ச்சிலை யென்று
துயிலும் மனங்கொள் ளுரு. ... 1

மெய்யிதுவே பொய்யாம் மெழுகதை மேன்மேலும்
மெய்யாக்கும் அல்லது பொய்யாக்கும்! - ஐயா!
உளங்கொள் உருவங்கள் ஒற்றும் மெழுகின்
தளுக்கில் உலவுமே மாசு. ... 2

இரும்புக் கலையம் மெழுகு கொதித்துத்
தருவித்த அச்சுகளில் கால்கைத் தலையாய்
தனியே உறைந்து பசையொட்டித் தைத்துக்
கனவுச் சிலைகை வரும். ... 3

கோலி விழிகளும் கூந்தல் உடற்கூறும்
தோலும் மெழுகிளகித் தோய அனலில்
அலகுகள் ஊசிகள் ஆக்கிடும் பொம்மை
பலவகை ஆடை பெறும். ... 4

புகழுக் கிணையாய்ப் பொருளதுவும் சேர
அகம்கொள்ளும் காட்சியக ஆளுருவம் அல்லாது
வீட்டில் குழந்தை விளையாடும் பொம்மையின்
ஊட்டம் மெழுகின் உரு. ... 5

குழந்தை மரபொம்மைச் சொப்புகள் நாள்போய்
மெழுகு நெகிழி விளையாட்டுச் சாமான்கள்
காற்றுநீர் மேனியும் மாசுறுதல் கண்ணுறாது
போற்றி மகிழும் உலகு. ... 6

--ரமணி, 14/11/2013, கலி.28/07/5114

உதவி:
How to Make Wax Dolls
How to Make Wax Dolls | eHow

Environmental Pollution: How Toys Contribute to the Problem
How Do Toys Pollute The Environment? Find out About Battery Operated, Wood or Plastic Toy Pollution

படங்கள் உதவி:
Overwhelmed Prabhu Deva uncovers his wax statue at Lonavala Wax Museum
https://smalltreasuresdollcollectors.wordpress.com/2013/10/26/complete-history-of-wax-dolls/

*****

 

[saidevo]

பிரதோஷத் துதி 1.
(பதினாறு சீர் விருத்தம்: எல்லாம் கூவிளம், ஒரு சீர் தவிர்த்து)

எண்ணைநீ ராடிடு மீசன னந்தனே
. என்னைநீ காத்தருட் செய்வதென் னாளிலே?
. . சந்தநீ ராடிடுஞ் சண்முகற் றந்தையே
. . . அந்தக னென்மரு ணீக்குத லெங்ஙனம்?
வெண்ணிறப் பால்தயி ராடிடும் நித்தனே
. எண்ணிலாப் பல்வினை யேறுமென் னாவியைத்
. . தீப்புடம் போட்டுநீ தீயவை நீக்குவாய்
. . . இம்மையென் னாயுளுந் தீர்ந்திடு முன்னரே
வெண்ணிறக் காப்பிலுன் நீறதன் தெய்வதம்
. என்னுளே பற்றியே விந்தைசெய் யட்டுமே
. . இத்தனை யாண்டுகள் நீர்விழ லானவே
. . . இன்னுமேன் தாமத மென்னைநீ யாட்கொள
கண்ணுதற் றெய்வமே அண்ணுதற் கெளியனே
. பெண்ணொரு கூறனே பித்தனே யத்தனே
. . நித்தனி ருத்தனு ருத்திரத் தற்பரன்
. . . சித்தமு றைந்திட வித்தக மோங்குமே.

பதம் பிரித்து:

எண்ணைநீர் ஆடிடும் ஈசன் அனந்தனே
. என்னைநீ காத்தருள் செய்வதென் நாளிலே?
. . சந்தநீ ராடிடும் சண்முகன் தந்தையே
. . . அந்தகன் என்மருள் நீக்குதல் எங்ஙனம்?
வெண்ணிறப் பால்தயிர் ஆடிடும் நித்தனே
. எண்ணிலாப் பல்வினை ஏறுமென் ஆவியைத்
. . தீப்புடம் போட்டுநீ தீயவை நீக்குவாய்
. . . இம்மையென் ஆயுளும் தீர்ந்திடும் முன்னரே
வெண்ணிறக் காப்பிலுன் நீறதன் தெய்வதம்
. என்னுளே பற்றியே விந்தை செய்யட்டுமே
. . இத்தனை ஆண்டுகள் நீர்விழல் ஆனவே
. . . இன்னுமேன் தாமதம் என்னைநீ ஆட்கொள
கண்ணுதல் தெய்வமே அண்ணுதற்கு எளியனே
. பெண்ணொரு கூறனே பித்தனே அத்தனே
. . நித்தன் நிருத்தன் உருத்திரன் தற்பரன்
. . . சித்தம் உறைந்திட வித்தகம் ஓங்குமே.

--ரமணி, 30/11/2013

*****

 

[saidevo]

மரபு வித்தகம் 7.
ஒருசீர் விருத்தம்

ஒரேயொரு அசையை அல்லது சீரை வைத்து மறைபொருளாய் விரியுமாறு பாட்டெழுதுவது ஒருசீர் விருத்தம் ஆகும். இரண்டு அல்லது மூன்று அசைச் சீர்கள் வரும்போது அவற்றைப் பிரித்தால் பொருள் தரும் சொற்கள் வருதல் கூடாது.

அசை விருத்தம்
தண்
பெண்
கண்
மண்

(தண்மை நிறைந்த பெண்ணின் கண் நோக்குவதோ மண்.)

கா
வா
வா
கா

(’காவாவா, கந்தா வாவா’ என்னும் புகழ்பெற்ற பாடலை நினைவூட்டி)

நான்
யான்
தேன்
ஏன்?

நாம்
யாம்
போம்
ஓம்!

ஏர்
தேர்
ஊர்
வேர்

(ஈரெதுகையில்)
நான்
தேன்
நீ
சீ!

***

சீர் விருத்தம்
இன்மை
நன்மை
தன்மை
உன்ன.

உண்ண
உண்டு
குண்டு
நண்டு

முன்னம்
அன்னம்
இன்று
வின்னம்

பண்ணாதே
கண்ணாம்பா
அண்ணாந்தே
உண்ணாதே!

--ரமணி

*****

 

[saidevo]

பிரதோஷத் துதி 2.

காப்பு
அண்டபகி ரண்டமெலாம் சண்டதர முண்டதுபோல்
சண்டியுடன் அண்டனவன் தாண்டவத்தில் நீறாகும்
வெண்ணீராய் ஆக்கிவினை ஈர்த்தோர்நாள் மீள்படைக்கும்
கண்ணுதலான் நெஞ்சமுறக் காப்பு.

[சண்டதரம் = இருபத்தெட்டு நரகங்களில் ஒன்று;
அண்டன்=சிவன் (தேவாரம்); ஈர்த்தல்=அறுத்தல், பிளத்தல்]

வழிபாடு
முதல்வன் சிறப்பாய்த் துதிசெய மாலை
அதனின் சிறப்பாய் மதிநாள் நலமே
அதனின் சிறப்பாய் அரன்ராத் திரியே
பதிமூன்றாம் நாளின்னும் நன்று.

மாலய னாதியாய் வானவர் யாவரும்
ஆலயம் சென்றே அரனைத் தொழவே
பிரதோச காலம் பெருமாளின் கோவில்
திருவழி பாடில்லை யே.

காலைநீ ராடியுமா காந்தன் புகழ்பாடி
மாலையில் நந்திக்கு ஆலயத்தில் பச்சரிசி
வெல்லம் படைத்தபின் வேதமுதல் வன்போற்ற
அல்லல் துடைத்தருள் வான்.

ஆலகால நஞ்சும் வரையின்றிப் பின்தொடர
வாலறிவன் நாடி வலம்வந்த வானோரும்
சோமசூக்தம் என்பதாய் ஓடினரே முன்பின்னாய்
காமனெரித் தான்காண வே.

நந்திதேவர் கண்டபின் அங்கே இடப்பக்கம்
வந்துபின் சண்டிகேசர் நந்தி வலப்பக்கம்
கோமுகி நீரிங்ஙன் மும்முறை ஈசனீறாய்
சோமசூக்தம் போவதாம் ஓம்.

பலன்மொழி
பிரதோச நன்னாள் பிறையணியான் போற்றி
அருவினை அல்லல் வருவினை நீங்க
அருமறை போற்றிடும் ஐந்தெழுத் தோதி
திருவெலாம் பெற்றிடுவோ மே.

--ரமணி, 14/12/2013, கலி.28/08/5114

*****

 

[Vaagmi]

மாலய னாதியாய் வானவர் யாவரும்
ஆலயம் சென்றே அரனைத் தொழவே
பிரதோச காலம் பெருமாளின் கோவில்
திருவழி பாடில்லை யே.

Dear Saidevo,

There appears to be a factual inaccuracy in this stanza. In Nrisimha temples (which are indeed பெருமாள் கோயில்) pradosham time is considered most auspicious for worship and so there is திருவழிபாடு exactly at the pradosham time in those temples. Moreover I remember having read somewhere that the correct word is கோயில் and not கோவில் .Kindly check up. Just a suggestion. Thanks.

 

[saidevo]

Dear vaagmi,

Seems both of us are right about PerumAL. Please check this link:
Temple News | News | Dinamalar Temple | ?????? ???????? ????????????? ????????? ??????? ????? ???? ?????????????. ??????????

About the words கோவில்/கோயில், it seems that only கோவில் is grammatically right and கோயில் wrong!
http://ta.wiktionary.org/wiki/கோவில்

Thank you for your feedback.

ரமணி

 

[saidevo]

ஆதிரைத் திருநாள் துதி

களிமண் உலகு களிம்பெனப் பற்றிக்
களிக்குமென் வாழ்வின் களேபரம் போக்கிக்
களிஞானம் ஈசன் களிகூர்ந் தருளக்
களிப்புடன் உண்டேன் களி.

சேந்தன் களியுண்டு தேரூர்ந்த வேந்தநீ
ஏந்தும் அழலினால் என்வினை தீப்பட
சேந்தன்போல் நானுமுனை யேத்தி யுறவாடும்
பாந்தம் எனக்கருள் வாய்.

--ரமணி, 18/12/2013

*****

 

[saidevo]

பிரதோஷத் துதி 3.
சவலைமதிச் சடைனுக்கோர் சவலைவெண் பாமாலை
(ஒரு பா ஒரு பஃது:
அந்தாதி மாலை: சவலை வெண்பா)

காப்பு
சவலைக் குழந்தையென் செய்வினை தீரச்
சவலைவெண் பாமாலை சாற்றினேன்
கவலையே யில்லாக் களிநட ராசா
அவலம் அகற்றி அருள்.

அந்தாதி மாலை
ஆலமர் செல்வவுன் ஆறிழிச் சென்னியில்
கோல மதியினைக் கொள்ளழகும்
நீல மிடறுமுன் நீறுடற் செம்மையும்
சால மனமுறச் செய். ... 1

செய்வினை யாலே இழியுமென் சென்மமே
மெய்யில் உயிரென ஏறியே
குறிலாய் நெடிலாய் ஒலித்திடு மோலம்
உறுந்தலையெ ழுத்தினிற் கூத்து. ... 2

கூத்தனொ டாடிடும் கூத்தியின் லீலையில்
பூத்திடும் ஈரே ழுலகம்
உடலும் உயிரும் உவந்தே நடனம்
கடலென வேழு களம். ... 3

களத்தில் அறுப்புக் கதிரடி பட்டே
விளமும் மனதில் விலகுமே ... ... [விளம்=ஆணவம்]
தானியம் போர்வை யகன்றே தனிப்படத்
தானியங் காத தழைப்பு. ... 4

தழைகள் எழுந்தே தளிர்க்கும் நுழையும்
விழையும் பசுவின் மிடறினில்
மும்மலம் சம்மதம் உற்றே பசுவுமே
மம்மரில் வீழுமே மாய்ந்து. ... 5

மாய்ந்தே படித்தனன் மாயை யகலவே
ஆய்ந்தவர் நூல்பல வாக
கணத்தில் விடுதலை காணும் மறையும்
உணர்வினி லூற லுறாது. ... 6

உறாததைத் தந்தெனை உய்வித் தருள்வாய்
பெறாதனு பூதியும் ஏற
உமையொரு கூறாய் உருத்திடு மீசா
இமைவிழும் காப்பா யிரு. ... 7

இருந்தென் னுளத்தில் நிருத்தியம் செய்தே
வருந்துயர் போக்கி யருள்வாய்
கரும்பென மேனியைக் காணுதல் போக
மருந்தென என்னுளம் வா. ... 8

வானதி வீழவே வான்மதி சூடியே
கானில் நடமிடும் கள்வ!
விடையன் சடைமுடி வேட நடேசா
உடைத்தெறி வாய்மனச் சொல். ... 9

சொல்லும் பொருளும் ஒலியும் உருவமும்
அல்லும் பகலும் கடந்தோனே
அல்ல லருவினை வல்வினை சூழ்வதே
இல்லை யெனும்நிலை யென்று?

நூற்பயன்
காடு நடமிடும் காளே சனினருள்
நாட மனம்வர நேரிடினே
பாடு படுவதும் பாவமும் குன்றவே
தேடுதல் போய்வரும் வீடு.

--ரமணி, 28-30/12/2013, கலி.15/09/5114

*****

 

[saidevo]

இறை வண்ணம் இசை வண்ணம்
1. கணபதி
(தத்தன தனதன தனதான)

அத்தனின் முதல்மக னடிபேண
. அப்பிடும் வினைமல மகலாதோ?
மத்தள வயிறனும் மனமார
. மப்புறு மனமது தெளியாதோ?
வித்தகன் பெயர்புகழ் விரவாது
. எத்தனை பொழுதுகள் செலவாகும்
நித்தமும் கரிமுகன் நினைவோடு
. நித்தில மனம்பெற விழைவேனே. ... 1

--ரமணி, 21/12/2012

*****

 

[saidevo]

சிவத்துதிக் குறும்பாக்கள்

செஞ்சடையில் கொப்பளிக்கும் ஆறு
நஞ்சரவு மேனியெலாம் நீறு
. . பாதவிணை பற்றிடவே
. . வேதனைகள் இற்றிடுமே
அஞ்செழுத்தில் வந்திடுமே ஏறு. ... 1

மான்மழுவே தீக்கரமே சூலம்
கான்நடமே கூளிகளின் ஓலம்
. . இருவடியைப் பணிந்திடுவோம்
. . திருநீற்றை யணிந்திடுவோம்
தான்நீக்கும் நாதனவன் கோலம். ... 2

வாழவைக்கும் தேவனவன் சிவனே
ஏழைகளின் இறையாவான் அவனே
. . வேதவொலி முழங்கிடவே
. . பேதமெலாம் கழன்றிடவே
பாழியதில் போற்றிடுவோ மவனை. ... 3

[பாழி=கோவில்]

--ரமணி, 24/01/2014

*****

 

[saidevo]

பிரதோஷத் துதி 5.
தேட்டளவில் வேற்றுமையே!
(குறும்பா)

கருவறையில் அபிடேக மூலவன்
பிரகாரம் உலவுகையில் மேலவன்
. . பாதந்தோள் அழுத்திடவே
. . வேதவொலி வழுத்திடவே
வருவானே மேனியிரு பாலவன். ... 1

பாற்கடலில் ஓங்கியெழு நஞ்சினை
நாற்கரத்தில் ஓர்கரத்தில் பஞ்சென
. . ஏந்தியவன் உண்டிடவே
. . ஏந்திழையாள் கண்டிடவே
மேற்கழுத்தில் வடுநிற்கும் பிஞ்சென. ... 2

நந்தியிரு கொம்பிடையே ஆடுவான்
பந்தமெலாம் நலிந்திடவே சாடுவான்
. . திருமறைகள் போற்றியவன்
. . அருமறைகள் ஆற்றியவன்
சந்தியிலே ஊர்வலமும் நாடுவான். ... 3

வானவரும் காணாத பிரமமாம்
நானிலத்தை இயக்குகின்ற தருமமாம்
. . கருமபல தாதனவன்
. . உருவுலக நாதனவன்
மானிடர்க்கோ விளங்காத மருமமாம். ... 4

ஏட்டளவில் மனதினிலே ஏற்றியுமே
பாட்டளவில் எழுதியுமே போற்றியுமே
. . காற்றினிலே போனதுவாய்
. . நேற்றெனவே ஆனதுவாய்
தேட்டளவில் தெரிவதெலாம் வேற்றுமையே. ... 5

--ரமணி, 28/01/2014

*****

 

[saidevo]

தெய்வ தரிசனம்: எண்கண் சுப்ரமண்ய சுவாமி
(விவரம்: Subramaniaswami Temple : Subramaniaswami Temple Details | Subramaniaswami - Enkan | Tamilnadu Temple | ???????????????)
(குறும்பா)

எண்கண்ணூர் சுப்ரமண்ய சுவாமியே
நண்ணுவோரை நல்லறத்தில் நேமியே ... [நேமித்தல்=நியமித்தல்]
. . மயில்போலே மனையொன்று
. . குயில்போலே இனுமொன்று
அண்ணலவன் அன்னையவள் வாமியே. ... 1 ... [வாமி=பார்வதி]

பிரணவத்தின் பொருளறியா திருளினால்
பிரமனிடம் படைத்தலையே உருவினாய்
. . எண்கண்ணன் வழிபடவே ... [என்கண்ணன் = பிரம்மன்]
. . எண்தோளன் வழிவிடவே ... [எண்டோளன் = சிவன்]
பிரணவமும் படைத்தலுமே அருளினாய். ... 2

ஆறுமுகன் மூலவனின் சிற்பமதே
வேறெங்கும் காணாத அற்புதமே
. . வேலவனின் எடைமுழுதும்
. . கோலமயில் இடையழுந்தும்
ஓர்காலில் மயிலதுவும் நிற்பதுவே. ... 3

முன்புறமும் பின்புறமும் மூன்றுமுகம்
பன்னிருகை ஆயுதங்கள் தோன்றுமுகம்
. . வேலுடனே சக்கரமும்
. . சூலமும்சே வற்கொடியும்
உன்னடியார் உள்நிறைந்தே யூன்றுமுகம். ... 4

சிக்கலெட்டுக் குடியெண்கண் மூவிடமே ... [சிக்கல், எட்டுக்குடி, எண்கண் என்ற மூன்று தலங்கள்]
தக்கணனின் மகன்நீயும் மேவிடவே ... [தக்கணன் = தட்சிணாமூர்த்தி]
. . ஒருசிற்பி ஓரமைப்பில்
. . திருவுருவைச் சீரமைக்க
சக்திமகன் அருளும்வழி கோலிடுமே. ... 5

இரண்டாவது குலோத்துங்கச் சோழனுமே
அரன்கோவில் என்றமைத்த பாழியிதே
. . எண்டோளன் அரனனெனினும்
. . எண்கண்ணூர் அரன்மகனே
பிரதானம் வழிவந்த வாழையென. ... 6

பிருகுமுனி சாபத்தினால் கொற்றவனும்
உருவத்தில் சிம்மமுகம் பெற்றனனே
. . தைத்திங்கள் அருதினமுன்
. . கைத்தலமும் தரிசனமும்
அரசனவன் தன்முகமும் பெற்றனனே. ... 7

உறுகோளாய் உருத்துவரும் வேதனையா?
அறுமுகனுக் கபிஷேகா ராதனையே
. . இளநீரும் சந்தனமும்
. . உளமாறும் வந்தனையில்
குறைநீங்கி உள்ளோங்கும் சாதனையே. ... 8

பன்னிருகை வேலவனின் தாள்பணிந்தே
அன்னவனின் நலம்விளைக்கும் நீறணிந்தே
. . விரதமுடன் வழிபடவே
. . வருவினைகள் வழிவிடுமே
உன்னதமாய் உயர்ந்திடுவோ மேதுணிந்தே. ... 9

தக்கணனின் மகனெனவே தேவனிவன்
தெக்குநோக்கி யருள்செய்யும் வேதமகன்
. . அறிவாயுள் உடல்நலனும்
. . செறிஞானம் திடமனமும்
எக்கணமும் நலம்வரவே ஓதுவமே. ... 10

--ரமணி, 05/02/2014, கலி.23/10/5114

*****

 

[saidevo]

பிரதோஶத் துதி: குஞ்சிதபாதன் பஞ்சகம்

(தனத்தன தானன தானன தனந்தனதானா)

புனற்சடை யாறது போகமும் புரந்தருளாதோ?
அனற்கர சோதியு மேகமுஞ் கரந்தரளாதோ?
கனற்றிடும் பார்வையே காதலுஞ் சுரந்தருளாதோ?
வனத்தினி லாடிடும் வானவன் நிரந்தருள்வானே. ... 1

தனத்தன தானன தானன தன்னனதன்ன

இடப்புற மாதவ ளீதலு மன்னையைவிஞ்சும்
சடைத்தலை மேவிடுந் தானவன் வின்னமென்றெஞ்சும்
மிடற்றினில் நீலவன் மேவிட வென்மனம்கெஞ்சும்
விடைப்புற மேறிடும் வேடனும் முன்னுறுநெஞ்சம். ... 2

தனத்தன தானன தானன தன்னனதான

உருத்திரன் மேனியி லூர்வது நஞ்சரவாகும்
குருத்துவ மாள்பவன் கோபதி பிஞ்ஞகனாவன்
தரித்திடும் நீறினில் தாபமு மெஞ்சிலதாகும்
சிரித்தவன் மூவெயி லேமனே குஞ்சிதபாதன். ... 3

தகித்திடும் தீயுட னாடிடும் நஞ்சுணிநாமம்
அகத்தினி லேறிடி லாடுமே குஞ்சிதபாதம்
இகத்தினில் வேறெதும் வேண்டல நெஞ்சினராகில்
பகுத்திடும் ஞானமும் பாய வெஞ்சினம்போமே. ... 4

தத்தன தானன தானன தாந்தனதானா

இத்தனை காலமு மீசனை யோர்ந்திலனானேன்
அத்தனின் பாதமு மாரவே சேர்ந்திலனானேன்
மத்தமும் போகவே மாதவள் சேர்ந்திடும்தேனே
சித்தினுள் ளையன் சேவடி நேர்ந்தருள்வாயே. ... 5

--ரமணி, 10-12/02/2014, கலி.30/10/5114

*****

பதம் பிரித்து:
பிரதோஶத் துதி: குஞ்சிதபாதன் பஞ்சகம்

(தனத்தன தானன தானன தனந்தனதானா)

புனற்சடை ஆறது போகமும் புரந்து-அருளாதோ?
அனற்கர சோதியும் ஏகமும் கரந்து-அரளாதோ? ... [ஏகம்=முக்தி, வீடு]
கனற்றிடும் பார்வையே காதலும் சுரந்து-அருளாதோ?
வனத்தினில் ஆடிடும் வானவன் நிரந்து-அருள்வானே. ... 1

தனத்தன தானன தானன தன்னனதன்ன

இடப்புற மாதவள் ஈதலும் அன்னையைவிஞ்சும்
சடைத்தலை மேவிடும் தானவன் வின்னமென்று-எஞ்சும் ... [தானவன்=சந்திரன்]
மிடற்றினில் நீலவன் மேவிட என்மனம்கெஞ்சும்
விடைப்புறம் ஏறிடும் வேடனும் முன்னுறுநெஞ்சம். ... 2 ... [விடைப்புறம்=எருதின் முதுகு]

தனத்தன தானன தானன தன்னனதான

உருத்திரன் மேனியில் ஊர்வது நஞ்சரவு-ஆகும்
குருத்துவம் ஆள்பவன் கோபதி பிஞ்ஞகன்-ஆவன் ... [குருத்துவம்=ஆசாரியத்தன்மை]
தரித்திடும் நீறினில் தாபமும் எஞ்சு-இலது-ஆகும்
சிரித்தவன் மூவெயில் ஏமனே குஞ்சிதபாதன். ... 3 ... [ஏமன்=எமன்]

தகித்திடும் தீயுடன் ஆடிடும் நஞ்சுணிநாமம்
அகத்தினில் ஏறிடில் ஆடுமே குஞ்சிதபாதம்
இகத்தினில் வேறெதும் வேண்டல நெஞ்சினர்-ஆகில்
பகுத்திடும் ஞானமும் பாய வெஞ்சினம்போமே. ... 4

தத்தன தானன தானன தாந்தனதானா

இத்தனை காலமும் ஈசனை ஓர்ந்திலன்-ஆனேன்
அத்தனின் பாதமும் ஆரவே சேர்ந்திலன்-ஆனேன்
மத்தமும் போகவே மாதவள் சேர்ந்திடும்தேனே ... [மத்தம்=மயக்கம்]
சித்தினுள் ஐயன் சேவடி நேர்ந்து-அருள்வாயே. ... 5

--ரமணி, 10-12/02/2014, கலி.30/10/5114

*****

 

[saidevo]

அன்புடையீர்!

வெகுநாட்களாக இந்தத் துதியைத் தமிழில் முயலும் ஆர்வமிருந்ததில்
கணபதி அருளால் இன்று அது நிறைவேறியது.

அறிஞர்களும் அன்பர்களும் கருத்துரைக்க வேண்டுகிறேன்.

அன்புடன்,
ரமணி

*****

5. தெய்வ தரிசனம்: ஸங்கடநாசன கணேச ஸ்தோத்திரம்
(நாரதமுனி அருளிச்செய்த மூலத்தின் தமிழாக்கம்)
(குறும்பா)

தலைசாய்த்தே முதல்வணங்க வானவனே
மலைமகளின் மகனாம்வி நாயகனே
. . பத்தருளம் கொண்டவனை
. . நித்தியமும் அண்டிடுவோம்
நிலையாயுள் விழைபொருளும் ஈபவனே. ... 1

முதற்பேரே வளைதுதிக்கை யன்னாக
அதற்கடுத்து ஒருகோடன் என்றாக
. . மூன்றாவது கறைபழுவாய்த் ... [கறைபழு = கரும்பழுப்பு]
. . தோன்றுகின்ற கருவிழியன்
அதன்பின்னே ஆனைமுகன் என்றாகும். ... 2

பகடுவயி னென்பதுவே ஐந்தாம்பேர்
பகடுடல னென்பதுவே ஆறாம்பேர்
. . ஊறுகளை வேரறுக்கும்
. . ஊறழிமன் ஆறடுத்தே ...
புகைவண்ணன் என்பதுவே எட்டாம்பேர். ... 3

[பகடு = பெருமை, பரப்பு, வலைமை; வயின் = வயிறு;
ஊறு = இடையூறு; மன் = மன்னன்]

ஒன்பதாகும் பேரெனவே பிறைநுதலோன்
ஒன்பதின்பின் பத்தெனவே குறைகளைவோன்
. . கணக்குழுமம் அதிபதியாம்
. . கணபதிபேர் பதினொன்றாம்
பன்னிரண்டாம் பேராகும் கறையடிவாய். ... 4

[கறையடி = (உரல் போன்ற அடியுடைய) யானை]

பன்னிரண்டு பெயர்களுடன் முச்சந்தியில்
நன்முறையில் துதிப்போர்க்கே இச்சந்தகம்
. . இடையூறு பயமின்றி
. . இடையில்லா நயமென்றே
உன்னுவதும் உவப்பதுமே நிச்சந்தகும். ... 5

[முச்சந்தி = காலை, உச்சி, மாலை என்னும் மூன்று பொழுதுகள்;
இச்சந்தகம் = இந்த மகிழ்ச்சி; நிச்சம் = நிச்சயம்]

அறிவிழைவோர் பெற்றிடுவார் அறிவெல்லாம்
வெறுக்கையெனில் உறும்செல்வச் செறிவெல்லாம்
. . புத்திரனை விழைந்திடிலோ
. . அத்திறமும் தழைந்திடுமே
பிறவன்றி முத்திவேண்டிற் பரமெல்லாம். ... 6

[அறி = அறிவு; வெறுக்கை = செல்வம்; அத்திறம் = அத்தகைய மேன்மை, குலம்;
பரமெல்லாம் = எல்லாவற்றிலும் மேலான பரம் என்னும் முக்தி]

கணபதியின் துதியிதுவே ஆறுமாதம்
உணவெனவே கொண்டிடவே ஊறுபோகும்
. . ஒருவருடம் வேண்டிடினே
. . விரும்புவதே ஆண்டுவரும்
திணமாக வேதுமையக் கூறேகும். ... 7

[திணமாக = திண்ணியமாக; ஏதும்-ஐயக்கூறு = எதேனும் ஐயத் தன்மை]

எவரொருவர் இத்துதியை எழுத்தாலே
சிவம்விழையும் எட்டுபேர்க்கே அளித்தாலே ... [சிவம் = மங்களம், நன்மை]
. . நீக்கமற நிறைந்திருக்கும்
. . ஆக்கம்வர அறிந்திருப்பர்
சிவமைந்தன் கணபதியின் அருளாலே. ... 8

--ரமணி, 18/02/2014, கலி.06/11/5114

குறிப்பு:
மூல ஸ்தோத்திரம் குறிக்கும் பன்னிரண்டு கணபதி பெயர்களும் தமிழாக்கமும் (முறையே):

01. வக்ரதுண்ட: = வளைதுதிக்கையன்
02. ஏகதந்த: = ஒருகோடன்
03. கிருஶ்ணபிங்காக்ஷ: = கரும்பழுவிழியன்
04. கஜவக்த்ர: = ஆனைமுகன்
05. லம்போதர: = பகடுவயினன்
06. விகட: = பகடுடலன்
07. விக்னராஜா = ஊறழிமன்
08. தூம்ரவர்ண: = புகைவண்ணன்
09. பாலசந்த்ர: = பிறைநுதலோன்
10. விநாயக: = குறைகளைவோன்
11. கணபதி = கணபதி
12. கஜானன: = கறையடிவாய்

ஸமஸ்கிருத மூலம்:
http://www.greenmesg.org/mantras_slokas/sri_ganesha-sankata_nashak_stotra.php
Practical Sanskrit: shrI-gaNesha-stotram - ??????? ????? ????

*****

 

[Vaagmi]

நண்பர் சாய்தேவ் அவர்களுக்கு,

உங்கள் முயற்சிக்கு பாராட்டுக்கள். வழக்கம்போல் சில நெருடல்களைச் சுட்டுகிறேன். தவறானால் மன்னிக்கவும். நன்றி.

1. தலை சாய்த்தே முதல் வணங்க-- தலை சாய்த்தா இல்லை தலை தாழ்த்தியா, இல்லை தலை குனிந்தா. சாய்ப்பது இடம் வலம் சாய்ப்பதையும் குனிந்து அல்லது தாழ்த்தி அல்லது வணங்கி என்பது பணிவுக்கு அடையாளமாக வணங்குதலையும் குறிக்க வருகின்றன. வெகுஜன உபயோகத்தில் அது அப்படித்தான் என்றாலும் இலக்கியத்தில் எப்படி என்பதறியேன். விளக்குக.

2. வளைதுதிக்கையன்னாக--வளைதுதிக்கையனாகவா இல்லை வளைதுதிக்கையன்னாகவா? செல்வனாக, சிறுவனாக என்றெல்லாம் அறிகிறோமேயன்றி செல்வன்னாக, சிறுவன்னாக என்று உபயோகம் இல்லையே. வலிந்துகொணரப்பட்ட ஒற்று என்று தோன்றுகிறது.விளக்குக.

3. பகடு வயிறனா இல்லை பகடுவயினனா?

8. சிவம்விழையும் எட்டுபேர்க்கே அளித்தாலே-- எட்டுபேர்க்கே என்ற ப்ரயோகம் நெருடல். எட்டுபேர்க்கே என்பதிலுள்ள ஏகாரம் எட்டுபேர்க்கு மட்டுமே என்ற பொருளைத்தருகிறது. மூலத்தில் அந்த பொருளில் கூறப்படவில்லை மேலும் எட்டே பேருக்கு அதனைக்குறுக்குவதில் பொருளும் இல்லை. இங்கு ஏகாரம் யாப்பின் தேவைக்காக வலிந்துகொணரப்பட்டுள்ளதோ என்று ஐயம் தோன்றுகிறது. விளக்குங்கள்.

தங்களுடைய இலக்கிய முயற்சியின் விளைவுகள் தரமுடைத்தாக வேண்டுமென்ற ஒரே ஆவலில் இதனை எழுதுகிறேன். தவறாயின் மன்னித்து மறந்துவிடுங்கள்.

 

[saidevo]

நண்பர் ஶ்ரீ வாக்மி அவர்களே!

நீங்கள் என் பாடல்களிற் காணும் ’வழக்கமான’ குறை-நிறைகளைப் பற்றித்
தாராளமாக விமரிசிக்கலாம். அது எனக்கு மிகவும் உதவும்.

நீங்கள் சொன்ன அனைத்துத் திருத்தங்களையும் உளமார ஏற்றுக்கொள்கிறேன்.
எட்டாவது பாடலில் ’எட்டுபேர்க் களித்தாலே’ என்று எழுதினால் முதலது
ஈரசைச்சீர் ஆவதுடன் (குறும்பாவில் வேண்டுவது மூவசைச்சீர்) பொருளும்
சந்தேகத்திற் கிடமாவதால், ஏ-காரம் சேர்க்கவேண்டியிருந்தது.

இப்போது நீங்கள் சொன்ன நுண்பொருளை யேற்று அந்த அடியை
’சிவம்விழையும் எண்மர்க்கென் றளித்தாலே’ என்று திருத்திக்கொள்கிறேன்.

அன்புடன்,
ரமணி

திருத்தம் பெற்ற அடிகள்:

பாடல் 1. ’தலைசாய்த்தே முதல்வணங்க வானவனே’ என்பதை
’தலைதாழ்த்தி முதல்வணங்க வானவனே’ என்று மாற்றிக்கொள்கிறேன்.

பாடல் 2. திருத்தம் பெற்ற இரண்டாம் பாடல்:
முதற்பேரே வளைதுதிக்கை யனென்றாகும்
அதற்கடுத்து ஒருகோடன் என்றாகும்
. . மூன்றாவது கறைபழுவாய்த் ... [கறைபழு = கரும்பழுப்பு]
. . தோன்றுகின்ற கருவிழியன்
அதன்பின்னே ஆனைமுகன் என்றாகும். ... 2

பாடல் 3.
’பகடுவயி னென்பதுவே ஐந்தாம்பேர்’ என்பதை
’பகடுவயி றனென்பதுவே ஐந்தாம்பேர்’ என்று திருத்திக்கொள்கிறேன்.

பாடல் 8.
’சிவம்விழையும் எட்டுபேர்க்கே அளித்தாலே’ என்பதை
’சிவம்விழையும் எண்மர்க்கென் றளித்தாலே’ என்று மாற்றிக்கொள்கிறேன்.

--ரமணி, 18/02/2014

நண்பர் சாய்தேவ் அவர்களுக்கு,

உங்கள் முயற்சிக்கு பாராட்டுக்கள். வழக்கம்போல் சில நெருடல்களைச் சுட்டுகிறேன். தவறானால் மன்னிக்கவும். நன்றி.

1. தலை சாய்த்தே முதல் வணங்க-- தலை சாய்த்தா இல்லை தலை தாழ்த்தியா, இல்லை தலை குனிந்தா. சாய்ப்பது இடம் வலம் சாய்ப்பதையும் குனிந்து அல்லது தாழ்த்தி அல்லது வணங்கி என்பது பணிவுக்கு அடையாளமாக வணங்குதலையும் குறிக்க வருகின்றன. வெகுஜன உபயோகத்தில் அது அப்படித்தான் என்றாலும் இலக்கியத்தில் எப்படி என்பதறியேன். விளக்குக.

2. வளைதுதிக்கையன்னாக--வளைதுதிக்கையனாகவா இல்லை வளைதுதிக்கையன்னாகவா? செல்வனாக, சிறுவனாக என்றெல்லாம் அறிகிறோமேயன்றி செல்வன்னாக, சிறுவன்னாக என்று உபயோகம் இல்லையே. வலிந்துகொணரப்பட்ட ஒற்று என்று தோன்றுகிறது.விளக்குக.

3. பகடு வயிறனா இல்லை பகடுவயினனா?

8. சிவம்விழையும் எட்டுபேர்க்கே அளித்தாலே-- எட்டுபேர்க்கே என்ற ப்ரயோகம் நெருடல். எட்டுபேர்க்கே என்பதிலுள்ள ஏகாரம் எட்டுபேர்க்கு மட்டுமே என்ற பொருளைத்தருகிறது. மூலத்தில் அந்த பொருளில் கூறப்படவில்லை மேலும் எட்டே பேருக்கு அதனைக்குறுக்குவதில் பொருளும் இல்லை. இங்கு ஏகாரம் யாப்பின் தேவைக்காக வலிந்துகொணரப்பட்டுள்ளதோ என்று ஐயம் தோன்றுகிறது. விளக்குங்கள்.

தங்களுடைய இலக்கிய முயற்சியின் விளைவுகள் தரமுடைத்தாக வேண்டுமென்ற ஒரே ஆவலில் இதனை எழுதுகிறேன். தவறாயின் மன்னித்து மறந்துவிடுங்கள்.

 

[saidevo]

4. தெய்வ தரிசனம்: ஐயப்பன் துதி
(விவரம்: Ayyappa Temple)
(குறும்பா)

சபரிமலை நாயகனே ஐயப்பா
உபரியெலாம் நீங்கவருள் செய்யப்பா ... [உபரி = ஆன்மாவைப் பற்றியுள்ள உடல், மனம் போன்றன]
. . பதினெட்டாம் படிநிற்கும்
. . மதிமட்டும் உடன்நிற்க
உபநிடதச் சொல்லுணர வையப்பா. ... 1 ... [உபநிடதச் சொல் = ’தத்வமஸி’]

மகிடாசுர மர்த்தினியே சிரம்பெற்றாள்
மகிடியவள் தவவலிமை உரம்பெற்றாள்
. . ஹரிஹரனது மகனாகில்
. . ஒருகாலது தகவாகில்
உகந்திடுவேன் மரணமென வரம்பெற்றாள். ... 2

ஹரிஹரனின் புத்திரனாய் மணிகண்டா
உருவெடுத்தாய் அவதாரப் பணிகொண்டே
. . பந்தளவம் சத்தினிலே
. . வந்துதித்த சத்தெனவே
அரக்கிவதம் செய்தவளின் பிணிகொண்டாய். ... 3

ஹரிஹரனின் ஐக்கியமாம் தத்துவமாய்
உருவெடுத்தே சேர்க்குமந்த உத்தமமே
. . சாதிமதம் எதுவெனினும்
. . பாதவிணை பொதுவெனவே
தருமமுறச் செய்யுமொரு வித்தகமே. ... 4

குந்திநீயும் நோக்கவந்த முகமேதான்
சிந்தனையை யீர்க்கும்பக்தர் அகமேதான்
. . சின்முத்தி ரைதாங்கி
. . தன்னலத்தை யேவாங்கித்
தந்தருள்வாய் ஞானமிந்த இகமேதான். ... 5

மெய்யடியார் உளமேறும் அச்சநமன் ... [நமன் = யமன்]
ஐயனாராய் சாஸ்தாவாய் அச்சனுமாய்
. . துச்சமென நீக்கிடுவாய்
. . இச்சைகளைப் போக்கிடுவாய்
மெய்யுணர்வைத் தந்திடுவாய் உச்சமென. ... 6

பிரம்மசர்ய கோலத்திலே ஆடவனும்
இருமனையாள் கோலத்திலே ஆடவளும் ... [ஐயப்பனின் இரு மனைவியர் பூரணா, புஶ்கலா]
. . தரிசனமும் பெற்றிடவே
. . திரிசமமும் வற்றிடுமே
இருமுனைகள் நீங்கிடவே தேடுமுளம். ... 7

இருமுடியும் ஒருமுடியில் சூட்டினரே
பருவுடலும் பலதினுசாய் வாட்டினரே
. . நாடுதலைக் கடந்தாரே
. . காடுமேடு நடந்தாரே
ஒருமண்டல விரதமென நாட்டினரே. ... 8

நெய்யபிடே கத்தினிலே தேவனுடன்
மெய்யடியார் சேர்ந்தனரே சீவனுடன்
. . தானென்பது குன்றிடவே
. . ஆன்மவொளி நின்றிடவே
பொய்நீங்க வேட்டனரே ஆவலுடன். ... 9

சபரிமலை சென்றதிலை ஐயப்பா
கபடவழி நின்றதிலை ஐயப்பா
. . நல்லகதி பெற்றிடவே
. . வல்வினைகள் அற்றிடவே
அபலையெனக் கொண்டருள்வாய் மெய்யப்பா. ... 10

--ரமணி, 07-10/02/2014, கலி.28/10/5114

*****

 

[saidevo]

பிரதோஷ/சிவராத்திரித் துதி: விரிசடைக் கடவுள் புஜங்கம்
(கட்டளைக் கலிரிவிருத்தம்)
(புஜங்க அமைப்பு: லகு-குரு-குரு x 4)

பனிச்செஞ் சடைதன்னி லாறொன்று மேவும்
கனித்தவ் வுடல்மேற்க ரித்தோலி னாடை
அனித்தம் வழிந்தோடு மாடும்நீ ரோடும்
மனித்தப் பிறப்பேகும் மாதேவ னாலே. ... 1

சிரித்தே எயில்மூன்றின் சீர்தன்னைச் சாய்த்தான்
உரித்தே வியாளத்தின் தோல்கொண்ட ணிந்தான்
விரத்தன் மருந்தீசன் விண்ணோர்க ளேத்தும்
வரித்தே மனங்கொள்ள மாளாத வாழ்வே. ... 2

இரந்தே கபாலத்தி லேற்றுண்ணு மீசன்
புரந்தே வரர்லோகப் புன்மைகள் தீர்ப்பான்
கரந்தே அருள்செய்து காத்தாள வேண்டின்
வரந்தந் துரந்தந்த றந்தந்த ருள்வான். ... 3

களித்தா டுமைபாகன் காலங்க டந்தான்
அளித்தே கழித்தேய ழித்தேவி ழிப்பான்
சுளித்தே வரைகொண்ட வுச்சங்கள் சாய்த்தான்
விளித்தே மனம்கொள்ள விண்டேகும் கேடே. ... 4

எருத்தக் கறையோட வேழ்ஞாலம் காத்தான்
விருத்தன் விடங்கொண்டு விண்ணோரை யாண்டான்
நிருத்தன் விடைமீது நின்றாடி யீர்த்தான்
வருத்தும் துயர்நீக்கும் மாதேவன் தாளே. ... 5

கடல்மா லயன்காண ழல்தோற்ற மானான்
வடங்கீ ழமர்யோகி யாசானு மானான்
உடல்தன் னிலோர்மாது கூறென்று கொண்டான்
திடம்காத் தருள்செய்யு மீசன்வே றில்லை. ... 6

சவக்காட் டுறைபேய்க ளின்நாத னாவான்
தவம்கொண் டுதன்மூலம் சார்வார்க்க ருள்வான்
தவித்தே யவன்நாட வித்தேய ருள்வான்
பவம்நீங் கவம்நீங்க வன்றாளே நெஞ்சே. ... 7

அரன்சங் கரன்சூலி ஆலால முண்டான்
அராவேந் திமாதேவ னண்ணல்பு ராணன்
பரஞ்சோ திகாமாரி யீசந்த போதன்
அருட்கூத் தனண்டன்கி ரீசன்பி ரானே. ... 8

முதல்வன் சடையோனு மைபாகன் பித்தன்
சதுர்வே தியேகம்ப னைந்தாடி யத்தன்
நுதற்கண் ணருட்சோதி மூலன்தி ருத்தன்
பதம்தே டிநாமங்க ளாடிப்பு கழ்வோம். ... 9

பதத்தோ டுகாலோடி டையோடு மார்பும்
இதந்தோள் கரத்தோடு கில்லம்மு கத்தின்
சிதம்நீ றுகேசப்பி றைகங்கை யாறும்
நிதம்தர் சனம்செய்ய வெஞ்சும்வி னைபோம். ... 10

அலங்கா ரவெண்ணீற ணிந்தேய ருள்வான்
நலம்வந் திலந்வந்த லம்நீங்கி யோடும்
வலம்வந்து மன்றாட மாயைய றுப்பான்
தலம்சேர்ந் தவன்றாட்ட லைதாழு வோர்க்கே. ... 11

--ரமணி, 21-26/02/2014, கலி.14/11/5114

*****

பதம் பிரித்து
பிரதோஷ/சிவராத்திரித் துதி: விரிசடைக் கடவுள் புஜங்கம்

பனிச்செஞ்சடை தன்னில் ஆறு-ஒன்று மேவும்
கனித்த-அவ் உடல்மேல் கரித்தோலின் ஆடை
அனித்தம் வழிந்தோடும் ஆடும்நீர் ஓடும் ... [அனித்தம் = சந்தனம்]
மனித்தப் பிறப்பு-ஏகும் மாதேவ னாலே. ... 1

சிரித்தே எயில்மூன்றின் சீர்தன்னைச் சாய்த்தான்
உரித்தே வியாளத்தின் தோல்கொண்டு அணிந்தான் ... [வியாளம் = புலி]
விரத்தன் மருந்தீசன் விண்ணோர்கள் ஏத்தும் ... [விரத்தன் = பற்றற்றான்]
வரித்தே மனங்கொள்ள மாளாத வாழ்வே. ... 2

இரந்தே கபாலத்தில் ஏற்றுண்ணும் ஈசன்
புரந்தே வரர்லோகப் புன்மைகள் தீர்ப்பான்
கரந்தே அருள்செய்து காத்தாள வேண்டின்
வரந்தந்து அரந்தந்து அறந்தந்து அருள்வான். ... 3 ... [அரம் = கூர்மை, இங்குக் கூர்மதி]

களித்தாடும் உமைபாகன் காலம் கடந்தான்
அளித்தே கழித்தே அழித்தே விழிப்பான்
சுளித்தே வரைகொண்ட உச்சங்கள் சாய்த்தான் ... [உச்சம் = தலை]
விளித்தே மனம்கொள்ள விண்டு-ஏகும் கேடே. ... 4

எருத்தக் கறையோட ஏழ்ஞாலம் காத்தான் ... [எருத்தம் = கழுத்து; ஏழ்ஞாலம் = ஏழுலகம்]
விருத்தன் விடங்கொண்டு விண்ணோரை ஆண்டான்
நிருத்தன் விடைமீது நின்றாடி ஈர்த்தான்
வருத்தும் துயர்நீக்கும் மாதேவன் தாளே. ... 5

கடல்மால் அயன்காண் அழல்தோற்றம் ஆனான்
வடங்கீழ் அமர்யோகி ஆசானும் ஆனான்
உடல்தன்னில் ஓர்மாது கூறென்று கொண்டான்
திடம்காத்து அருள்செய்யும் ஈசன் வேறில்லை. ... 6

சவக்காட்டு உறைபேய்களின் நாதன் ஆவான்
தவம்கொண்டு தன்மூலம் சார்வார்க்கு அருள்வான்
தவித்தே அவன்நாட அவித்தே அருள்வான்
பவம்நீங்க அவம்நீங்க அவன்றாளே நெஞ்சே. ... 7

அரன்சங்கரன் சூலி ஆலாலம்-உண்டான்
அராவேந்தி மாதேவன் அண்ணல் புராணன்
பரஞ்சோதி காமாரி ஈசன் தபோதன்
அருட்கூத்தன் அண்டன் கிரீசன் பிரானே. ... 8

முதல்வன் சடையோன் உமைபாகன் பித்தன்
சதுர்வேதி ஏகம்ப்ன் ஐந்தாடி அத்தன்
நுதற்கண் ணருட்சோதி மூலன் திருத்தன் ... [திருத்தன் = தூய்மையான கடவுள்]
பதம்தேடி நாமங்கள் ஆடிப் புகழ்வோம். ... 9

பதத்தோடு காலோடு இடையோடு மார்பும்
இதந்தோள் கரத்தோடு கில்லம் முகத்தின் ... [கில்லம் = தொண்டைக்குழி, கழுத்து]
சிதம்நீறு கேசப் பிறைகங்கை ஆறும் ... [சிதம் = வெண்மை]
நிதம்-தர்சனம் செய்ய எஞ்சும் வினைபோம். ... 10

அலங்கார வெண்ணீறு அணிந்தே அருள்வான்
நலம்வந்து இலந்வந்து அலம்நீங்கி ஓடும் ... [இலம் = இல்லறம்; அலம் = துன்பம், சஞ்சலம்]
வலம்வந்து மன்றாட மாயை அறுப்பான்
தலம்சேர்ந்து அவன்றாள் தலைதாழுவோர்க் கே. ... 11

--ரமணி, 21-26/02/2014, கலி.14/11/5114

*****

 

[saidevo]

சிவராத்திரி துதி
(எண்சீரடி விருத்தம்: புளிமாங்காய் மா காய் காய் மா கூவிளம் கூவிளம்)

பகலாகும் சக்தி யிரவாகும் சிவமே
. அவைசேரும் தினமே - அர்த்தநா ரீசிவன்!
புகலாகும் சக்தி வுயிராகும் சிவமே ... [புகல் = உடம்பு]
. உருவாகும் மனிதன் - அர்த்தநா ரீசிவன்!
இகலாகும் நெஞ்சில் ஒன்றாகும் எண்ணத்
. தெளிவாகும் உள்ளம் - அர்த்தநா ரீசிவன்!
உகவாயோ நெஞ்சே உனைநீயும் கொண்டே
. உன்மூலம் காண - அர்த்தநா ரீசிவன்! ... 1

இடமாடும் பாதம் வலமாடும் போது
. எழுலோகம் மாறும் - அர்த்தநா ரீசிவா!
விடையாடப் பிறையோ டலைபாயு மாறும்
. இடையாடும் உரிவை - அர்த்தநா ரீசிவா!
படையாவும் ஆடக் காலங்கள் மாறும்
. பரிணாமம் நேரும் - அர்த்தநா ரீசிவா!
தடையாவும் விள்ளும் பரிமாணம் மாறும்
. சடையாகப் பின்னும் - அர்த்தநா ரீசிவா! ... 2

இறவாத வாழ்வும் பிறவாத நிலையும்
. பெறுவேனோ நானும் - அர்த்தநா ரீசிவா!
குறையாத ஞானம் குன்றாத அன்பில்
. உறைவேனோ நானும் - அர்த்தநா ரீசிவா!
மறையாவும் போற்ற மன்றாடும் தேவா
. மனம்வந்தே ஆடு - அர்த்தநா ரீசிவா!
திறையாவும் தீர்ந்த நிறையாக்கி யென்னைப்
. பிறையாகச் சூடாய் - அர்த்தநா ரீசிவா! ... 3

--ரமணி, 27/02/2014, கலி.15/11/5114
(சிவராத்திரி தினம்)

*****

 

[saidevo]

தெய்வ தரிசனம்: அரங்கன் பஞ்சகம்
(கலிவிருத்தம்)

குரங்காட்ட வாழ்வில் கோணல்கள் தானே?
அரங்காட்டு வாரே அரங்கத்தி லாள ... [அரம் = கூர்மை/கருவி]
உரங்காட்டி எம்மை உய்விப்போர் ஆரே? ... [உரங்காட்டுதல் = அன்பு பாராட்டுதல்]
அரங்காவுன் கண்ணால் ஆட்கொண்ட ருள்வாய்! ... 1

குரங்காயுன் தோழர் வலங்காட்டி மனையாள் ... [வலம் = வெற்றி]
உரங்காட்டிக் காத்தே உன்பாதம் கொண்டார்
சிரங்காளு மேனி சிரஞ்ஜீவி யாமோ?
அரங்காவுன் கழலால் ஆட்கொண்ட ருள்வாய்! ... 2

எரங்காட்டில் வீழ்ந்தே எரியுண்ணும் மேனி ... [எரங்காடு = பாழ்நிலம்]
திரங்காட்டிக் காத்தே தீமைகள் சேர்த்தேன் ... [திரம் = உறுதி]
சிரங்காட்டு மனமுள் சிங்காரம் குன்ற
அரங்காவுன் கையால் ஆட்கொண்ட ருள்வாய்! ... 3

அறங்காட்டும் வழியில் ஆளாகிப் போகேன்
திறங்காட்டி வாழ்வில் தீவாகிப் போனேன்
உறங்காமல் உறங்கி உரகமணை யண்ணல் ... [உரகம் = பாம்பு]
அரங்காவுன் அருகே ஆட்கொண்ட ருள்வாய்! ... 4

சிரங்காட்டிக் கரங்காட்டிக் குரங்காட்டி யாகி
உரங்காட்டி யறங்காட்டி மறங்காட்டி யென்னை
பரங்காட்டித் துரங்காட்டித் துறங்காட்டி யென்றும் ... [துரம் = சுமை/பொறுப்பு; துறம் = துறவு]
அரங்காவுன் னுடனே ஆட்கொண்ட ருள்வாய்! ... 5

--ரமணி, 23/02/2014, கலி.11/11/5114

*****

 

[saidevo]

ஞானம்
(தரவுக் கொச்சகக் கலிப்பா)

காலையில் கண்விழித்தே கடவுளைக் கிழிப்பேனே
வேலையில் பொட்டலமாய் மேலவனைக் கட்டுவனே
சாலையில் செருப்பவிழ்த்தே சாற்றுவனே தெருவோரம்
மாலையில் கடவுற்பேர் மரித்திடும் அணங்குடனே.

--ரமணி, 13/03/2014

*****

 

[saidevo]

பிரதோஷத் துதி: தேமதுரச் சுவையார...
(தந்ததனத் தானதனத் தனதான)

[’உம்பர்தருத் தேநுமணிக் கசிவாகி...’--திருப்புகழ் 3.]

உந்துகடற் பாலலையைக் கடைகோலால்
. உம்பருடற் றானவர்கைக் கடைநாகம்
உந்தியதைத் தேகெழுமிச் சுழிகாளம்
. உம்பர்பதைத் தோடவிடப் பரமேசன்
சொந்தமெனக் கையிலெடுத் துணவாய
. ருந்திவிடக் கௌரிவிதிர்த் தவளோடி
வந்துதடுத் தேமிடறிற் கரியோனாய்
. அண்டமுயிர்த் தேவொளிரச் செயுமேறே! ... 1

சொந்தமெனப் பேணிடுமிச் சிறைமேனி
. உண்ணவுடுக் கையணியத் திமிரேறும்
பந்தமெனப் பேணுமனச் சிறைமேவி
. அஞ்சுபுலத் தாறுவுயிர்ப் புணையேகும்
கந்தல்களைப் போற்றுலகச் சுமையேறி
. அஞ்சுமனத் தேவினையொட் டடைசேரும்
அந்தகனிப் போதுமனத் துளைவாலே
. அந்தமிலித் தாளதனிற் றலைதாழ்வேன். ... 2

நந்திதலைக் கோடுமிசைப் பதமேவி
. அஞ்சலெனச் சூலமெடுத் தவிநாசி
வந்துமனத் தாடுவதற் கெனநானும்
. வஞ்சமறுத் தேவிதயச் சுவரோரம்
சிந்தையறுத் தேவுணரச் சிலநேரம்
. எண்ணமதிற் றேமதுரச் சுவையாரும்
சந்திரனைச் சூடுதலைச் சடையோனே
. அந்தநிலச் சீர்பெறுதற் கருள்வாயே. ... 3

--ரமணி, 14/03/2014, கலி.30/11/5114

*****

 

[vaithehi]

very fantastic and finely written ( I DONT HAVE TAMIL FONTS WITH ME)...i only know one song which comes to my mind...illakkanam marrutho...ilakkiyam anatho....if it is not gramatically correct...it is computerically alright...

r.vaithehi

 

[vaithehi]

very philosophically, very spiritually written ...gaining the inner strength through turning our mind inward

r.vaithehi

 

[saidevo]

ஆதி சங்கரர் அருளிய ’ஶ்ரீ கணேச புஜங்கம்’
ஸ்தோத்திரத்தின் தமிழ் யாப்பு
(குறள் வெண்செந்துறை: புஜங்க அமைப்பு:
லகு-குரு-குரு x 4)

தணத்துப் பிணைந்தே மணித்தா ரொலித்தே
. அலைந்தா டயிண்டை மலர்த்தண் டுமாடும்
அணத்துப் பரூஉமே னிமின்நா கமாலை
. கணாதீ சனீசன் மகன்நான் துதிப்பேன். ... 1

ஒலித்தண் டுநாதக் குரல்பா டுமுத்தம்
. துதிக்கை நுனித்தேம் பழம்மா துளையாம்
சலத்தின் மணத்தால் சுரும்பர்த் தார்கூட்டும்
. கணாதீ சனீசன் மகன்நான் துதிப்பேன். ... 2

மிளிர்செம் பருத்திச் சிவந்தோங் குதோற்றம்
. துளிர்க்கா லைசோதிக் கதிர்போன் ற-ஏகம்
களிற்றா னைமோடும் துதிக்கை யோர்கோடும்
. கணாதீ சனீசன் மகன்நான் துதிப்பேன். ... 3

வணச்சோ திரத்னத் திலாரங் கிரீடம்
. கிரீடத் திலங்கும் பிறைவள் ளியாகும்
அணிக்கே யிழையாய்ப் பிறப்பை யறுக்கும்
. கணாதீ சனீசன் மகன்நான் துதிப்பேன். ... 4

உயர்ந்தே றுவல்லிக் கரம்நோக் கவேரோ
. டுவல்லிப் புதல்சுற் றிலக்கம் மயங்கும்
அயர்வே கவிண்மா தர்வீசித் துதிக்கும்
. கணாதீ சனீசன் மகன்நான் துதிப்பேன். ... 5

அலைக்கும் கொடுஞ்செவ் விழிப்பார் வையாளன்
. அருட்செய் யுமாடற் கொழுந்தா யுருப்பான்
கலைபிந் துவாளென் றறிந்தார் துதிக்கும்
. கணாதீ சனீசன் மகன்நான் துதிப்பேன். ... 6

ஒருப்பட் டமாசற் றவேறற் றவொன்றாய்
. குணம்நீங் குமானந் தவோர்தோற் றமில்லாக்
கரையோ மெனும்வே தமுட்கொள் ளுமோடாய்ச்
. சமர்த்தன் பழையோன் எனப்போற் றுவேனே. ... 7

உணர்வின் பவாளன் நிறையோ னுனைநான்
. வணங்கே னோஞாலம் படைப்போ னழிப்போன்
வணங்கே னோஆடும் பரம்தோற் றமொன்றாய்
. வணங்கே னோவித்தா குமீசன் மகன்நான். ... 8

உணர்வோ டுகாலை எழுந்தே யிதைப்பா
. டுவோர்தம் விருப்பம் நிறைவே றும்திண்ணம்
கணேசர் தயையால் பலிக்கா ததில்லை
. கணேசர் வலத்தாற் கிடைக்கா ததேதோ? ... 9

--தமிழ் யாப்பு: ரமணி, 20/03/2014, கலி.06/12/5114

*****
பதம் பிரித்து:

ஆதி சங்கரர் அருளிய ’ஶ்ரீ கணேச புஜங்கம்’
ஸ்தோத்திரத்தின் தமிழ் யாப்பு

தணத்துப் பிணைந்தே மணித்தார் ஒலித்தே
. அலைந்தாட இண்டை மலர்த்தண்டும் ஆடும்
அணத்துப் பரூஉமேனி மின்நாக மாலை
. கணாதீசன் ஈசன் மகன்-நான் துதிப்பேன். ... 1

[தணத்தல் = பிரிதல்; இண்டை = தாமரை; அணத்தல் = மேல்நிமிர்தல்;
பரூஉ = பருமை; மின்நாகம் = மின்னும் நாகம்.]

ஒலித்தண்டு நாதக் குரல்பாடு முத்தம்
. துதிக்கை நுனித் தேம்பழம் மாதுளையாம்
சலத்தின் மணத்தால் சுரும்பர்த் தார்கூட்டும்
. கணாதீ சனீசன் மகன்நான் துதிப்பேன். ... 2

[ஒலித்தண்டு = ஒலிக்கும் வீணை; முத்தம் = இதழ்கள்;
தேம்பழம் = தேன் போன்று இனிய பழம்; சலம் = மத்தசலம்;
சுரும்பர் = வண்டினங்கள்; தார்கூட்டும் = மாலைபோல் கூடி வதியும்.]

மிளிர் செம்பருத்திச் சிவந்தோங்கு தோற்றம்
. துளிர்க் காலை சோதிக் கதிர்போன்ற ஏகம்
களிற்றானை மோடும் துதிக்கை ஓர்கோடும்
. கணாதீ சனீசன் மகன்நான் துதிப்பேன். ... 3

[துளிர் = முளைவிட்ட தளிர்; மோடு = வயிறு; கோடு = தந்தம்.]

வணச்சோதி ரத்னத்தில் ஆரம் கிரீடம்
. கிரீடத்(து) இலங்கும் பிறை வள்ளி யாகும்
அணிக்கே இழையாய்ப் பிறப்பை அறுக்கும்
. கணாதீ சனீசன் மகன்நான் துதிப்பேன். ... 4

[வணம் = வண்ணம்; சோதி = ஒளி; வள்ளி = ஆபரணம், அணி;]

உயர்ந்து-ஏறு வல்லிக் கரம்நோக்க வேரோ(டு)
. வல்லிப் புதல் சுற்றில் அக்கம் மயங்கும்
அயர்வு-ஏக விண்மாதர் வீசித் துதிக்கும்
. கணாதீ சனீசன் மகன்நான் துதிப்பேன். ... 5

[வல்லி = படர்கொடி; புதல் = புருவம்; அக்கம் = கண்கள்;
வீசி = சாமரம் வீசி.]

அலைக்கும் கொடும்-செவ் விழிப் பார்வையாளன்
. அருட்செய்யும் ஆடற் கொழுந்தாய் உருப்பான்
கலை-பிந்து வாள் என்று-அறிந்தார் துதிக்கும்
. கணாதீ சனீசன் மகன்நான் துதிப்பேன். ... 6

[கலை-பிந்து = பிரணவத்தின் கூறுகளான கலையும் பிந்துவும்;
வாள் = ஒளி.]

ஒருப்பட்ட மாசற்ற வேறற்ற ஒன்றாய்
. குணம்-நீங்கும் ஆனந்த ஓர்தோற்றம்-இல்லாக்
கரை-ஓம் எனும்வேதம் உட்கொள்ளு மோடாய்ச்
. சமர்த்தன் பழையோன் எனப்போற்று வேனே. ... 7

[வேதம் உட்கொள்ளும் மோடாய் = வேதத்தின் பிறவிக் கர்ப்பமாய்.]

உணர்வு இன்ப-வாளன் நிறையோன் உனைநான்
. வணங்கேனோ ஞாலம் படைப்போன் அழிப்போன்
வணங்கேனோ ஆடும் பரம்-தோற்றம் ஒன்றாய்
. வணங்கேனோ வித்தாகும் ஈசன் மகன்(ஐ)நான். ... 8

[உணர்விபவாளன் = அறிவாகும் இன்பம் துய்ப்பவன், சச்சிதானந்தன்;
நிறையோன் = அமைதி நிறைந்தோன்.]

உணர்வோடு காலை எழுந்தே இதைப்பா(டு)
. வோர்-தம் விருப்பம் நிறைவே உம் திண்ணம்
கணேசர் தயையால் பலிக்காதது இல்லை
. கணேசர் வலத்தால் கிடைக்காது ஏதோ? ... 9

[வலம் = வலிமை.]

--தமிழ் யாப்பு: ரமணி, 20/03/2014, கலி.06/12/5114

*****